പാകിസ്ഥാന്റെ ഇംഗ്ലണ്ട് പര്യടനത്തിലെ രണ്ടാം ടെസ്റ്റിലും പാകിസ്ഥാന് തോല്വി മുമ്പില് കാണുകയാണ്. ലോര്ഡ്സില് നടക്കുന്ന മത്സരത്തില് ആതിഥേയര് ഉയര്ത്തിയ 389 റണ്സിന്റെ വിജയലക്ഷ്യം പിന്തുടര്ന്നിറങ്ങിയ പാകിസ്ഥാന് ഇതിനോടകം തന്നെ അഞ്ച് വിക്കറ്റ് നഷ്ടപ്പെട്ടു.
മത്സരത്തിന്റെ ആദ്യ ഇന്നിങ്സിലടക്കം ഇംഗ്ലീഷ് ബൗളര്മാര്ക്ക് ഒരു വെല്ലുവിളിയും ഉയര്ത്താന് സന്ദര്ശക ബാറ്റര്മാര്ക്ക് സാധിച്ചിരുന്നില്ല. എന്നാല് പാക് ബൗളര്മാര് മോശമല്ലാത്ത പ്രകടനം കാഴ്ചവെക്കുകയും ചെയ്തിരുന്നു. ഇതില് ഇടുത്തുപറയേണ്ട പേര് വലംകയ്യന് മീഡിയം പേസര് മുഹമ്മദ് അബ്ബാസിന്റേതാണ്.
മുഹമ്മദ് അബ്ബാസ്
ആദ്യ ഇന്നിങ്സില് ക്യാപ്റ്റന് ജോ റൂട്ടിന്റേതടക്കം നാല് വിക്കറ്റ് വീഴ്ത്തിയ താരം രണ്ടാം ഇന്നിങ്സില് അഞ്ച് വിക്കറ്റുമായാണ് തിളങ്ങിയത്.
ഇംഗ്ലണ്ടിന്റെ ഒന്നാം ഇന്നിങ്സില് 20 ഓവറില് 73 റണ്സ് വഴങ്ങി നാല് വിക്കറ്റ് വീഴ്ത്തിയപ്പോള് രണ്ടാം ഇന്നിങ്സില് 22 ഓവറില് 57 റണ്സ് മാത്രം വിട്ടുകൊടുത്താണ് താരം അഞ്ച് വിക്കറ്റുകള് സ്വന്തമാക്കിയത്.
ഈ പ്രകടനത്തിന് പിന്നാലെ ഒരു ലിസ്റ്റില് ഇതിഹാസ താരം മുത്തയ്യ മുരളീധരനെ മറികടന്നിരിക്കുകയാണ് മുഹമ്മദ് അബ്ബാസ്. ചുരുങ്ങിയത് നൂറ് ടെസ്റ്റ് വിക്കറ്റുകള് വീഴ്ത്തിയ ഏഷ്യന് ബൗളര്മാരില് ഏറ്റവും മികച്ച ബൗളിങ് ശരാശരിയുടെ ലിസ്റ്റിലാണ് ഇപ്പോള് താരം മുരളീധരനെ മറികടന്നിരിക്കുന്നത്.
അതേസമയം, പാകിസ്ഥാന്റെ രണ്ടാം ഇന്നിങ്സ് 34 ഓവര് പിന്നിടുമ്പോള് 122ന് അഞ്ച് വിക്കറ്റ് എന്ന നിലയിലാണ് ബാറ്റിങ് തുടരുന്നത്. അഞ്ച് വിക്കറ്റ് ശേഷിക്കെ 267 റണ്സ് കൂടി വേണം.
ഒന്നര ദിവസം കൂടി ശേഷിക്കെ പാകിസ്ഥാന്റെ മിഡില് ഓര്ഡറിനെയും ലോവര് ഓര്ഡറിനെയും സംബന്ധിച്ച് വിജയലക്ഷ്യം ഏറെക്കുറെ അപ്രാപ്യമാണ്. അര്ധ സെഞ്ച്വറിയുമായി ബാറ്റിങ് തുടരുന്ന സൗദ് ഷക്കീലിലാണ് സന്ദര്ശകരുടെ ഏക പ്രതീക്ഷ.
