![?php echo $post['title']; ?>](https://assets.doolnews.com/w/900x473/2026/09/tanvir.jpg)
ന്യൂസിലാന്‍ഡ് പരമ്പരയ്ക്ക് മുന്നോടിയായി ഇന്ത്യന്‍ ടോപ്പ് ഓര്‍ഡര്‍ ബാറ്റര്‍മാരായ സഞ്ജു സാംസണ്‍, അഭിഷേക് ശര്‍മ, ഇഷാന്‍ കിഷന്‍ എന്നീ താരങ്ങള്‍ക്ക് മുന്നറിയിപ്പുമായി മുന്‍ പാകിസ്ഥാന്‍ താരം തന്‍വീര്‍ അഹ്‌മദ്.
ഇന്ത്യയിലെ ബാറ്റിങ്ങിന് അനുകൂലമായ ഫ്‌ളാറ്റ് പിച്ചുകളില്‍ കളിക്കുന്ന താരങ്ങള്‍ക്ക് ന്യൂസിലാന്‍ഡിലെ സാഹചര്യങ്ങള്‍ വെല്ലുവിളിയായിരിക്കുമെന്നും അതിനാല്‍ അവര്‍ എങ്ങനെ റണ്‍സ് നേടുമെന്നും റെക്കോഡുകള്‍ സ്വന്തമാക്കുമെന്നും കാണാമെന്നും മുന്‍ പാക് താരം പറഞ്ഞു.
‘ഇന്ത്യന്‍ ബാറ്റര്‍മാരായ അഭിഷേക് ശര്‍മ, സഞ്ജു സാംസണ്‍, ഇഷാന്‍ കിഷന്‍ എന്നിവര്‍ ഇന്ത്യയിലെ ബാറ്റിങ്ങിന് അനുകൂലമായ ഫ്‌ളാറ്റ് പിച്ചുകളില്‍ കളിച്ച് ഏറെ പരിചയസമ്പന്നരായവരാണ്. അവര്‍ അനായാസം റണ്‍സ് അടിച്ചുകൂട്ടുകയും പല റെക്കോഡുകളും തകര്‍ക്കുകയും ചെയ്യുന്നു. എന്നാല്‍ ന്യൂസിലാന്‍ഡില്‍ അവര്‍ എങ്ങനെ ബുദ്ധിമുട്ടുമെന്ന് ഇനി കണ്ടറിയാം.
അവിടുത്തെ സാഹചര്യങ്ങള്‍ അവര്‍ക്ക് തികച്ചും വ്യത്യസ്തമായ വെല്ലുവിളിയായിരിക്കും. ന്യൂസിലാന്‍ഡിലെ പിച്ചുകളിലെ വേഗത്തെയും ബൗണ്‍സിനെയും നേരിടാന്‍ അവര്‍ക്ക് ഉത്തരം കണ്ടെത്താനാകാതെ വരും. ഇന്ത്യയിലെ പിച്ചുകളില്‍ നിന്ന് തികച്ചും വ്യത്യസ്തമായ സാഹചര്യങ്ങളില്‍ കളിക്കുന്നതുകൊണ്ട് അവിടുത്തെ സാഹചര്യങ്ങളുമായി പെട്ടന്ന് പൊരുത്തപ്പെടാന്‍ അവര്‍ക്ക് കഴിയില്ല.
ഇനി അവര്‍ എങ്ങനെയാണ് റണ്‍സ് നേടുന്നതെന്നും റെക്കോഡുകള്‍ തകര്‍ക്കുന്നതെന്നും നമുക്ക് കാണാം. അധികം വൈകാതെ തന്നെ അവരുടെ യഥാര്‍ത്ഥ മികവ് പുറത്തുവരും. അവരുടെ പരിമിതികള്‍ വെളിപ്പെടാനും സാധ്യതയുണ്ട്,’ മുന്‍ പാക് താരം തന്‍വീര്‍ അഹമ്മദ് യൂട്യൂബ് ചാനലിലെ ചര്‍ച്ചയില്‍ പറഞ്ഞു.
അതേസമയം വെസ്റ്റ് ഇന്‍ഡീസിനെതിരായ ടി-20 പരമ്പര സമനിലയില്‍ അവസാനിച്ചെങ്കിലും ന്യൂസിലാന്‍ഡില്‍ പരമ്പര വിജയിക്കാനാകും എന്ന പ്രതീക്ഷയിലാണ് ഇന്ത്യ. ഇന്ത്യയുടെ ടോപ് ഓര്‍ഡര്‍ ബാറ്റര്‍മാര്‍ ഫോമിലാണെന്നുള്ളത് ഇന്ത്യയുടെ പ്രതീക്ഷ നിലനിര്‍ത്തുന്നുണ്ട്. ഒക്ടോബര്‍ 22നാണ് അഞ്ച് ടി-20 മത്സരങ്ങള്‍ അടങ്ങുന്ന പരമ്പരയിലെ ആദ്യ മത്സരം.
ഇന്ത്യ സ്‌ക്വാഡ്
ശ്രേയസ് അയ്യര്‍ (ക്യാപ്റ്റന്‍), അഭിഷേക് ശര്‍മ, സഞ്ജു സാംസണ്‍ (വിക്കറ്റ് കീപ്പര്‍), ഇഷാന്‍ കിഷന്‍ (വിക്കറ്റ് കീപ്പര്‍), വൈഭവ് സൂര്യവംശി, തിലക് വര്‍മ (വൈസ് ക്യാപ്റ്റന്‍), അക്‌സര്‍ പട്ടേല്‍, ശിവം ദുബെ, നിതീഷ് കുമാര്‍ റെഡ്ഡി, നമന്‍ ധിര്‍, മായങ്ക് യാദവ്, പ്രിന്‍സ് യാദവ്, അര്‍ഷ്ദീപ് സിങ്, ഭുവനേശ്വര്‍ കുമാര്‍, വരുണ്‍ ചക്രവര്‍ത്തി, കുല്‍ദീപ് യാദവ്.
Content Highlight: India VS New Zealand: Former Pak Player Warns Indian Batters
