ചെന്നൈ: തമിഴ്നാട് നിയമസഭയില് വിശ്വാസ വോട്ടെടുപ്പില് വിജയിച്ച് മുഖ്യമന്ത്രി വിജയ്യുടെ നേതൃത്വത്തിലുള്ള ടി.വി.കെ സര്ക്കാര്. 234 അംഗ നിയമസഭയില് 144 എം.എല്.എമാര് വിജയ്ക്ക് അനുകൂലമായി വോട്ട് ചെയ്തു. 118 അംഗങ്ങളുടെ പിന്തുണയായിരുന്നു സര്ക്കാര് രൂപീകരണത്തിന് വേണ്ടിയിരുന്നത്. ഇത് അനായാസമായി മറികടക്കാന് വിജയ്ക്ക് സാധിച്ചു.
വിശ്വാസവോട്ടെടുപ്പില് 22 അംഗങ്ങള് ടി.വി.കെയ്ക്കെതിരെ വോട്ട് രേഖപ്പെടുത്തി. അഞ്ച് പേര് വിട്ടു നിന്നു. വിജയ്ക്ക് അനുകൂലമായി വോട്ട് ചെയ്തവരില് എസ്.പി. വേലുമണിയുടെ നേതൃത്വത്തിലുള്ള 25 എ.ഐ.എ.ഡി.എം.കെ വിമതരും ഉള്പ്പെടുന്നു. എ.എം.എം.കെയില് നിന്ന് പുറത്താക്കപ്പെട്ട എം.എല്.എ എസ്. കാമരാജും വിജയ്ക്ക് അനുകൂലമായി വോട്ട് ചെയ്തു. പാര്ട്ടി വിരുദ്ധ പ്രവര്ത്തനം നടത്തിയെന്ന് പറഞ്ഞായിരുന്നു കാമരാജിനെ എ.എം.എം.കെ പുറത്താക്കിയത്.
ടി.വി.കെയ്ക്ക് നേരത്തെ തന്നെ പിന്തുണ പ്രഖ്യാപിച്ച കോണ്ഗ്രസ്, സി.പി.ഐ.എം, സി.പി.ഐ, മുസ്ലീം ലീഗ്, വി.സി.കെ കക്ഷികളുടെ അംഗങ്ങള് വിജയ്ക്ക് വോട്ട് ചെയ്തു. എ.ഐ.എ.ഡി.എം.കെ എടപ്പാടി പളനി സ്വാമി വിഭാഗത്തിന്റെ 22 എം.എല്.എമാരാണ് സര്ക്കാരിനെ എതിര്ത്ത് വോട്ട് ചെയ്തത്. നാല് പി.എം.കെ എം.എല്.എമാരും ഒരു ബി.ജെ.പി എം.എല്.എയുമാണ് വിശ്വാസ വോട്ടില് നിന്ന് വിട്ടുനിന്നത്. ഡി.എം.കെ, ഡി.എം.ഡി.കെ അംഗങ്ങള് നേരത്തെ സഭയില് നിന്ന് വാക്ക്ഔട്ട് നടത്തിയിരുന്നു.
സര്ക്കാരിനെ പിന്തുണച്ച എം.എല്.എമാര്
- ടി.വി.കെ – 105
- കോണ്ഗ്രസ് – 5
- സി.പി.ഐ – 2
- സി.പി.ഐ (എം) – 2
- വി.സി.കെ – 2
- മുസ്ലീം ലീഗ് – 2
- എ.ഐ.എ.ഡി.എം.കെ വിമതര് – 25
- പുറത്താക്കപ്പെട്ട എ.എം.എം.കെ എം.എല്.എ – 1
സര്ക്കാരിനെ എതിര്ത്ത എം.എല്.എമാര്
- എ.ഐ.എ.ഡി.എം.കെ എടപ്പാടി പളനിസ്വാമി വിഭാഗം -22
വിശ്വാസ പ്രമേയത്തില് നിന്ന് വിട്ടുനിന്ന എം.എല്.എമാര്
- പി.എം.കെ – 4
- ബി.ജെ.പി – 1
