കാസര്ഗോഡ്: കുമ്പള ഹയര്സെക്കന്ററി സ്കൂള് കലോത്സവത്തിനിടെ അധ്യാപകര് നിര്ത്തിവെപ്പിച്ച ഫലസ്തീന് ഐക്യദാര്ഢ്യ മൈം അതേ വേദിയില് വീണ്ടും അവതരിപ്പിച്ചു.
പ്ലസ്ടു ക്ലാസിലെ ആറ് വിദ്യാര്ത്ഥികളാണ് മൈം അവതരിപ്പിച്ചത്. കളക്ടര് ഉള്പ്പെടെയുള്ളവരുടെ നേതൃത്വത്തിലായിരുന്നു മൈം അവതരണം.
കഴിഞ്ഞ വെള്ളിയാഴ്ചയാണ് കാസര്ഗോഡ് കുമ്പള ഹയര്സെക്കന്ററി സ്കൂളില് വിദ്യാര്ത്ഥികള് ഫലസ്തീന് ഐക്യദാര്ഢ്യമറിയിച്ചുകൊണ്ടുള്ള മൈം അവതരിപ്പിച്ചത്. മൈം തുടങ്ങി ഏതാനും നിമിഷങ്ങള്ക്കകം തന്നെ ചില അധ്യാപകര് വേദിയിലേക്ക് കയറി കര്ട്ടനിട്ട് പരിപാടി നിര്ത്തിവെപ്പിക്കുകയായിരുന്നു.
ഇതോടെ പ്രതിഷേധവുമായി രംഗത്തെത്തിയ വിദ്യാര്ത്ഥികളും അധ്യാപകരും തമ്മില് വാക്കേറ്റവുമുണ്ടായി. ഈ തര്ക്കത്തെ തുടര്ന്ന് കലോത്സവം നിര്ത്തിവെക്കുകയായിരുന്നു.
സംഭവത്തില് പ്രതിഷേധിച്ച് എസ്.എഫ്.ഐ അടക്കമുള്ള വിദ്യാര്ത്ഥി സംഘടനകള് സ്കൂളിലേക്ക് മാര്ച്ച് നടത്തിയിരുന്നു. കേരളം എന്നും ഫലസ്തീനൊപ്പമാണെന്നും വിദ്യാര്ത്ഥികള്ക്ക് ഇതേ വേദിയില് പരിപാടി അവതരിപ്പിക്കാന് അവസരമൊരുക്കുമെന്നും വിദ്യാഭ്യാസ മന്ത്രി വി. ശിവന്കുട്ടി ഉറപ്പുനല്കിയിരുന്നു. ഇതാണ് ഇപ്പോള് പാലിക്കപ്പെട്ടിരിക്കുന്നത്.
തിങ്കളാഴ്ച സ്കൂളിലെ വേദിയില് വെച്ച് വിദ്യാര്ത്ഥികള് നിറഞ്ഞസദസിന് മുന്നില് പരിപാടി അവതരിപ്പിച്ചു. ഹയര്സെക്കന്ററി വിഭാഗം മൂകാഭിനയ(മൈം)ത്തിലായിരുന്നു പ്ലസ്ടു ക്ലാസിലെ ആറ് വിദ്യാര്ത്ഥികളുടെ ഈ മൈം അവതരിപ്പിച്ചത്.
