സംവിധായകന്‍ അല്‍ഫോണ്‍സ് പുത്രന്‍ മലയാളത്തിന് സമ്മാനിച്ച നടന്‍മാരില് ഒരാളാണ് ഷറഫുദ്ദീന്‍. കരിയറിന്റെ തുടക്കത്തില്‍ ഹാസ്യ നടനായും പിന്നീട് നായകനായും വില്ലനായും അഭിനയിച്ച നടന്‍ കൂടിയാണ് അദ്ദേഹം.

2019ല്‍ എ.കെ. സാജന്‍ രചനയും സംവിധാനവും നിര്‍വഹിച്ച് എത്തിയ നീയും ഞാനും എന്ന സിനിമയില്‍ നായകനായത് ഷറഫുദ്ദീനായിരുന്നു. ഒപ്പം അനു സിത്താര, സിജു വില്‍സണ്‍ എന്നിവരും പ്രധാനവേഷത്തില്‍ എത്തിയിരുന്നു.

ഈ സിനിമ തനിക്ക് എന്നും പ്രിയപ്പെട്ട ഒന്നാണെന്ന് പറയുകയാണ് ഷറഫുദ്ദീന്‍. സിജുവിനെ ആയിരുന്നു ചിത്രത്തില്‍ സംവിധായകന്‍ സാജന്‍ ആദ്യം നായകനാക്കിയിരുന്നതെന്നും എന്നാല്‍ ഷൂട്ടിങ്ങിനിടയില്‍ ഇംപ്രൊവൈസേഷന്‍ നടത്തി തന്റെ കഥാപാത്രത്തെ മറ്റൊരു തലത്തിലേക്ക് എത്തിച്ചുവെന്നും നടന്‍ പറയുന്നു.

‘ഒന്നുരണ്ട് പാട്ട് സീനൊക്കെ ഷൂട്ട് ചെയ്തപ്പോഴാണ് ഞാനാണ് ഈ സിനിമയിലെ നായകനെന്ന് തന്നെ മനസിലായത്. ആ സമയത്ത് മുംബൈയില്‍ ആയിരുന്ന സിജുവിനെ വിളിച്ച് ഞാന്‍ നിനക്ക് പാട്ട് സീനൊന്നുമില്ലേയെന്ന് ചോദിച്ച് കളിയാക്കിയിരുന്നു.

പക്ഷേ ആ സമയത്തും അവന്‍ പറഞ്ഞത് ഈ സിനിമയും അതിലെ യാക്കൂബ് മുഹമ്മദ് എന്ന കഥാപാത്രവും എനിക്ക് ഏറെ ഗുണം ചെയ്യുമെന്നായിരുന്നു. നല്ല കൂട്ടുകാരുടെ തണല്‍ എന്താണെന്ന് കൂടി മനസിലാക്കുന്ന സിനിമയായിരുന്നു അത്,’ ഷറഫുദ്ദീന്‍ പറഞ്ഞു.

ഒരുപാട് മികച്ച കലാകാരന്‍മാര്‍ ഉള്ള ഇടമാണ് മലയാളസിനിമ എന്നാണ് നടന്‍ പറയുന്നത്. അതുകൊണ്ട് തന്നെ സ്വാഭാവികമായും സിനിമകളും കഥാപാത്രങ്ങളും വീതം വെച്ചു പോകുന്നുണ്ടെന്നും അതിനിടയിലും മികച്ച കുറേ കഥാപാത്രങ്ങള്‍ ലഭിച്ചത് മഹാഭാഗ്യമാണെന്നും അദ്ദേഹം കൂട്ടിച്ചേര്‍ത്തു.

Content Highlight: Sharafudheen Talks About Neeyum Njanum Movie