മലപ്പുറം: സംസ്ഥാന നിയമസഭാ തെരഞ്ഞെടുപ്പിനായുള്ള സാധ്യാതാ സ്ഥാനാര്ത്ഥിപട്ടികയില് ഭൂരിഭാഗം മണ്ഡലങ്ങളിലും ഒറ്റ പേരില് എത്താനാകാതെ മുസ്ലിം ലീഗ് കിതയ്ക്കുന്നു. സാധ്യതാ പട്ടികയില് പറയുന്ന 27 മണ്ഡലങ്ങളില് 16 സീറ്റുകളിലും ഒന്നിലേറെ സ്ഥാാനാര്ത്ഥികളെയാണ് പരിഗണിച്ചിരിക്കുന്നത്. ഒരേ സ്ഥാനാര്ത്ഥികളെ തന്നെ ഒന്നിലേറെ മണ്ഡലങ്ങളിലേക്ക് പരിഗണിച്ചിരിക്കുന്നതായും പട്ടികയില് കാണാം.
അഴീക്കോട്, കൂത്തുപറമ്പ്, ഗുരുവായൂര്, കോഴിക്കോട് സൗത്ത്, തിരൂര്, താനൂര് തുടങ്ങിയ സീറ്റുകളിലെല്ലാം ഒന്നിലേറെ സ്ഥാനാര്ത്ഥികളാണ് അന്തിമ പരിഗണനയിലുള്ളത്. ഫാത്തിമ തഹ്ലിയ, ഷിബു മീരാന്, ടി.പി അഷ്റഫ് അലി, പി.കെ. ഫിറോസ് തുടങ്ങിയവരെ ഒന്നിലേറെ മണ്ഡലങ്ങളിലേക്കും പരിഗണിക്കുന്നുണ്ട്.
അഴീക്കോടും കോഴിക്കോട് സൗത്തിലുമായാണ് ഫാത്തിമ തഹ്ലിയക്കായുള്ള ചര്ച്ച നടക്കുന്നത്. കോഴിക്കോടും മലപ്പുറം ജില്ലയിലുമായി മൂന്നോളം മണ്ഡലങ്ങളില് പി.കെ. ഫിറോസിന് അവസരം നല്കാനുള്ള ചര്ച്ചകളും പുരോഗമിക്കുന്നുണ്ട്. മലപ്പുറം, മഞ്ചേരി, ഏറനാട് തുടങ്ങിയ ലീഗിന്റെ സിറ്റിങ് സീറ്റുകളിലേക്കാണ് ടി.പി. അഷ്റഫ് അലിയെ പരിഗണിക്കുന്നത്.
മണ്ഡല തല സര്വേകളും പാര്ട്ടി ഘടകങ്ങളുടെയും അഭിപ്രായങ്ങളും അടിസ്ഥാനമാക്കിയാണ് സാധ്യതാ സ്ഥാനാര്ത്ഥികളുടെ പട്ടിക തയ്യാറാക്കിയതെന്നാണ് ലീഗിന്റെ വിശദീകരണം. പാര്ട്ടി നേതൃത്വം വിവിധ മണ്ഡലങ്ങളില് നിന്നുള്ള റിപ്പോര്ട്ടുകള് പരിശോധിച്ചതായാണ് സൂചന. സിറ്റിങ് എം.എല്.എമാര് ഉള്ള മണ്ഡലങ്ങളില് അവര്ക്കുതന്നെ വീണ്ടും മത്സരിക്കാന് സീറ്റ് വിട്ടുനല്കാനാണ് സാധ്യതയെന്നും ലീഗ് സൂചന നല്കി.
ഒന്നിലധികം സ്ഥാനാര്ത്ഥികളുള്ള മണ്ഡലങ്ങളില് ജയ സാധ്യതയാണ് പരിഗണിക്കുന്നതെന്നും അവസാനഘട്ടത്തിലാണ് നിര്ണായക ചര്ച്ചകള് നടക്കുകയെന്നും ലീഗ് വൃത്തങ്ങള് അറിയിച്ചു. തിരുവമ്പാടിയും പട്ടാമ്പിയും, കോങ്ങാടും ബാലുശ്ശേരിയും തമ്മില് സീറ്റ് വെച്ചുമാറ്റം ഉണ്ടാകാനും സാധ്യതയുണ്ട്.
ലീഗിന്റെ വനിതാ പ്രാതിനിധ്യത്തെ കുറിച്ചുള്ള വിമര്ശനങ്ങള് അവസാനിപ്പിക്കാനായി മലപ്പുറത്ത് നിന്ന് വിജയ സാധ്യതയുള്ള സീറ്റില് നിന്നും വനിതാ സ്ഥാനാര്ത്ഥിക്ക് ടിക്കറ്റ് നല്കുന്ന കാര്യവും പരിഗണനയിലുണ്ടെന്ന് പാര്ട്ടി വൃത്തങ്ങള് അറിയിച്ചു.
