Categories
boby-chemmannur  

വര്‍ക്കല കൊലപാതകം: ഡി.എച്ച്.ആര്‍.എമ്മിനു പങ്കില്ല, പിന്നില്‍ മണല്‍ മാഫിയയെന്ന് പി.സി ജോര്‍ജ്ജ്

പി.സി ജോര്‍ജ്ജ് ഡി.എച്ച്.ആര്‍.എം വേദിയില്‍ (ഫയല്‍ ചിത്രം)

പത്തനംതിട്ട: വിവാദമായ വര്‍ക്കല കൊലപാതകം നടത്തിയത് മണല്‍ മാഫിയ ആണെന്ന് സര്‍ക്കാര്‍ ചീഫ് വിപ്പ് പി.സി ജോര്‍ജ്ജ്. പത്തനംതിട്ടയില്‍ മാധ്യമപ്രവര്‍ത്തകരോട് സംസാരിക്കവെയാണ് പി.സി ജോര്‍ജ്ജിന്റെ വെളിപ്പെടുത്തല്‍. വര്‍ക്കലയില്‍ പ്രഭാത സവാരിക്കിറങ്ങിയ മധ്യവയസ്‌കനെ വെട്ടിക്കൊലപ്പെടുത്തിയത് ദലിത് തീവ്രവാദ സംഘടനയാണെന്നായിരുന്നു പോലീസ് പ്രചാരണം. ഇതിന്റെ പേരില്‍ ദലിത് ഹ്യൂമന്‍ റൈറ്റ്‌സ് മൂവ്‌മെന്റ് (ഡി.എച്ച്.ആര്‍.എം) എന്ന സംഘടനയുടെ പേരില്‍ പോലീസ് കേസെടുക്കുകയും സംഘടനയുടെ സംസ്ഥാന സെക്രട്ടറിയടക്കം ആറോളം പേരെ അറസ്റ്റ് ചെയ്യുകയും ചെയ്തിരുന്നു.

ഇന്ത്യന്‍ ഭരണഘടനയില്‍ തൊട്ട് സത്യംചെയ്ത് പ്രവര്‍ത്തിക്കുന്ന ഡി.എച്ച്.ആര്‍.എം പ്രവര്‍ത്തകരെ വര്‍ക്കല സംഭവത്തെതുടര്‍ന്ന് തീവ്രവാദികളാക്കി ചീത്രീകരിച്ചത് സി.പി.ഐ.എം ആണ്. ഡിഎച്ച്ആര്‍എം തീവ്രവാദ സംഘടനയാണെന്നു സ്ഥാപിക്കാന്‍ ഇടതുപക്ഷം നടത്തുന്ന ശ്രമങ്ങള്‍ വിലപ്പോവില്ല. വര്‍ക്കലയില്‍ കൊല്ലപ്പെട്ടയാള്‍ മണല്‍മാഫിയകളുടെ ശത്രുവായിരുന്നു. മാഫിയ ഗൂഢാലോചനയെത്തുടര്‍ന്നാണ് അദ്ദേഹം കൊല്ലപ്പെട്ടത്. ഇതില്‍ ഡി.എച്ച്.എആര്‍.എമ്മിന് പങ്കില്ല-പി.സി ജോര്‍ജ്ജ് വ്യക്തമാക്കി.

