2026 ഫിഫ ലോകകപ്പിലെ ആദ്യ മത്സരത്തില് ആവേശകരമായ വിജയം സ്വന്തമാക്കി ആഫ്രിക്കന് കരുത്തരായ ഐവറികോസ്റ്റ്. ഗ്രൂപ്പ് ഇ-യില് നടന്ന മത്സരത്തില് ഇക്വഡോറിനെയാണ് ദി എലിഫെന്റ്സ് വീഴ്ത്തിയത്. ഫിലാഡല്ഫിയയില് നടന്ന മത്സരത്തില് എതിരില്ലാത്ത ഒരു ഗോളിനാണ് ഐവറികോസ്റ്റിന്റെ വിജയം.
12 വര്ഷങ്ങള്ക്ക് ശേഷം ലോകകപ്പ് കളിക്കാനെത്തിയ ആഫ്രിക്കന് ടീം ഇക്വഡോറിന്റെ അപരാജിത കുതിപ്പിന് കൂടിയാണ് അന്ത്യം കുറിച്ചത്. 2024 മുതല് ഒറ്റ മത്സരം പോലും പരാജയപ്പെടാതെയാണ് ഇക്വഡോര് ലോകകപ്പിലെ ആദ്യ മത്സരത്തിനെത്തിയത്. ടീമിന്റെ 19 മത്സരങ്ങളുടെ അണ്ബീറ്റണ് റണ്ണിനാണ് അവസാനമായത്. എട്ട് വിജയവും 11 സമനിലയുമായിട്ടായിരുന്നു ലാറ്റിനമേരിക്കന് ടീം ലോകകപ്പിനെത്തിയിരുന്നത്.
Les Éléphants s’imposent à la toute fin 🐘🇨🇮#FIFAWorldCup
— Coupe du Monde de la FIFA 🏆 (@fifaworldcup_fr) June 15, 2026
മത്സരത്തിന്റെ ആദ്യ പകുതിയില് ഇരു ടീമുകള്ക്കും ഗോള് നേടാന് സാധിച്ചിരുന്നില്ല. ഇരു ടീമുകളും അക്കൗണ്ട് തുറക്കാന് മികച്ച നീക്കങ്ങള് നടത്തി. ഒടുവില് മത്സരം സമനിലയിലേക്ക് നീങ്ങുമെന്ന് തോന്നിച്ച നിമിഷത്തിലാണ് ഐവറികോസ്റ്റ് വിജയഗോള് നേടിയത്. മത്സരത്തിന്റെ 90ാം മിനിറ്റില് അമദ് ഡിയാലോയാണ് ടീമിനായി ഗോള് നേടിയത്. എതിര് ടീമിന്റെ പോസ്റ്റില് നിന്നും ഒരു തകര്പ്പന് ഷോട്ടിലൂടെ താരം ലക്ഷ്യം കാണുകയായിരുന്നു.
ഈ വിജയത്തോടെ ഗ്രൂപ്പ് ഇ-യില് മൂന്ന് പോയിന്റുമായി രണ്ടാം സ്ഥാനത്താണ് ഐവറികോസ്റ്റ്. ജൂണ് 21ന് ജര്മനിക്കെതിരെയാണ് ഐവറികോസ്റ്റിന്റെ അടുത്ത മത്സരം. പുതുമുഖങ്ങളായ കുറാസാവോക്കെതിരെ കൂറ്റന് വിജയം സ്വന്തമാക്കിയെത്തുന്ന ജര്മനിക്ക് ദി എലിഫെന്റ്സ് വെല്ലുവിളി സൃഷ്ടിക്കുമോയെന്ന് കണ്ടുതന്നെ അറിയണം.
അതേസമയം നീണ്ട 12 വര്ഷങ്ങള്ക്ക് ശേഷമാണ് ഐവറികോസ്റ്റ് ലോകകപ്പിന് യോഗ്യത നേടിയിരുന്നത്. 2014ല് ബ്രസീലില് നടന്ന ലോകകപ്പിലായിരുന്നു അവസാനമായി ഐവറികോസ്റ്റ് പന്തുതട്ടിയിരുന്നത്. ലോകകപ്പിന് മുമ്പേ തന്നെ ഐവറികോസ്റ്റ് എതിരാളികള്ക്ക് മുന്നറിയിപ്പ് നല്കിയിരുന്നു.
