യുപിയിലും ഗുജാറാത്തിലും പരീക്ഷിച്ച 'പേജ് പ്രമുഖ്' പദ്ധതി കേരളത്തിലും നടപ്പാക്കാനൊരുങ്ങി ബി.ജെ.പി; യോഗിയും അമിത് ഷാ കേരളത്തിലെത്തും
national news
യുപിയിലും ഗുജാറാത്തിലും പരീക്ഷിച്ച 'പേജ് പ്രമുഖ്' പദ്ധതി കേരളത്തിലും നടപ്പാക്കാനൊരുങ്ങി ബി.ജെ.പി; യോഗിയും അമിത് ഷാ കേരളത്തിലെത്തും
ന്യൂസ് ഡെസ്‌ക്
Tuesday, 12th February 2019, 9:01 am

പത്തനംതിട്ട: വോട്ടര്‍പട്ടികയിലെ ഒരു പേജിന്റെ ചുമതല ഒരു പ്രവര്‍ത്തകന് നല്‍കി ആ വോട്ടര്‍മാരെ നിരന്തരം സന്ദര്‍ശിച്ച് വോട്ടുറപ്പിക്കുന്ന “പേജ് പ്രമുഖ്” പദ്ധതി കേരളത്തിലും നടപ്പാക്കാന്‍ ഒരുങ്ങി ബി.ജെ.പി. പേജ് പ്രമുഖ് മാരുടെ യോഗത്തില്‍ പങ്കെടുക്കാന്‍ ബി.ജെ.പി ദേശീയ അധ്യക്ഷന്‍ അമിത് ഷാ യുപി മുഖ്യമന്ത്രി യോഗി ആദിത്യനാഥ് തുടങ്ങിയ ദേശീയ നേതാക്കള്‍ കേരളത്തിലെത്തും.

14-ന് യു.പി. മുഖ്യമന്ത്രി യോഗി ആദിത്യനാഥ് തിരുവനന്തപുരം, ആറ്റിങ്ങല്‍, കൊല്ലം, പത്തനംതിട്ട മണ്ഡലങ്ങളിലെ ശക്തികേന്ദ്ര ഇന്‍ചാര്‍ജുമാരുടെ യോഗത്തിലും പത്തനംതിട്ടയിലെ പേജ് ഇന്‍ചാര്‍ജുമാരുടെ യോഗത്തിലും പങ്കെടുക്കുമെന്നാണ് പാര്‍ട്ടി വക്താവ് എംഎസ്. കുമാര്‍ അറിയിച്ചത്.

Read  Also : കല്യാണ ദിവസം പെണ്‍കുട്ടികള്‍ മൈക്കിലൂടെ സംസാരിച്ചു, സത്രീകള്‍ വേദിയില്‍ കയറി ഫോട്ടോയെടുത്തു; മഹല്ല് കമ്മിറ്റി ഊര് വിലക്കിയെന്ന് മുഖ്യമന്ത്രിക്ക് യുവാവിന്റെ പരാതി

22-നെത്തുന്ന അമിത് ഷാ പാലക്കാട്, ആലത്തൂര്‍, മലപ്പുറം, പൊന്നാനി മണ്ഡലങ്ങളിലെ ശക്തികേന്ദ്ര ഇന്‍ചാര്‍ജുമാരുടെ യോഗത്തില്‍ പങ്കെടുക്കും. 28-നാണ് നരേന്ദ്ര മോദി ബൂത്തുതല പ്രവര്‍ത്തകരുമായി വീഡിയോ കോണ്‍ഫറന്‍സിലൂടെ സംസാരിക്കുന്നത്.


വോട്ടര്‍ പട്ടികയുടെ ഒരു പേജിന്റെ ഒരു വശത്ത് 30 പേരാണുള്ളത്. അഞ്ചോ ആറോ വീടുകളിലാകും ഈ വോട്ടുകള്‍. ഇവരുടെ ചുമതല മാത്രമാകും ഈ പേജ് പ്രമുഖിന്. നിരന്തര ഗൃഹസമ്പര്‍ക്കത്തിലൂടെ ഇവരുടെ വോട്ട് അനൂകൂലമാക്കി വോട്ട് ചെയ്യാന്‍ എത്തിക്കുന്നതുവരെയാണ് ചുമതല. ഉത്തര്‍പ്രദേശ്, ഗുജറാത്ത് തിരഞ്ഞെടുപ്പുകളില്‍ ബി.ജെ.പി പരീക്ഷിച്ചതാണ് പേജ് പ്രമുഖ് പദ്ധതി. രാജസ്ഥാനില്‍ നിയമസഭാ തെരഞ്ഞെടുപ്പില്‍ ഒരു പേജിന് രണ്ടുപേര്‍ക്കായിരുന്നു ചുമതല.