കല്‍പ്പറ്റ: കള്ളാടിയിലുണ്ടായ മണ്ണിടിച്ചിലിന്റെ പശ്ചാത്തലത്തില്‍, രാഷ്ട്രീയ സംവാദങ്ങള്‍ക്കോ പരസ്പരം ചെളിവാരിയെറിയാനോ നിലവിലെ സാഹചര്യത്തില്‍ താനില്ലെന്ന് മന്ത്രി ടി. സിദ്ദിഖ്. മാധ്യമങ്ങളോട് സംസാരിക്കവെയാണ് അദ്ദേഹം ഇക്കാര്യം പറഞ്ഞത്.

കാണാതായ അഞ്ചുപേരെ കണ്ടെത്തുക എന്ന ദൗത്യത്തിനാണ് ഇപ്പോള്‍ സര്‍ക്കാര്‍ മുന്‍ഗണന നല്‍കുന്നതെന്നും മന്ത്രി കൂട്ടിച്ചേര്‍ത്തു.

‘ഇന്നലത്തെ തുടര്‍ച്ചയായ പ്രവര്‍ത്തനങ്ങള്‍ക്കൊടുവില്‍ റോഡ് പൂര്‍ണമായും ഗതാഗതയോഗ്യമാക്കിയിട്ടുണ്ട്. പ്രദേശം വിവിധ സോണുകളായി തിരിച്ച്, എന്‍.ഡി.ആര്‍.എഫ് ഉദ്യോഗസ്ഥരെ ഉള്‍പ്പെടെ വിന്യസിക്കാനുള്ള നടപടികള്‍ ആരംഭിച്ചു. ആവശ്യമായ ഉപകരണങ്ങള്‍ സംഭവസ്ഥലത്ത് എത്തിക്കാന്‍ ഇന്നലെത്തന്നെ നിര്‍ദേശം നല്‍കിയിരുന്നു.

രക്ഷാപ്രവര്‍ത്തനങ്ങള്‍ക്ക് തടസമുണ്ടാകാതിരിക്കാന്‍ പൊതുജനങ്ങള്‍ സ്ഥലത്തേക്ക് വരുന്നത് നിയന്ത്രിക്കണമെന്ന് പൊലീസും എന്‍.ഡി.ആര്‍.എഫും ആവശ്യപ്പെട്ടിട്ടുണ്ട്. ഇതിന്റെ അടിസ്ഥാനത്തില്‍ കര്‍ശന നിയന്ത്രണം ഏര്‍പ്പെടുത്തും,’ മന്ത്രി വ്യക്തമാക്കി.

ഇന്നലെ രാത്രി 12 മണിയോടെ വൈത്തിരി താലൂക്ക് ആശുപത്രി സന്ദര്‍ശിച്ച് വയനാടിന്റെ ചുമതലക്കാരന്‍ കൂടിയായ മന്ത്രി സ്ഥിതിഗതികള്‍ വിലയിരുത്തിയിരുന്നു. രാത്രി ഒരു മണിയോടെ മൃതദേഹങ്ങള്‍ മെഡിക്കല്‍ കോളേജ് ആശുപത്രിയിലേക്ക് മാറ്റി.

ഇന്ന് രാവിലെയോടെ മൃതദേഹങ്ങള്‍ എംബാം ചെയ്യുന്ന പ്രവര്‍ത്തനങ്ങള്‍ ആരംഭിക്കും. വൈകുന്നേരത്തോടുകൂടി മുഴുവന്‍ മൃതദേഹങ്ങളും നാട്ടിലെത്തിക്കാനുള്ള നടപടികള്‍ പൂര്‍ത്തിയാകുമെന്നും അദ്ദേഹം വ്യക്തമാക്കി.

കാണാതായ അഞ്ചുപേരെ കണ്ടെത്തുക എന്ന ദൗത്യത്തിലാണ് ഇപ്പോള്‍ പ്രത്യേക ശ്രദ്ധ പതിപ്പിച്ചിരിക്കുന്നത്. ഈ അപകടത്തില്‍ നാട്ടുകാരോ വിനോദസഞ്ചാരികളോ പെട്ടിട്ടില്ലെന്ന് ഉറപ്പിക്കാന്‍ കഴിഞ്ഞിട്ടുണ്ടെന്ന് മന്ത്രി പറഞ്ഞു. ഇവരെക്കുറിച്ച് യാതൊരു പരാതിയും നിലവില്‍ ലഭിച്ചിട്ടില്ല. ഇന്നലെത്തന്നെ മസ്റ്റര്‍ റോള്‍ പരിശോധിച്ച് ഇക്കാര്യം ഉറപ്പുവരുത്തിയിരുന്നു. അതിനാല്‍, കാണാതായവര്‍ കൊങ്കണ്‍ തൊഴിലാളികളാണെന്ന നിഗമനത്തിലാണ് അധികൃതര്‍.

‘എല്ലാം പെര്‍ഫെക്റ്റ് ആണെന്ന് പറഞ്ഞ് നിര്‍മാണ കമ്പനിക്ക് ഈ ഘട്ടത്തില്‍ ഒഴിഞ്ഞുമാറാനാകില്ല. കനത്ത മഴയാണ് കാരണമെന്ന് കമ്പനി അധികൃതര്‍ പറയുന്നുണ്ടെങ്കിലും, അവിടെ എക്‌സ്റ്റേണല്‍ ശക്തികള്‍ക്കൊപ്പം കോണ്‍ക്രീറ്റ് പേസ്റ്റിങ് ഉള്‍പ്പെടെയുള്ള ഇന്റേണല്‍ ഫോഴ്‌സും വര്‍ക്ക് ചെയ്തിട്ടുണ്ട്. സോയില്‍ പൈപ്പിങ് ഉണ്ടായോ, നിര്‍മാണ കമ്പനി ഗൈഡ്‌ലൈനുകള്‍ കൃത്യമായി പാലിച്ചോ എന്നതെല്ലാം ശാസ്ത്രീയ പരിശോധനയിലൂടെയേ വ്യക്തമാകൂ,’ ടി. സിദ്ദിഖ് കൂട്ടിച്ചേര്‍ത്തു.

മണ്‍കൂനകള്‍ മാറ്റാത്തതാണ് ആഘാതം കൂട്ടിയതെന്ന ആരോപണവും, പരിസ്ഥിതിലോല മേഖലയായ ഇവിടെ തുരങ്കപാതയ്ക്ക് അനുമതി നല്‍കിയതിലെ പിഴവുകളും ഇപ്പോള്‍ ചര്‍ച്ചയാക്കേണ്ടതില്ലെന്ന് മന്ത്രി പറഞ്ഞു.

മുഖ്യമന്ത്രി എത്തിയ ശേഷം ബാക്കി കാര്യങ്ങള്‍ കൂടിയാലോചിച്ച് ശാസ്ത്രീയ പരിശോധനകള്‍ ഉള്‍പ്പെടെയുള്ള തുടര്‍നടപടികളിലേക്ക് കടക്കുമെന്നും മന്ത്രി അറിയിച്ചു. രക്ഷാപ്രവര്‍ത്തനം റിപ്പോര്‍ട്ട് ചെയ്യുന്നതില്‍ മാധ്യമങ്ങള്‍ക്ക് ഏര്‍പ്പെടുത്തിയ നിയന്ത്രണങ്ങളില്‍ ഇടപെടാമെന്നും അദ്ദേഹം ഉറപ്പുനല്‍കി.

Content Highlight: “No interest in mudslinging”; Minister T. Siddique states that the priority is the search for the five missing persons.