കഴിഞ്ഞ ദിവസവും വര്‍ക്കല കൊലപാതക കേസില്‍ ഒരു ഡി.എച്ച്.ആര്‍.എം പ്രവര്‍ത്തകെ പോലീസ് അറസ്റ്റ് ചെയ്തിരുന്നു. കവിയും തിരുവനന്തപുരം സ്വദേശിയുമായ അനില്‍ കുമാറിനെയാണ് അറസ്റ്റ് ചെയതത്. ഡി.എച്ച്.ആര്‍.എം പ്രവര്‍ത്തകരെ നാടന്‍ പാട്ട് പഠിപ്പിക്കാന്‍ പത്തനം തിട്ടയില്‍ എത്തിയപ്പോഴാണ് കേസില്‍ 14ാം പ്രതി ചേര്‍ത്ത അനില്‍ കുമാറിനെ പോലീസ് അറസ്റ്റ് ചെയ്തത്. വര്‍ക്കല സംഭവത്തിന്റെ പേരില്‍ കഴിഞ്ഞ ദിവസം കോന്നിയില്‍ അറസ്റ്റ് ചെയ്യപ്പെട്ട പ്രവര്‍ത്തകന് നിയമപരമായ എല്ലാ സഹായവും ചെയ്തുകൊടുക്കുമെന്നും പി.സി ജോര്‍ജ് പത്തനംതിട്ടയില്‍ പറഞ്ഞിട്ടുണ്ട്.

ഡി.എച്ച്.ആര്‍.എമ്മിന് തീവ്രവാദ സ്വഭാവമില്ല. പാവപ്പെട്ടവരെ സംഘടിപ്പിക്കുകയാണ് അവര്‍ ചെയ്യുന്നത്. ഇന്ത്യയിലെ പട്ടികജാതി വിഭാഗത്തില്‍നിന്ന് ആരും തീവ്രവാദികള്‍ ആയിട്ടില്ലെന്നും പി.സി ജോര്‍ജ്ജ് പറഞ്ഞു. സംഘടിത ശക്തിയായി കാര്യങ്ങള്‍ നേടിയെടുക്കുന്നവര്‍ തീവ്രവാദത്തിലേക്ക് എത്തിപ്പെടാന്‍ എളുപ്പമല്ലേ എന്ന മാധ്യമപ്രവര്‍ത്തകരുടെ ചോദ്യത്തിന്, അവരെ നിയന്ത്രിക്കാന്‍ പി. സി. ജോര്‍ജ് ഉണ്ടെന്ന മറുപടിയാണ് അദ്ദേഹം നല്‍കിയത്.

സംസ്ഥാനത്ത് ദലിത് തീവ്രവാദമെന്ന പ്രചാരണത്തിനും ഭീകരമായ ദലിത് വേട്ടക്കും ഇടയാക്കിയ വര്‍ക്കല കൊലപാതക കേസില്‍ പി.സി ജോര്‍ജ്ജിന്റെ പുതിയ വെളിപ്പെടുത്തലോടെ പുതിയ ചര്‍ച്ചകള്‍ക്ക് തുടക്കമിട്ടിരിക്കുകയാണ്. നേരത്തെ വര്‍ക്കല കൊലപാതകത്തിലെ ബാഹ്യ ഇടപെടലുകളെക്കുറിച്ച് മുതിര്‍ന്ന മാധ്യമപ്രവര്‍ത്തകനായ ബി.ആര്‍.പി ഭാസ്‌കര്‍ അടക്കമുള്ളവര്‍ സംശയം പ്രകടിപ്പിച്ചിരുന്നു. സര്‍ക്കാര്‍ ചീഫ് വിപ്പ് പി.സി ജോര്‍ജ്ജ് അടക്കമുള്ള പ്രമുഖര്‍ ഡി.എച്ച്.ആര്‍.എമ്മിനെതിരെയുള്ള കേസ് വ്യാജമാണെന്ന് നേരത്തെയും പൊതുവേദികളില്‍ പറഞ്ഞിരുന്നു.

2009 സെപ്തംബര്‍ 23നാണ് കേസിനാധാരമായ സംഭവം നടന്നത്. വര്‍ക്കലയില്‍ പ്രഭാത സവാരിക്കിറങ്ങിയ ശിവപ്രസാദ് (51) നെ അജ്ഞാതര്‍ വെട്ടിക്കൊലപ്പെടുത്തുകയായിരുന്നു. സംഘടനയെ തകര്‍ക്കാന്‍ വര്‍ക്കല കൊലപാതക കേസ് ബോധപൂര്‍വ്വം തങ്ങളുടെ മേല്‍ ചുമത്തുകയാണെന്ന് വ്യക്തമാക്കി ഡി.എച്ച്.ആര്‍.എം നേതാക്കള്‍ ഇതുസംബന്ധിച്ചുള്ള തെളിവുകള്‍ നേരത്തെ പുറത്തുവിട്ടിരുന്നു.

