വെനസ്വേലയ്ക്കെതിരായ സൈനിക നടപടികള് അമേരിക്ക വര്ധിപ്പിച്ച സാഹചര്യത്തിലാണ് നടപടി. വെള്ളിയാഴ്ച പുറപ്പെടുവിച്ച NOTAM (വൈമാനികര്ക്ക് നല്കുന്ന മുന്നറിയിപ്പ്) മുന്നറിയിപ്പില് സുരക്ഷാ സാഹചര്യം നിലവില് മോശമാണെന്നും വെനസ്വേലയുടെ പരിസരത്ത് സൈനിക പ്രവര്ത്തനം വര്ധിപ്പിച്ചിരിക്കുകയാണെന്നും പറയുന്നു.
വെനസ്വേലന് വ്യോമാതിര്ത്തിയിലൂടെ പറക്കുന്നതിന് മുമ്പ് യു.എസ് ഫ്ളൈറ്റ് ഓപ്പറേറ്റര്മാര് എഫ്.എ.എയ്ക്ക് 72 മണിക്കൂര് മുമ്പ് അറിയിപ്പ് നല്കണമെന്ന് ഫ്ളൈറ്റ് ട്രാക്കിങ് വെബ്സൈറ്റ് ഫ്ളൈറ്റ് റഡാര്24 അറിയിച്ചു.
യു.എസ്, ലാറ്റിനമേരിക്കന് മയക്കുമരുന്നുകടത്തുകാര്ക്കെതിരായ സൈനിക നടപടിയെന്ന പേരില് മേഖലയില് വിമാനവാഹിനി കപ്പലും ആയിരക്കണക്കിന് സൈനികരെ വഹിക്കുന്ന യുദ്ധക്കപ്പലുകളും എഫ്-35 സ്റ്റെല്ത്ത് വിമാനങ്ങളും വിന്യസിച്ച സാഹചര്യത്തിലാണ് എഫ്.എ.എയുടെ മുന്നറിയിപ്പ്.
അതേസമയം, വെനസ്വേലയുടെ മുകളിലൂടെ പറക്കുന്നതിന് വിമാനങ്ങള്ക്ക് നിലവില് വിലക്ക് ഏര്പ്പെടുത്തിയിട്ടില്ല. എങ്കിലും വിമാനങ്ങള്ക്ക് മുന്നില് അപകട സാധ്യത നിലനില്ക്കുന്നുണ്ടെന്ന് എഫ്.എ.എ പറഞ്ഞു.
എഫ്.എ.എയുടെ മുന്നറിയിപ്പിനോട് ഡെല്റ്റ എയര്ലൈന്സും യുണൈറ്റഡ് എയര്ലൈന്സും പ്രതികരിച്ചിട്ടില്ല. എന്നാല് ഒക്ടോബര് മുതല് തന്നെ വെനസ്വേലയ്ക്ക് മുകളിലൂടെ പറക്കാറില്ലെന്ന് അമേരിക്കന് എയര്ലൈന്സ് പ്രതികരിച്ചു.
അതേസമയം, തന്നെ അധികാരത്തില് നിന്നും പുറത്താക്കാന് യു.എസ് സൈനികമായി ശ്രമങ്ങള് നടത്തിയേക്കാമെന്ന മുന്നറിയിപ്പുമായി വെനസ്വേലന് പ്രസിഡന്റ് നിക്കോളാസ് മഡൂറോയും രംഗത്തെത്തി.
Content Highlight: Military action is increasing; US planes flying over Venezuela are warned
