തൃശൂര്: നാട്ടിക എം.എല്.എ സി.സി. മുകുന്ദന്റെ വരുമാനം സംബന്ധിച്ച് സമൂഹമാധ്യമങ്ങളില് പോസ്റ്റ് പങ്കുവെച്ച കോണ്ഗ്രസ് നേതാവ് സന്ദീപ് വാര്യരെ വിമര്ശിച്ച് എം.എല്.എയുടെ മുന് പേഴ്സണല് അസിസ്റ്റന്റ് അസ്ഹര് മജീദ്. കള്ളക്കണക്ക് നിരത്തി ജനങ്ങളെ തെറ്റിദ്ധരിപ്പിക്കുന്ന സന്ദീപ് വാര്യരുടെ സര്ട്ടിഫിക്കറ്റ് എം.എല്.എയ്ക്ക് വേണ്ട എന്നാണ് അസ്ഹര് മജീദ് പറയുന്നത്.
ദിവസങ്ങള്ക്ക് മുമ്പ് ചോര്ന്നൊലിച്ച വീട്ടില് കെട്ടിനിന്ന വെള്ളത്തില് തെന്നിവീണ് എം.എല്.എയ്ക്ക് പരിക്കേറ്റിരുന്നു. കാലപ്പഴക്കമുള്ള അദ്ദേഹത്തിന്റെ വീട് ജപ്തി ഭീഷണിയിലാണ്. പത്ത് വര്ഷം മുമ്പ് ബാങ്കില് നിന്നും ആറ് ലക്ഷം രൂപ എം.എല്.എ വായ്പയെടുത്തിരുന്നു. ഇതിന്റെ തിരിച്ചടവ് മുടങ്ങിയതോടെയാണ് ജപ്തി ഭീഷണി നേരിടുന്നത്.
ഇതിനിടെയാണ് എം.എല്.എയ്ക്ക് 70,000 രൂപ മാസശമ്പളമുണ്ടെന്നും എല്ലാ അവന്സുകളും ചേര്ത്ത് ഒന്നരലക്ഷത്തോളം രൂപ ലഭിക്കുമെന്നും സന്ദീപ് വാര്യര് സോഷ്യല് മീഡിയ പോസ്റ്റ് പങ്കുവെച്ചത്. എം.എല്.എയുടെ വീട് ജപ്തിയിലാണെന്ന വാര്ത്തകള്ക്ക് പിന്നാലെയായിരുന്നു സന്ദീപ് വാര്യയുടെ പോസ്റ്റ്. ഇപ്പോള് കോണ്ഗ്രസ് നേതാവിനുള്ള മറുപടിയാണ് എം.എല്.എയുടെ മുന് പേഴ്സണല് അസിസ്റ്റന്റ് നല്കിയിരിക്കുന്നത്.
അലവന്സായി ലഭിക്കുന്ന തുകയില് പകുതിയും നിര്ധന രോഗികള്ക്ക് മരുന്ന് വാങ്ങിക്കുന്നതിനായി അദ്ദേഹം നല്കുമെന്നും സന്ദീപ് വാര്യരുടെ പാര്ട്ടിയിലെ എം.എല്.എമാരുമായി മുകുന്ദനെ താരതമ്യം ചെയ്യുമ്പോഴാണ് ഇക്കാര്യം വിശ്വസിക്കാന് ബുദ്ധിമുട്ടെന്നും ഫേസ്ബുക്കില് പങ്കുവെച്ച പോസ്റ്റില് അസ്ഹര് മജീദ് പറയുന്നു.
ഇതിനൊപ്പം അലവന്സ് ഇനത്തില് ലഭിക്കുന്ന തുക ക്വാര്ട്ടേഴ്സ് വാടക മുതല് പാര്ട്ടി ലെവി വരെ എന്തിനെല്ലാം ചെലവാകുമെന്നതിനെ കുറിച്ചുള്ള കണക്കുകളും അസ്ഹര് തന്റെ പോസ്റ്റില് ഉള്ക്കൊള്ളിച്ചിട്ടുണ്ട്. എം.എല്.എയ്ക്ക് ലക്ഷങ്ങള് ലഭിക്കുന്നുണ്ടെങ്കില് അത് തെളിയിക്കാനും അദ്ദേഹം ആവശ്യപ്പെടുന്നുണ്ട്.
അസ്ഹര് മജീദിന്റെ കുറിപ്പിന്റെ പൂര്ണരൂപം-
കള്ളക്കണക്ക് നിരത്തി ജനങ്ങളെ തെറ്റിദ്ധരിപ്പിക്കുന്ന സംഘി സന്ദീപ് വാര്യരെ…
നിന്റെയൊന്നും സ്വഭാവ സര്ട്ടിഫിക്കറ്റ് നാട്ടിക എം.എല്.എ സി.സി. മുകുന്ദന് ആവശ്യമില്ല. സി.സി. മുകുന്ദന് ആരാണെന്നും എന്താണെന്നും നാട്ടികയിലെ ജനങ്ങള്ക്കറിയാം. അതുകൊണ്ടാണ് നാട്ടികയുടെ ചരിത്രത്തിലെ തന്നെ ഏറ്റവും വലിയ ഭൂരിപക്ഷത്തില് സി.സി. മുകുന്ദന് ജയിച്ചതും.