Malayalam News

Kerala News in English



ചാനല്‍ ചര്‍ച്ചക്കിടെ കിസ് ഓഫ് ലവ് പ്രവര്‍ത്തകര്‍ക്കു നേരെ യുവമോര്‍ച്ച കയ്യേറ്റശ്രമം

കൊച്ചി: മാതൃഭൂമി ചാനലിലെ  ചര്‍ച്ചക്കിടെ കിസ് ഓഫ് ലവ് പ്രവര്‍ത്തകര്‍ക്കുനേരെ യുവമോര്‍ച്ച പ്രവര്‍ത്തകര്‍ കയ്യേറ്റശ്രമം നടത്തി. ക്യാമറയ്ക്ക് മുമ്പില്‍ വെച്ച് പരിപാടി ഷൂട്ട് ചെയ്തു കൊണ്ടിരിക്കുന്നതിനിടെ ആണ് സംഭവം. പരിപാടിയില്‍ പങ്കെടുത്ത ഡീന്‍ കുര്യാക്കോസ് ഉള്‍പ്പെടെ ഉള്ള നേതാക്കള്‍ക്ക് മുമ്പില്‍ വെച്ചായിരുന്നു യുവമോര്‍ച്ച 'സദാചാര പോലീസ്' ആകാന്‍ ശ്രമം നടത്തിയത്. ക്യാമറക്ക് മുന്നില്‍ വെച്ച് പരസ്യമായി ചുംബിക്കാന്‍ ധൈര്യമുണ്ടോ എന്ന ചാനല്‍ അവതാരകയുടെ ചോദ്യത്തെത്തുടര്‍ന്ന് ചര്‍ച്ചയില്‍ പങ്കെടുത്ത രാഹുല്‍ ഭാര്യ രശ്മിക്ക്  കവിളത്ത് ചുംബനം നല്‍കിയതിനെ തുടര്‍ന്നാണ്  യുവമോര്‍ച്ചയുടെ കയ്യേറ്റ ശ്രമം ഉണ്ടായത്. വെറുതെ വിടില്ല ആക്രോശത്തോടുകൂടിയായിരുന്നു ഇവര്‍ പ്രവര്‍ത്തകര്‍ക്കുനേരെ ഇവരുടെ ആക്രമം. ഇവര്‍ക്കു നേരെ കോണ്‍ഗ്രസ് പ്രവര്‍ത്തകരും മുമ്പ് അക്രമണമഴിച്ചു വിട്ടിരുന്നു.

