തിരുവനന്തപുരം: അനധികൃതമായി സര്‍വീസില്‍ നിന്നും അവധിയെടുത്ത 601 ഡോക്ടര്‍മാര്‍ക്കെതിരെ നടപടിയെടുക്കാന്‍ ആരോഗ്യ വകുപ്പ്. 84 ഡോക്ടര്‍മാരെ പിരിച്ചുവിട്ടു. കഴിഞ്ഞ ദിവസം 51 ഡോക്ടര്‍മാരെ പിരിച്ചുവിട്ടതിന് പിന്നാലെയാണ് ആരോഗ്യ വകുപ്പിന്റെ നടപടി.

പ്രൊബേഷന്‍ ഡിക്ലയര്‍ ചെയ്യാത്ത 444 ഡോക്ടര്‍മാര്‍ക്കും ഡിക്ലയര്‍ ചെയ്ത 152 ഡോക്ടര്‍മാര്‍ക്കും എതിരെ നടപടി സ്വീകരിച്ചുവരികയാണെന്ന് മന്ത്രി വീണാ ജോര്‍ജ് അറിയിച്ചു. ആരോഗ്യവകുപ്പിന് കീഴിലുള്ള ഡോക്ടര്‍മാകര്‍ക്കെതിരെയാണ് ഇപ്പോള്‍ നടപടി സ്വീകരിച്ചു തുടങ്ങിയിരിക്കുന്നത്.

ജോലിയില്‍ പ്രവേശിച്ച ശേഷവും പ്രൊബേഷന്‍ ഡിക്ലയര്‍ ചെയ്യാതെ ലീവ് എടുത്തു. പ്രൊബേഷന്‍ ഡിക്ലയര്‍ ചെയ്ത ശേഷവും വിദേശത്തേക്ക് പോകുന്നതിനായി വിട്ടുനില്‍ക്കുന്നവരുണ്ട്. ഇവര്‍ക്കെതിരെയാണ് നടപടി സ്വീകരിച്ചിരിക്കുന്നത്. പി.എസ്.സി വഴിയുള്ള നിയമനം നടത്താനും അല്ലായെന്നുണ്ടെങ്കില്‍ കരാര്‍ അടിസ്ഥാനത്തില്‍ നിയമനം നടത്താനുമാണ് മെഡിക്കല്‍ വിദ്യാഭ്യാസ വകുപ്പിന്റെ നീക്കം.

ലീവെടുത്ത് മറ്റ് ജോലികള്‍ക്കും വിദേശത്തേക്ക് അടക്കം പോകുന്നുണ്ടെന്നും കാണിച്ച് മെഡിക്കല്‍ വിദ്യാഭ്യാസ വകുപ്പ് ഡോക്ടര്‍മാര്‍ക്ക് കാരണം കാണിക്കല്‍ നോട്ടീസ് നല്‍കിയിരുന്നു. അവധി റദ്ദാക്കി സര്‍വീസില്‍ തിരിച്ചുകയറണമെന്നായിരുന്നു നോട്ടീസിലെ പ്രധാന നിര്‍ദേശം.

പല തവണ അവസരം നല്‍കിയിരുന്നെന്നും എന്നാല്‍ ഇവരാരും തന്നെ സര്‍വീസില്‍ തിരിച്ചുകയറാനുള്ള സന്നദ്ധത കാണിച്ചില്ലെന്നും മന്ത്രി പറയുന്നു. തുടര്‍ന്നാണ് നടപടി എടുത്തത്.

ഇത്രയധികം നാളുകളായി സര്‍വീസില്‍ നിന്നും വിട്ടുനില്‍ക്കുന്നത് വകുപ്പിന്റെ പ്രവര്‍ത്തനത്തെ ബാധിക്കുകയും ഇത്തരം ജീവനക്കാരെ സര്‍വീസില്‍ തുടരാന്‍ അനുവദിക്കുന്നത് അര്‍ഹരായ ഉദ്യോഗസ്ഥര്‍ക്ക് അവസരം നഷ്ടമാകുന്നതിന് കാരണമാകുമെന്നും മന്ത്രി ചൂണ്ടിക്കാട്ടി.

സര്‍ക്കാര്‍ മെഡിക്കല്‍ കോളേജ് ആശുപത്രികളില്‍ നിലവില്‍ ഡോക്ടര്‍മാരുടെ വലിയ കുറവ് ഉണ്ട്. ഇത്തരം സാഹചര്യത്തില്‍ മുന്നോട്ട് പോകാന്‍ ബുദ്ധിമുട്ടാണെന്ന വിവരം ഡോക്ടര്‍മാരെ അറിയിച്ചിരുന്നു.

2016 മുതല്‍ അനധികൃത അവധിയിലുള്ളവരുടെ വിവരങ്ങള്‍ മെഡിക്കല്‍ വിദ്യാഭ്യാസ വകുപ്പ് കഴിഞ്ഞ വര്‍ഷം പട്ടികപ്പെടുത്തിയിരുന്നു. അവധിയിലുള്ളവരുടെ പേര്, സ്ഥാപനം, അവധി തുടങ്ങിയ തീയതി അടക്കം ഉള്‍പ്പെടുത്തിയാണ് പട്ടിക തയ്യാറാക്കിയിരുന്നത്. ഈ ഡോക്ടര്‍മാര്‍ക്കെതിരെ കര്‍ശന നടപടി ഉണ്ടാകുമെന്നും വീണ ജോര്‍ജ് അറിയിച്ചിട്ടുണ്ടായിരുന്നു. ജോലിയില്‍ പുനര്‍ പ്രവേശിക്കാന്‍ താത്പര്യമുള്ളവര്‍ക്ക് തിരികെ വരാമെന്നും വീണ അറിയിച്ചിരുന്നു.

Content Highlight: Medical Education Department takes action again on illegal leave, dismisses 84 doctors