കഴിഞ്ഞ മൂന്ന് ദിവസം നാട്ടിക എം.എല്.എയെ കാണാന് വീട്ടില് എത്തിയത് രാഷ്ട്രീയ ഭേദമന്യേ നിരവധി പേരാണ്. അതില് സന്ദീപ് വാര്യരുടെ പഴേ പാര്ട്ടിക്കാരും സന്ദീപ് വാര്യരുടെ പുതിയ പാര്ട്ടിക്കാരും പെടും. സി.സി. മുകുന്ദന് സത്യസന്ധമായ ജീവിതം നയിക്കുന്ന വ്യക്തിയായത് കൊണ്ട് തന്നെയാണ് വിവിധ മാധ്യമങ്ങളിലും ചാനലുകളിലും ഈ വാര്ത്തകള് റിപ്പോര്ട്ട് ചെയ്യപ്പെട്ടത്.
ചെറുപ്പത്തിലെ കുടുംബത്തിലെ പട്ടിണി മാറ്റാന് ചുമട്ട് തൊഴിലാളിയായി ജീവിതം ആരംഭിച്ച വ്യക്തിയാണ്. അതെ സി.സി. മുകുന്ദന്റെ കയ്യില് അലവന്സായി കിട്ടുന്ന കാശ് നില്ക്കില്ല. 4 വര്ഷത്തോളം അദ്ദേഹത്തിന്റെ കൂടെ ഉണ്ടായിരുന്ന എനിക്ക് അറിയാം കിട്ടുന്ന അലവന്സില് പകുതിയും രാവിലെ വീട്ടിലും ഓഫീസിലും അദ്ദേഹത്തെ കാണാന് വരുന്ന നിര്ധന രോഗികള്ക്ക് 1000/ , 2000/ രൂപയും ആയി മരുന്ന് വാങ്ങാന് ഞങ്ങള് പോലും അറിയാതെ നല്കുന്നത്.
മുഖ്യമന്ത്രിയുടെ ദുരിതാശ്വാസ നിധിയില് നിന്നും പാവപ്പെട്ട 4500 ഓളം രോഗികള്ക്ക് 4 വര്ഷത്തിനുള്ളില് 15 ഓളം കോടി രൂപയാണ് എം.എല്.എ ഓഫീസ് മുഖാന്തിരമുള്ള അപേക്ഷകളില് ലഭിച്ചിരിക്കുന്നത്.
സന്ദീപ് വാര്യരുടെ പാര്ട്ടിയിലെ എം.എല്.എമാരുമായി മുകുന്ദേട്ടനെ താരതമ്യപ്പെടുത്തുമ്പോളാണ് വിശ്വസിക്കാന് ഇത്ര പെടാപ്പാട്.
പിന്നെ ഒരു അര്ധരാത്രി തൃശൂരില് സന്ദീപ് വാര്യര് ഡിങ്കോള്ഫിക്കായി പോയി സ്വന്തം പാര്ട്ടിക്കാരില് നിന്നും തല്ല് വാങ്ങിയ ചരിത്രം ഇന്നും ഞങ്ങള് ഓര്മിക്കുന്നുണ്ട്. ബി.ജെ.പിയില് നിന്നും കോണ്ഗ്രസ്സിലേക്ക് പാര്ട്ടി മാറി ചെന്നിട്ടും സംഘി മനസ് ഇപ്പോളും അവിടെ തന്നെ നിലനില്ക്കുന്നു.
ഇടക്കിടെ കാലും നിലപാടും മാറുന്നവനല്ല സി.സി. മുകുന്ദന്. അന്നും ഇന്നും എന്നും കമ്മ്യൂണിസ്റ്റുകാരനാണ്.
സി സി മുകുന്ദന് എം.എല്.എക്ക് ലഭിക്കുന്ന അലവന്സ്
മാസത്തില് 50,000/
മാസത്തിലെ ചെലവ് – വാഹനത്തിന്റെ ലോണ് അടവ്, (നിയമസഭ) 18,265 / രൂപ
ക്വാര്ട്ടേഴ്സ് റെന്റ് : 65 /
ബാലന്സ് 31,735 രൂപ
പാര്ട്ടി അലവന്സ് – 3000/
ക്യാമ്പ് ഓഫീസ് റെന്റ് – 7,000/
ഓഫീസ് വൈദ്യുതി ചാര്ജ് – 1,500
ബാക്കി തുക – 20,235
എം.എല്.എയുടെ ദൈനംദിന ചിലവുകള്ക്കായി ഉപയോഗിക്കാന് ഒരു മാസം കഴിയുന്നത് 20,235 രൂപ. മാസം തോറും നല്കുന്ന ശമ്പള ബില്ലിന്റെ പകര്പ്പ് ഇതോടൊപ്പം പോസ്റ്റ് ചെയ്യുന്നു.
കുറച്ച് ലൈക്ക് കിട്ടാന് കള്ളത്തരം വിളിച്ച് പറയരുത്. 70,000 മുതല് ലക്ഷങ്ങള് ഒരു എം.എല്.എയ്ക്ക് കിട്ടുന്നതെങ്കില് സംഘി വാര്യര് അത് തെളിയിക്ക്.
Content Highlight: Nattika MLA CC Mukundan’s Former personal assistant slams Sandeep Warrier
