കെയ്റോ: ഈജിപ്ഷ്യൻ തലസ്ഥാനമായ കെയ്റോയിലെ പ്രധാന റെയിൽവെ സ്റ്റേഷനിലുണ്ടായ തീപിടിത്തത്തിൽ 25 പേർ മരിച്ചു. അഗ്നിബാധയിൽ 50 പേർക്ക് പരിക്കേൽക്കുകയും ചെയ്തു. സെൻട്രൽ റാംസസ് സ്റ്റേഷനിലെ കോൺക്രീറ്റ് ബഫർ സ്റ്റോപ്പിൽ ട്രെയിൻ ഇടിച്ചുകയറിയാണ് അപകടമുണ്ടായത്. അപകടം നടക്കുമ്പോൾ നിരവധി പേർ അടുത്ത ട്രെയിനിനായി കാത്തു നിൽക്കുകയായിരുന്നു.
സ്റ്റേഷനിലെ ഒരു പ്ലാറ്റ്ഫോമിനടുത്തായി കത്തിക്കരിഞ്ഞ് ഒരു വശത്തേക്ക് ചെരിഞ്ഞ നിലയിലാണ് ട്രെയിൻ കിടക്കുന്നത്. ട്രെയിൻസ്റ്റേഷനിൽ ഉണ്ടായ തീപിടുത്തത്തിൽ കറുത്ത, കട്ടിപ്പുക ഏറെ നേരം ആകാശത്തേക്ക് ഉയരുന്നതും കാണാമായിരുന്നു.
ഇടിയുടെ ആഘാതത്തിൽ ട്രെയിന്റെ ഇന്ധന ടാങ്ക് പൊട്ടിത്തെറിച്ച് തീപിടിത്തമുണ്ടാകുകയായിരുന്നു. പ്ലാറ്റ്ഫോമും സമീപത്തെ കെട്ടിടങ്ങളും തീപിടുത്തത്തിൽ കത്തിനശിച്ചു. സംഭവസ്ഥലം ഈജിപ്ത് പ്രധാനമന്ത്രി മോസ്താഫ മദ്ബൗലി സന്ദർശിച്ചു. കുറ്റക്കാർക്കെതിരെ ശക്തമായ നടപടി സ്വീകരിക്കുമെന്ന് അദ്ദേഹം അറിയിച്ചു.
Also Read ഹൈക്കമ്മീഷണര്മാരെ ഇന്ത്യയും പാകിസ്ഥാനും വിളിച്ചുവരുത്തി
ഈജിപ്ത്തിലെ ഭൂരിഭാഗം റെയിൽവേ സ്റ്റേഷനുകളും ഏറെ പഴക്കം ചെന്നതും പുനരുദ്ധാരണം ആവശ്യപ്പെടുന്നതുമാണ്. തുടരെ തുടരെ വന്ന സർക്കാരുകളോട് ഈജിപ്ഷ്യൻ ജനത ഇക്കാര്യം പലതവണ സൂചിപ്പിച്ചിരുന്നുവെങ്കിലും കാര്യമായ നടപടികൾ ഉണ്ടായില്ല.