കോടതി വിധിയെ നിയമപരമായി നേരിടും : ഉമ്മന്‍ചാണ്ടി

തിരുവനന്തപുരം: ബാര്‍ കേസില്‍ സിംഗിള്‍ ബഞ്ച് വിധിക്കുണ്ടായ ഹൈക്കോടതിയുടെ സ്‌റ്റേ സര്‍ക്കാര്‍ നിയമപരമായി നേരിടുമെന്ന് മുഖ്യമന്ത്രി ഉമ്മന്‍ചാണ്ടി. സിംഗിള്‍ ബഞ്ച് വിധി സ്‌റ്റേ ചെയ്ത ഹൈക്കോടതി വിധി സര്‍ക്കാരിന് തിരിച്ചടിയായെന്ന വാദങ്ങളോട് പ്രതികരിക്കുകയായിരുന്നു അദ്ദേഹം. കോടതി വിധി സര്‍ക്കാരിന് തിരിച്ചടിയല്ല. അതു പോലെ വിമര്‍ശനത്തില്‍ ഭയമില്ലെന്നും മദ്യനയത്തില്‍ സര്‍ക്കാരിന് ഉറച്ച ബോധ്യമുണ്ടെന്നും ഉമ്മന്‍ചാണ്ടി കൂട്ടിച്ചേര്‍ത്തു. ഇന്നലെയാണ് 250 ബാറുകള്‍ അടച്ചു പൂട്ടാനുള്ള സിംഗിള്‍ ബഞ്ച് വിധി വന്നത്. സര്‍ക്കാരിന്റെ മദ്യനയത്തെ ഭാഗികമായി മാത്രം അംഗീകരിക്കുന്നതായിരുന്നു ഈ വിധി. ഇതേ തുടര്‍ന്ന് ബാറുകള്‍ അടച്ചു പൂട്ടാനുള്ള നടപടികള്‍ സര്‍ക്കാര്‍ ആരംഭിച്ചിരുന്നു. സിംഗിള്‍ ബഞ്ച് വിധിക്കെതിരെ ബാറുടമകള്‍ സമര്‍പ്പിച്ച ഹരജിയിലാണ് ഹൈക്കോടതി വിധി പറഞ്ഞത്. അതേസമയം സിംഗിള്‍ ബഞ്ച് തീരുമാനത്തെതുടര്‍ന്ന് പൂട്ടിയ ബാറുകള്‍ വീണ്ടും തുറന്നുതുടങ്ങി.

സീറ്റ് വിഭജന തര്‍ക്കം: ജാര്‍ഖണ്ഡില്‍ കോണ്‍ഗ്രസ്-ജെ.എം.എം സഖ്യം പിരിഞ്ഞു

റാഞ്ചി: രാഷ്ട്രീയ കൂടുമാറ്റങ്ങളുടെ സ്ഥിരം വേദിയായ ജാര്‍ഖണ്ഡില്‍ വീണ്ടും മുന്നണി തകര്‍ച്ച. സീറ്റ് വിഭന തര്‍ക്കത്തെ തുടര്‍ന്ന് കോണ്‍ഗ്രസ്-ജെ.എം.എം പിരിഞ്ഞു. നവംബറില്‍ വരാനിരിക്കുന്ന നിയമസഭാ തിരഞ്ഞെടുപ്പില്‍ ആകെയുള്ള 81 സീറ്റിലും ഒറ്റക്ക് മത്സരിക്കാനാണ് ഇരു പാര്‍ട്ടികളുടെയും തീരുമാനം. ദല്‍ഹിയില്‍ വച്ച് നിരവധി ഒത്ത് തീര്‍പ്പ് ചര്‍ച്ചകള്‍ നടന്നിരുന്നെങ്കിലും സഖ്യം പിരിയാന്‍ തീരുമാനമാകുകയായിരുന്നു. അവസാന നിമിഷം കോണ്‍ഗ്രസ് തങ്ങളെ ചതിച്ചതാണെന്ന് സഖ്യം പിരിഞ്ഞു കൊണ്ട് ജെ.എം.എം നേതാവും ജാര്‍ഖണ്ഡ് മുഖ്യമന്ത്രിയുമായ ഹേമന്ത് സോറന്‍ പറഞ്ഞു. ചര്‍ച്ചക്കിടെ 45 സീറ്റ് ആവശ്യപെട്ടതിനു പുറമെ മറ്റ് കക്ഷികളായ ജെ.ഡി.യു,ആര്‍.ജെ.ഡി എന്നിവരെ ബാക്കി വരുന്ന 36 സീറ്റുകളില്‍ ഉള്‍പെടുത്താനും കോണ്‍ഗ്രസ് ആവശ്യപെട്ടിരുന്നു.കോണ്‍ഗ്രസിന്റെ ഈ ആവശ്യത്തെ ജെ.എം.എം നിരാകരിച്ചിരുന്നു. കൂടാതെ ജംതാര,ഘട്‌സില,പാകുര്‍ എന്നീ സീറ്റുകള്‍ കോണ്‍ഗ്രസിന് വിട്ടു കൊടുക്കാനും ജെ.എം.എം തയാറായിരുന്നില്ല. മഹാരാഷ്ട്ര, ഹരിയാന തിരഞ്ഞെടുപ്പുകളുടെ പശ്ചാത്തലത്തില്‍ സംസ്ഥാനത്ത് ഒറ്റക്ക് മത്സരിക്കണമെന്ന നിലപാടിലായിരുന്നു ജാര്‍ഖണ്ഡിലെ കോണ്‍ഗ്രസ് നേതാക്കള്‍.ശിവസേന, ഐ.എന്‍.എല്‍.ഡി എന്നീ കക്ഷികളെ പോലെ ജനങ്ങള്‍ പ്രാദേശിക കക്ഷികളെ തള്ളിക്കളയും എന്ന വിലയിരുത്തല്‍ ആണ് ബി.ജെ.പി ക്കെതിരെ ഒറ്റക്ക് മത്സരിക്കാന്‍ കോണ്‍ഗ്രസിനെ പ്രേരിപ്പിച്ചത്. അതേ സമയം ബാബുലാല്‍ മറാണ്ടിയുടെ ജാര്‍ഖണ്ഡ് വികാസ് മോര്‍ച്ച, ജെ.ഡി.യു, ആര്‍.ജെ.ഡി എന്നീ കക്ഷികളെ കൂടെ കൂട്ടാന്‍ കോണ്‍ഗ്രസില്‍ തീരുമാനമായിട്ടുണ്ട്. കഴിഞ്ഞ ലോകസഭാ തിരഞ്ഞെടുപ്പില്‍ കനത്ത പരാജയമാണ് കോണ്‍ഗ്രസ് നേരിട്ടിരുന്നത്. ആകെയുള്ള 14 സീറ്റില്‍ 12 ഉം ബി.ജെ.പി നേടിയിരുന്നു.

