ന്യൂസിലാന്ഡിന്റെ ഇന്ത്യന് പര്യടനത്തിലെ അഞ്ചാം മത്സരത്തില് മികച്ച വിജയം സ്വന്തമാക്കി ആതിഥേയര് 4-1ന് പരമ്പര സ്വന്തമാക്കിയിരിക്കുകയാണ്. തിരുവനന്തപുരം ഗ്രീന്ഫീല്ഡ് സ്റ്റേഡിയത്തില് നടന്ന അവസാന മത്സരത്തില് 46 റണ്സിന്റെ വിജയമാണ് ഇന്ത്യ സ്വന്തമാക്കിയത്.
ഇന്ത്യ ഉയര്ത്തിയ 272 റണ്സിന്റെ വിജയലക്ഷ്യം പിന്തുടര്ന്നിറങ്ങിയ കിവികള് 225ന് പുറത്തായി. ഹോം ടൗണ് ഹീറോ സഞ്ജു സാംസണ് നിരാശപ്പെടുത്തിയ മത്സരത്തില് വിക്കറ്റ് കീപ്പര് ഇഷാന് കിഷന്റെ സെഞ്ച്വറി കരുത്തിലാണ് ഇന്ത്യ വിജയിച്ചുകയറിയത്.
ആറ് പന്ത് നേരിട്ട് ആറ് റണ്സ് മാത്രം നേടിയാണ് സഞ്ജു പുറത്തായത്. കേവലം സ്വന്തം തട്ടകത്തില് മാത്രമല്ല, പരമ്പരയിലാകെ മോശം പ്രകടനമാണ് സഞ്ജു പുറത്തെടുത്തത്.
ഒറ്റ മത്സരത്തില് പോലും 20 പന്ത് തികച്ച് ക്രീസില് നില്ക്കാന് സഞ്ജുവിന് സാധിച്ചിട്ടില്ല എന്നതും ഇതോടൊപ്പം ചേര്ത്തുവെക്കണം. 10 (7), 6 (5), 0 (1), 24 (15), 6 (6) എന്നിങ്ങനെയാണ് താരത്തിന്റെ സ്കോര്. 135.29 സ്ട്രൈക് റേറ്റിലും 9.2 ശരാശരിയിലും നേടിയതാകട്ടെ വെറും 46 റണ്സും.
സഞ്ജു സാംസണ്. Photo: Screengrab
സഞ്ജു സാംസണൊപ്പം സ്ക്വാഡില് വിക്കറ്റ് കീപ്പറായി ഇടം നേടിയ ഇഷാന് കിഷനാകട്ടെ തിരിച്ചുവരവ് ആഘോഷമാക്കുകയുമാണ്. ഒരു സെഞ്ച്വറിയും അര്ധ സെഞ്ച്വറിയും അടക്കം നാല് മത്സരത്തില് നിന്നും സ്വന്തമാക്കിയത് 215 റണ്സ്. ലോകകപ്പില് സഞ്ജുവിനെ മറികടന്ന് ഇഷാന് ഇന്ത്യയുടെ ഗ്ലൗമാനായാലും അമ്പരക്കേണ്ടതില്ല.
തുടര്ച്ചയായി മോശം പ്രകടനം മാത്രം പുറത്തെടുക്കുന്ന സഞ്ജുവിന് മുമ്പില് സ്വയം തെളിയിക്കാന് ഒരു അവസരം കൂടി ബാക്കിയുണ്ട്, സൗത്ത് ആഫ്രിക്കയ്ക്കെതിരെ നവി മുംബൈയില് നടക്കുന്ന സന്നാഹ മത്സരം.
ഫെബ്രുവരി നാലിനാണ് ഈ മത്സരത്തിന് കളമൊരുങ്ങുന്നത്. തന്റെ മൂന്ന് ടി-20 സെഞ്ച്വറികളില് രണ്ടെണ്ണവും നേടിയ പ്രോട്ടിയാസിനെതിരെ സഞ്ജുവിന് തിളങ്ങാന് സാധിക്കുമോ എന്നാണ് ആരാധകര് ഉറ്റുനോക്കുന്നത്. അല്ലാത്ത പക്ഷം സഞ്ജുവിനെ മറികടന്ന് ഇഷാന് ലോകകപ്പ് കളിക്കുകയും മലയാളി താരം ബെഞ്ചിലിരിക്കേണ്ടിയും വരും.
സഞ്ജുവിനെ പോലെ തന്നെ ഇഷാന് കിഷനും വിക്കറ്റ് കീപ്പര് ബാറ്ററാണ്, മാത്രമല്ല ഓപ്പണിങ്ങില് തിളങ്ങാനും താരത്തിന് സാധിക്കും. ഇക്കഴിഞ്ഞ സയ്യിദ് മുഷ്താഖ് അലി ട്രോഫിയിലും അത് കണ്ടതാണ്.
ഇഷാന് ലെഫ്റ്റിയാണ് എന്നതാണ് ഓപ്പണിങ്ങിലും താരത്തെ പരിക്ഷിക്കാനുള്ള തീരുമാനത്തില് നിന്നും അപെക്സ് ബോര്ഡ് പിന്നോട്ട് നടക്കുന്നത്. അഭിഷേക് ശര്മ ഇടംകയ്യന് ബാറ്ററായതിനാല് തന്നെ ഓപ്പണിങ്ങില് ഇടംകൈ-വലംകൈ കോമ്പിനേഷന് ആവശ്യമുള്ളതിനാല് ഇഷാന് കിഷനെ ആദ്യമേ കളത്തിലിറക്കില്ല എന്നാണ് ആരാധകര് കണക്കുകൂട്ടുന്നത്.
സഞ്ജു സാംസണ് | ഇഷാന് കിഷന്
തന്റെ പേരിനും പെരുമയോടും ഒപ്പം തന്നെ വിശ്വസിക്കുന്ന ആരാധകരോടും നീതി കാട്ടണമെങ്കില് സൗത്ത് ആഫ്രിക്കയ്ക്കെതിരായ സന്നാഹ മത്സരത്തില് സഞ്ജുവിന് തിളങ്ങിയേ മതിയാകൂ.
എന്നാല് പ്രോട്ടിസായിനെ പിടിച്ചുകെട്ടുക എന്നത് അത്രകണ്ട് എളുപ്പമാകില്ല. വെസ്റ്റ് ഇന്ഡീസിനെതിരെ നേടിയ പരമ്പര വിജയവുമായാണ് മര്ക്രവും സംഘവും കപ്പ് മോഹിച്ച് ഇന്ത്യയിലേക്കെത്തുന്നത്. കഴിഞ്ഞ തവണ ഇന്ത്യയോട് തോറ്റ് കൈവിട്ട കിരീടം ഇന്ത്യന് മണ്ണില് വെച്ച് തന്നെ നേടിയെടുക്കാനാണ് സൗത്ത് ആഫ്രിക്ക ഒരുങ്ങുന്നത്.
Content Highlight: It is imperative for Sanju Samson to perform well in the warm-up match ahead of the World Cup.
