മമിതക്കും അനശ്വരക്കും പിന്നാലെ മലയാളത്തില് നിന്നും തമിഴിലെത്തി തന്റെതായ സ്ഥാനം കണ്ടെത്തിയ അഭിനേത്രിയാണ് അനിഷ്മ അനില്കുമര്. പൂവന്, ഐ ആം കാതലന് തുടങ്ങിയ ചിത്രങ്ങളിലൂടെ അഭിനയ രംഗത്തേക്ക് അരങ്ങേറ്റം കുറിച്ച താരം തമിഴില് കഴിഞ്ഞ വര്ഷം പുറത്തിറങ്ങിയ സിറൈ എന്ന ചിത്രത്തിലൂടെയാണ് ശ്രദ്ധിക്കപ്പെടുന്നത്. ചിത്രത്തില് കലൈയരസിയായി പ്രശംസ പിടിച്ചുപറ്റിയ അനിഷ്മ അടുത്തിടെ പുറത്തിറങ്ങിയ യൂത്തിലും പ്രധാനവേഷത്തിലെത്തിയിരുന്നു.
കെന് കരുണാസ് സംവിധാനം ചെയ്ത യൂത്തിലെ താരങ്ങള് തമിഴ് സൂപ്പര് താരം സൂര്യയെ കാണാനെത്തിയത് സമൂഹമാധ്യമങ്ങളില് വലിയ രീതിയില് വൈറലായിരുന്നു. അരങ്ങേറ്റ സംവിധായകനെന്ന നിലയില് കെന് കരുണാസിന്റെ ചിത്രം മികച്ചതാണന്നും ചിത്രത്തില് ഓരോരുത്തരുടെയും പ്രകടനം മികച്ചതായിരുന്നുവെന്നും സൂര്യ പറഞ്ഞിരുന്നു. എന്നാല് ഇതിനെല്ലാം പുറമെ കൂട്ടത്തില് സൂര്യയുടെ വലിയ ആരാധികയായ അനിഷ്മ താരത്തെ കണ്ട ശേഷം പറഞ്ഞ വാക്കുകളാണ് ഇപ്പോള് സോഷ്യല് മീഡിയയില് വൈറലാവുന്നത്.
‘അദ്ദേഹത്തെ കണ്ടെന്ന് എനിക്ക് ഇപ്പോഴും വിശ്വസിക്കാനാവുന്നില്ല. 2005 ല് ഗജിനി ഇറങ്ങിയതുമുതല് ഞാനദ്ദേഹത്തിന്റെ വലിയ ആരാധികയാണ്. എല്ലാ ദിവസവും അദ്ദേഹത്തിന്റെ ചിത്രത്തിലെ ഗാനങ്ങള് കണ്ടുകൊണ്ടാണ് ഞാന് സ്കൂളിലേക്ക് പോയിരുന്നത്. അതുകൊണ്ട് തന്നെ നടന്നതെന്താണെന്ന് എനിക്കിപ്പോഴും പ്രൊസസ് ചെയ്യാന് സാധിക്കുന്നില്ല. ഇത്തരത്തില് ഒരു അവസരം ഒരുക്കിയതിന് കെന്നിനോട് ഒരുപാട് തവണ ഞാന് നന്ദി പറഞ്ഞിരുന്നു, അനിഷ്മ പറയുന്നു.
സൂര്യയോടൊപ്പമുള്ള ചിത്രം പങ്കുവെച്ചുകൊണ്ട് ഇന്സ്റ്റഗ്രാമില് താരം കുറിച്ച വാക്കുകളും വൈറലായിരുന്നു. ‘സുട്രും വിഴി സൂടറെ’ എന്ന ഗാനം എല്ലാ ദിവസവും കേള്ക്കുകയും സൂര്യയുടെ ചിത്രം ചുവരില് ഒട്ടിച്ചുവെക്കുകയും ചെയ്ത താന് ഇപ്പോള് താരത്തെ നേരിട്ട് കണ്ടെന്നായിരുന്നു അനിഷ്മയുടെ പോസ്റ്റ്.
കമിങ് ഓഫ് ഏജ്, റോം-കോം ഴോണറിലെത്തിയ യൂത്തിന്റെ തിരക്കഥയും സംവിധാനവും ഗാനരചനയും നിര്വഹിച്ചിരിക്കുന്നത് കെന് കരുണാസാണ്. റിലീസ് ചെയ്തതിന് പിന്നാലെ തിയേറ്ററുകളില് നിന്നും മികച്ച പ്രതികരണം നേടി മുന്നേറുകയാണ് യൂത്ത്. കെന് തന്നെ നായകനായെത്തുന്ന ചിത്രത്തില് അനിഷ്മക്ക് പുറമെ മലയാളി താരമായ സുരാജ് വെഞ്ഞാറമൂട്, ദേവദര്ശിനി, മീനാക്ഷി ദിനേശ് തുടങ്ങിയവരും പ്രധാനവേഷത്തിലെത്തുന്നുണ്ട്.
Content Highlight: Anishma talks about the experience when she met Suriya
ഡൂള്ന്യൂസില് സബ് എഡിറ്റര് ട്രെയ്നി. കാലിക്കറ്റ് യൂണിവേഴ്സിറ്റിയില് നിന്നും ഇംഗ്ലീഷില് ബിരുദം. കര്ണാടക കേന്ദ്രസര്വ്വകലാശാലയില് നിന്നും എം.എ. മാസ് കമ്യൂണിക്കേഷന് ആന്ഡ് ജേര്ണലിസത്തില് ബിരുദാനന്തര ബിരുദം.
