ഓസ്ലോ: സമാധാനത്തിനുള്ള നോബേല് പുരസ്കാരം വെനസ്വേലന് പ്രതിപക്ഷ നേതാവും രാഷ്ട്രീയ പ്രവര്ത്തകയുമായ മരിയ കൊറീന മച്ചാഡോയ്ക്ക്. നൊബേല് പുരസ്കാരം നേടുന്ന ഇരുപതാമത്തെ വനിതയാണ് മരിയ.
സ്വേച്ഛാധിപത്യത്തിന് എതിരായ പതിറ്റാണ്ടുകളുടെ പോരാട്ടമാണ് മരിയയെ പുരസ്കാരത്തിന് അര്ഹയായത്. വെനസ്വലയെ വെടിയുണ്ടയില് നിന്നും ബാലറ്റിലേക്ക് നയിച്ചു. ജനാധിപത്യത്തിന്റെ നിര്ഭയമായ പ്രതിരോധത്തിനും ധീരമായ പോരാട്ടത്തിനും വേണ്ടി നിലനിന്നതിനാണ് പുരസ്കാരമെന്നും നൊബേല് പുരസ്കാര സമിതി പ്രഖ്യാപിച്ചു.
അതേസമയം, നിക്കോളാസ് മഡുറോയുടെ ഇടതുപക്ഷ സര്ക്കാരിന് എതിരെ നിലകൊള്ളുകയും അവിടെ ‘ജനാധിപത്യത്തിന്’ വേണ്ടി വാദിക്കുകയും ചെയ്തുവെന്നതാണ് മരിയയെ പുരസ്കാരത്തിന് അര്ഹയാക്കിയതെന്ന വാദം ശക്തമായിരിക്കുകയാണ്.
വെനസ്വേലയിലെ ഇടതുപക്ഷ സര്ക്കാരിനെതിരെ യു.എസ് സര്ക്കാരും പാശ്ചാത്യശക്തികളും മുതലാളിത്ത ശക്തികളും എതിര്പ്പുയര്ത്തുന്ന സാഹചര്യത്തില്, പ്രതിപക്ഷ നേതാവിന് നൊബേല് പുരസ്കാരം നല്കിയതാണ് വിവാദത്തിലായിരിക്കുന്നത്.
വെനസ്വേലയിലെ മഡുറോ സര്ക്കാര് ജനാധിപത്യ വിരുദ്ധമാണെന്നും എല്ലാ അവകാശങ്ങളെയും ധ്വംസിക്കുകയാണെന്നും പ്രതിപക്ഷമാണ് യാഥാര്ത്ഥ മനുഷ്യാവകാശത്തിന് വേണ്ടി നിലകൊള്ളുന്നതെന്ന് വാദിക്കുകയും ചെയ്തിരുന്നു.
