മുംബൈയില്‍ നിന്ന് ഹാംഷെയറിലേക്ക് തിലക്, സച്ചിന്‍ കളിച്ച ടീമിലേക്ക് ഗെയ്ക്വാദ്; കരിയര്‍ വ്യാപിപ്പിച്ച് ഇന്ത്യന്‍ യുവരക്തങ്ങള്‍

ഇംഗ്ലീഷ് കൗണ്ടി ക്രിക്കറ്റിലും പ്രതിഭ വ്യക്തമാക്കാന്‍ ഇന്ത്യന്‍ യുവതാരം തിലക് വര്‍മ. ഇംഗ്ലീഷ് കൗണ്ടി ചാമ്പ്യന്‍ഷിപ്പില്‍ ഹാംഷെയറിന് വേണ്ടിയാണ് തിലക് കളത്തിലിറങ്ങുന്നത്. ടീമിന് വേണ്ടി അടുത്ത നാല് മത്സരങ്ങളില്‍ തിലക് കളത്തിലിറങ്ങും.

ഇന്ത്യന്‍ ഡൊമസ്റ്റിക് സര്‍ക്യൂട്ടുകളില്‍ തിളങ്ങിയ തിലക് വര്‍മ ഇംഗ്ലണ്ട് മണ്ണിലും ആ പ്രകടനം ആവര്‍ത്തിക്കാനൊരുങ്ങുകയാണ്. അജിന്‍ക്യ രഹാനെയും ചേതേശ്വര്‍ പൂജാരയും അടക്കമുള്ള താരങ്ങളുടെ പാത പിന്തുടര്‍ന്നാണ് തിലക് കൗണ്ടി ക്രിക്കറ്റ് കളിക്കാനൊരുങ്ങുന്നത്.

തിലക് വര്‍മ ഹാംഷെയറിനായി കളത്തിലിറങ്ങുന്നതില്‍ ഏറെ സന്തോഷമുണ്ടെന്ന് ക്ലബ്ബ് ഡയറക്ടര്‍ ഗില്‍സ് വൈറ്റ് പറഞ്ഞു.

‘തിലക് ഏറെ കഴിവുള്ള ക്രിക്കറ്റ് താരമാണ്. അന്താരാഷ്ട്ര തലത്തിലും ഐ.പി.എല്ലിലും തിലക് ഇതിനോടകം തന്നെ തരംഗം സൃഷ്ടിച്ചുകഴിഞ്ഞു. ഹാംഷെയര്‍ ക്രിക്കറ്റിനായി തിലകിന്റെ പ്രകടനം കാണാന്‍ കാത്തിരിക്കുകയാണ്,’ വൈറ്റ് പറഞ്ഞു.

അതേസമയം, കൗണ്ടി ചാമ്പ്യന്‍ഷിപ്പ് ഡിവിഷന്‍ വണ്ണില്‍ ഏഴാം സ്ഥാനത്താണ് ഹാംഷെയര്‍. ഏഴ് മത്സരത്തില്‍ നിന്നും രണ്ട് ജയവും രണ്ട് തോല്‍വിയുമായി 82 പോയിന്റാണ് ടീമിനുള്ളത്. ഏഴ് മത്സരത്തില്‍ നിന്നും 59 പോയിന്റുമായി ഒമ്പതാം സ്ഥാനത്താണ് യോര്‍ക്‌ഷെയര്‍.

കൗണ്ടി ചാമ്പ്യന്‍ഷിപ്പില്‍ ഞായറാഴ്ചയാണ് ഹാംഷെയറിന്റെ അടുത്ത മത്സരം. ചെംസ്‌ഫോര്‍ഡില്‍ നടക്കുന്ന മത്സരത്തില്‍ എസെക്‌സാണ് എതിരാളികള്‍. അതേസമയം, ടി-20 ബ്ലാസ്റ്റില്‍ നാളെ നടക്കുന്ന മത്സരത്തില്‍ ഹാംഷെയര്‍ ഹോക്‌സ് സോമര്‍സെറ്റിനെയും നേരിടും.

Content Highlight: Tilak Varma joins Hampshire for county cricket