ഹൈക്കോടതി വിധി ജനതാല്‍പര്യ വിരുദ്ധം: വി.എം സുധീരന്‍

തിരുവനന്തപുരം: ബാറുകള്‍ പൂട്ടാനുള്ള സിംഗിള്‍ ബഞ്ച് വിധി സ്റ്റേ ചെയ്തുകൊണ്ടുള്ള ഹൈക്കോടതി വിധി ജനതാല്‍പര്യ വിരുദ്ധമാണെന്ന് കെ.പി.സി.സി അധ്യക്ഷന്‍ വി.എം സുധീരന്‍ അഭിപ്രായപ്പെട്ടു. മദ്യനയം നടപ്പിലാക്കേണ്ടത് സര്‍ക്കാരിന്റെ ഉത്തരവാധിത്വമാമെന്നും. അതിനായി സര്‍ക്കാര്‍ആവശ്യമായ നടപടികള്‍ സ്വീകരിക്കണമെന്നും സുധീരന്‍ കൂട്ടിച്ചേര്‍ത്തു. 250 ബാറുകള്‍ പൂട്ടിക്കൊണ്ടുള്ള സിംഗിള്‍ ബഞ്ചിന്റെ വിധിയാണ് ഹൈക്കോടതി ഡിവിഷന്‍ ബഞ്ച് സ്്‌റ്റേ ചെയ്തത്. ഇതുപ്രകാരം 250 ബാറുകള്‍ക്കും ഒരുമാസത്തേക്ക് പ്രവര്‍ത്തിക്കാം. സിംഗിള്‍ ബഞ്ചിന്റെ വിധിയെതുടര്‍ന്നുള്ള നടപടിക്രമങ്ങള്‍ സര്‍ക്കാര്‍ ആരംഭിച്ചിരുന്നു. ഈ അവസരത്തിലാണ് ഹൈക്കോടതിയുടെ വിധി. അതേ സമയം കോടതി വിധി തിരിച്ചടിയാണെന്ന് എക്‌സൈസ് മന്ത്രി കെ.ബാബു പറഞ്ഞു.