ടി-20 ലോകകപ്പില് ചരിത്രം കുറിച്ച് ഇന്ത്യന് ക്യാപ്റ്റന് ഹര്മന്പ്രീത് കൗര്. ഐ.സി.സി വനിത ടി-20 ലോകകപ്പില് ഏറ്റവും കൂടുതല് റണ്സ് നേടുന്ന ഇന്ത്യന് താരമായാണ് ഹര്മന്പ്രീത് മാറിയത്. ബര്മിങ്ഹാമിലെ എഡ്ജ്ബാസ്റ്റണില് നടക്കുന്ന പാകിസ്ഥാനെതിരെയുള്ള ആദ്യ മത്സരത്തിലാണ് ഇന്ത്യന് ക്യാപ്റ്റന് ഈ നേട്ടം കൈവരിച്ചത്.
മത്സരത്തില് വെറും ഒരു റണ്സ് മാത്രമായിരുന്നു ഹര്മന് ഈ നേട്ടത്തിലെത്താന് വേണ്ടിയിരുന്നത്. മത്സരത്തിന് ഇറങ്ങുന്നതിന് മുമ്പ് ടി-20 ലോകകപ്പില് 726 റണ്സായിരുന്നു ഇന്ത്യന് ക്യാപ്റ്റന് ഉണ്ടായിരുന്നത്. മുന് ഇന്ത്യന് ക്യാപ്റ്റന് മിതാലി രാജിനെയാണ് ഈ നേട്ടത്തില് ഹര്മന്പ്രീത് മറികടന്നത്. 23 ഇന്നിങ്സില് നിന്നുമായിരുന്നു മിതാലി 726 റണ്സ് സ്വന്തമാക്കിയിരുന്നത്.
ടി-20യില് പാകിസ്ഥാനെതിരെ മികച്ച ബാറ്റിങ് റെക്കോഡുള്ള താരമാണ് ഹര്മന്പ്രീത് കൗര്. മത്സരത്തിനിറങ്ങും മുമ്പ് 15 മത്സരങ്ങളില് നിന്ന് 194 റണ്സായിരുന്നു താരം പാകിസ്ഥാനെതിരെ സ്വന്തമാക്കിയത്.
അതേസമയം കുട്ടിക്രിക്കറ്റിലെ ആദ്യ കിരീടമാണ് ഇന്ത്യ ലക്ഷ്യം വെക്കുന്നത്. ഗ്രൂപ്പ് എയി-ലാണ് ഇന്ത്യ ഇടം നേടിയിട്ടുള്ളത്. പാകിസ്ഥാന് പുറമെ ഓസ്ട്രേലിയ, സൗത്ത് ആഫ്രിക്ക, ബംഗ്ലാദേശ്, നെതര്ലന്ഡ്സ് എന്നീ ടീമുകളാണ് ഇന്ത്യക്കൊപ്പം ഗ്രൂപ്പ് എ-യില് നിന്നും കിരീട പോരാട്ടത്തിനായി മാറ്റുരക്കുന്നത്.
