ക്യാപ്റ്റന്‍ തിലക് വര്‍മയ്ക്ക് തിരിച്ചടി; കിരീടപ്പോരിന് വജ്രായുധം ടീമിലില്ല

ദുലീപ് ട്രോഫി 2026 കലാശപ്പോരാട്ടത്തിന് മുമ്പ് സൗത്ത് സോണിന് വമ്പന്‍ തിരിച്ചടി. സ്റ്റാര്‍ ബാറ്റര്‍ കെ.എല്‍. രാഹുല്‍ ഫൈനല്‍ കളിക്കില്ല. സൗത്ത് സോണ്‍ ക്യാപ്റ്റന്‍ തിലക് വര്‍മ്മയാണ് വാര്‍ത്താസമ്മേളനത്തില്‍ രാഹുലിന്റെ പിന്മാറ്റം സ്ഥിരീകരിച്ചത്.

സെപ്റ്റംബര്‍ ആറ് മുതലാണ് ഇന്ത്യന്‍ ക്രിക്കറ്റ് ചരിത്രത്തില്‍ ഏറ്റവും പ്രാധാന്യമര്‍ഹിക്കുന്ന കിരീടത്തിനായുള്ള പോരാട്ടം അരങ്ങേറുന്നത്. ചെന്നൈയില്‍ നടക്കുന്ന മത്സരത്തില്‍ ഈസ്റ്റ് സോണ്‍ ആണ് എതിരാളികള്‍.

നേരത്തെ, ശ്രീലങ്കന്‍ പര്യടനത്തിനു ശേഷം മുഹമ്മദ് സിറാജ്, ദേവ്ദത്ത് പടിക്കല്‍ എന്നിവര്‍ക്കൊപ്പം രാഹുലിനെയും ഫൈനല്‍ പോരാട്ടത്തിനുള്ള സൗത്ത് സോണ്‍ ടീമില്‍ ഉള്‍പ്പെടുത്തിയിരുന്നതായി റിപ്പോര്‍ട്ടുകള്‍ ഉണ്ടായിരുന്നു. എന്നാല്‍ മത്സരത്തില്‍ രാഹുല്‍ കളിക്കില്ലെന്ന് ക്യാപ്റ്റന്‍ വ്യക്തമാക്കി.

കെ.എല്‍. രാഹുല്‍. Photo: BCCI

അതേസമയം ഇന്ത്യന്‍ താരങ്ങളായ മുഹമ്മദ് സിറാജും ദേവ്ദത്ത് പടിക്കലും സൗത്ത് സോണിനായി പ്ലെയിങ് ഇലവനില്‍ അണിനിരക്കും.

ശ്രീലങ്കയ്‌ക്കെതിരായ ടെസ്റ്റ് പരമ്പര സ്വന്തമാക്കിയ ശേഷമാണ് പടിക്കലും സിറാജും ആഭ്യന്തര ടൂര്‍ണമെന്റിലേക്ക് തിരിച്ചെത്തിയത്.

പരമ്പരയില്‍ ദേവ്ദത്ത് പടിക്കല്‍ രണ്ട് സെഞ്ചുറികള്‍ ഉള്‍പ്പെടെ 109ല്‍ അധികം ശരാശരിയില്‍ 328 റണ്‍സ് നേടി ഇന്ത്യന്‍ നിരയിലെ ടോപ് സ്‌കോററായപ്പോള്‍ സ്പിന്നിനെ തുണച്ച പിച്ചുകളില്‍ മികച്ച ബൗളിങ് കാഴ്ചവെച്ച സിറാജ് 26 ശരാശരിയില്‍ 4 വിക്കറ്റുകള്‍ വീഴ്ത്തി.

സെപ്റ്റംബര്‍ 13ന് അഫ്ഗാനിസ്ഥാനെതിരായ ട്വന്റി20 പരമ്പര ആരംഭിക്കാനിരിക്കെ, ദുലീപ് ട്രോഫി ഫൈനലില്‍ യുവതാരങ്ങളായ തിലക് വര്‍മ, ഇഷാന്‍ കിഷന്‍, വൈഭവ് സൂര്യവംശി എന്നിവരുടെ പങ്കാളിത്തം ചോദ്യചിഹ്നമായിരുന്നു. ആറിന് ആരംഭിക്കുന്ന ഫൈനല്‍ മത്സരം പത്തിനാണ് അവസാനിക്കുന്നത്.

എന്നാല്‍, അഫ്ഗാന്‍ പരമ്പരയ്ക്കുള്ള ഇന്ത്യന്‍ ടീമില്‍ അംഗങ്ങളാണെങ്കിലും മൂവരും ദുലീപ് ട്രോഫി ഫൈനലില്‍ അതത് ടീമുകള്‍ക്കായി കളിക്കുമെന്ന് സൗത്ത് സോണ്‍ ക്യാപ്റ്റന്‍ തിലക് വര്‍മയും ഈസ്റ്റ് സോണ്‍ ക്യാപ്റ്റന്‍ ഇഷാന്‍ കിഷനും സ്ഥിരീകരിച്ചു.

സെമി ഫൈനലില്‍ നോര്‍ത്ത് സോണിനെ പരാജയപ്പെടുത്തിയാണ് സൗത്ത് സോണ്‍ കലാശപ്പോരാട്ടത്തിന് യോഗ്യത നേടിയത്. സെന്‍ട്രല്‍ സോണിനെ തകര്‍ത്തായിരുന്നു ഇഷാന്‍ കിഷന്റെയും സംഘത്തിന്റെയും ഫൈനല്‍ പ്രവേശം.

2023ലാണ് സൗത്ത് സോണ്‍ അവസാനമായി (13ാം തവണ) ദുലീപ് ട്രോഫി കിരീടം ഉയര്‍ത്തിയത്. കഴിഞ്ഞ വര്‍ഷത്തെ ഫൈനലില്‍ സെന്‍ട്രല്‍ സോണിനോട് ആറ് വിക്കറ്റിന് പരാജയപ്പെട്ട് രണ്ടാം സ്ഥാനം കൊണ്ട് തൃപ്തിപ്പെടേണ്ടി വരികയായിരുന്നു.

Content highlight: Duleep Trophy 2026: KL Rahul will miss final against East  Zone