നടന്‍, സംവിധായകന്‍, ഗായകന്‍ എന്നീ നിലകളില്‍ മലയാളികള്‍ക്ക് ഏറെ പ്രിയപ്പെട്ട വ്യക്തിയാണ് വിനീത് ശ്രീനിവാസന്‍. സിനിമാപ്രേമികള്‍ക്ക് മികച്ച സിനിമകളും മികച്ച ഗാനങ്ങളും നല്‍കാന്‍ അദ്ദേഹത്തിന് സാധിച്ചിട്ടുണ്ട്. മലയാളത്തിന്റെ പ്രിയനടന്‍ ശ്രീനിവാസന്റെ മകന്‍ കൂടിയാണ് വിനീത്.

ഇപ്പോള്‍ സിനിമയിലേക്ക് തന്നെ അടുപ്പിച്ചതില്‍ അച്ഛന്റെ സ്വാധീനം വളരെ വലുതാണെന്ന് പറയുകയാണ് വിനീത്. പത്താം ക്ലാസില്‍ പഠിക്കുന്ന കാലത്തൊക്കെ സിനിമാഷൂട്ടിങ് കഴിഞ്ഞ് വീട്ടിലേക്ക് വരുമ്പോഴാണ് അച്ഛനെ തങ്ങള്‍ കണ്ടിരുന്നതെന്നാണ് അദ്ദേഹം പറയുന്നത്.

ആ സമയത്ത് വീട്ടില്‍ തങ്ങള്‍ക്ക് വലിയ ആഘോഷമായിരിക്കുമെന്നും വിനീത് പറയുന്നു. അച്ഛന്റെ സംവിധാനത്തിലും തിരക്കഥയിലും എത്തിയ പടങ്ങളില്‍ തനിക്ക് ഇഷ്ടം ഏതൊക്കെ സിനിമകളോടാണെന്നും മകന്‍ പറയുന്നുണ്ട്.

‘കുട്ടിക്കാലത്ത് കണ്ട സിനിമകളില്‍ അന്നേറെ ഇഷ്ടപ്പെട്ടത് തേന്മാവിന്‍ കൊമ്പത്ത് ആയിരുന്നു. എന്നാല്‍ വളരുന്നതിന് അനുസരിച്ച് ഓരോ തവണ കാണുമ്പോഴും ഇഷ്ടം കൂടിക്കൂടി വരുന്ന സിനിമ സന്ദേശം ആയിരുന്നു.

രാഷ്ട്രീയപ്രസക്തിയുള്ള സിനിമ എന്നതിനേക്കാള്‍ കൂടുതല്‍ സറ്റയറിക്കലായി കാര്യങ്ങള്‍ അവതരിപ്പിച്ച അവതരണ ശൈലിയാണ് എന്നെ ഏറെ ആകര്‍ഷിച്ചത്,’ വിനീത് ശ്രീനിവാസന്‍ പറയുന്നു.

പണ്ട് അച്ഛന്റെ കൂട്ടുകാര്‍ വീട്ടില്‍ വരുന്ന സമയത്ത് അദ്ദേഹം ചെയ്യാന്‍ പോകുന്ന സിനിമകളുടെ കഥ അവരോട് പറയാറുണ്ടെന്നും വിനീത് കൂട്ടിച്ചേര്‍ത്തു. അങ്ങനെ ചിന്താവിഷ്ടയായ ശ്യാമള, മറവത്തൂര്‍ കനവ് എന്നീ സിനിമകളെല്ലാം രൂപപ്പെടുന്നതിനു മുമ്പേ അതിന്റെ ആശയങ്ങള്‍ അച്ഛന്‍ സുഹൃത്തുക്കളുമായി ചര്‍ച്ചചെയ്യുന്നത് താന്‍ കേട്ടിട്ടുണ്ടെന്നും വിനീത് പറഞ്ഞു.

‘അങ്ങനെയൊരു അന്തരീക്ഷം വീട്ടില്‍ എപ്പോഴുമുണ്ടായിരുന്നു. വിദേശസിനിമകളുടെ കാസറ്റുകളുടെ വലിയൊരു ശേഖരം അച്ഛനുണ്ടായിരുന്നു. ഒരു മുറിയില്‍ വലിയ പുസ്തകശേഖരവും.

അച്ഛനില്ലാത്ത സമയത്ത് ആ സിനിമകളൊക്കെ കാണുകയും പുസ്തകങ്ങള്‍ വായിക്കുകയും ചെയ്യും. അതെല്ലാം ജീവിതത്തെ സ്വാധീനിച്ച ഘടകങ്ങളാണ്,’ വിനീത് ശ്രീനിവാസന്‍ പറയുന്നു.

Content Highlight: Vineeth Sreenivasan Talks About His Fav Sreenivasan Films