![?php echo $post['title']; ?>](https://assets.doolnews.com/w/900x473/2025/11/tejas.jpg)
ദുബായ്: ദുബായ് എയര്‍ഷോയ്ക്കിടെ ഇന്ത്യയുടെ യുദ്ധവിമാനം തേജസ് തകര്‍ന്നുവീണു. വെള്ളിയാഴ്ച മൂന്നരയോടെയാണ് അപകടമുണ്ടായത്. അപകടത്തില്‍ പൈലറ്റ് കൊല്ലപ്പെട്ടു
ദുബായ് അല്‍ മക്തൂം അന്താരാഷ്ട്ര വിമാനത്താവളത്തിനടുത്താണ് യുദ്ധവിമാനം തകര്‍ന്നുവീണത്.
സംഭവത്തെ തുടര്‍ന്ന് ദുബായ് എയര്‍ ഷോ നിര്‍ത്തിവെച്ചു.
#TejasAircraft of Indian airforce has been crashed in #Dubai Air Show… pic.twitter.com/fcIVmPYfqN
— Harshal Shah (@Harshal1781) November 21, 2025
എയര്‍ ഷോയുടെ അവസാന ദിനമായിരുന്നു ഇന്ന്. തേജസ് പങ്കെടുക്കുന്ന പതിനേഴാമത് വ്യോമാഭ്യാസത്തിനിടെയാണ് സംഭവമുണ്ടായത്.
രാജ്യത്തിന് അഭിമാനമെന്ന് വിശേഷിപ്പിക്കപ്പെടുന്ന തദ്ദേശീയമായി നിര്‍മിച്ച യുദ്ധ വിമാനമാണ് തേജസ്. ഹിന്ദുസ്ഥാന്‍ എയറോനോട്ടിക്‌സാണ് നിര്‍മാതാക്കള്‍.
സിംഗിള്‍ സീറ്റ് ലൈറ്റ് കോംപാറ്റ് എയര്‍ക്രാഫ്റ്റ് വിഭാഗത്തില്‍പ്പെടുന്ന തേജസ് തകര്‍ന്നുവീണതായി ഇന്ത്യന്‍ വ്യോമസേന ഔദ്യോഗികമായി സ്ഥിരീകരിച്ചു.
പൈലറ്റിന് മാരകമായി പരിക്കേറ്റിരുന്നു. ഒരു ജീവന്‍ നഷ്ടമായതില്‍ അഗാധ ദുഖം രേഖപ്പെടുത്തുന്നുവെന്നും എക്‌സ് പോസ്റ്റിലൂടെ വ്യോമസേന പ്രതികരിച്ചു. സംഭവത്തില്‍ വിശദമായ അന്വേഷണം നടത്തുമെന്നും വ്യോമസേന അറിയിച്ചിട്ടുണ്ട്.
ദുബായ് ഭരണകൂടവും അപകടം സ്ഥിരീകരിച്ചിട്ടുണ്ട്. അതേസമയം, രണ്ട് വര്‍ഷത്തിനിടയില്‍ തേജസ് വിമാനം ഉള്‍പ്പെട്ട രണ്ടാമത്തെ അപകടമാണിത്.
2024 മാര്‍ച്ചില്‍ രാജസ്ഥാനിലെ ജയ്‌സാല്‍മീറില്‍ ഒതേജസ് വിമാനം തകര്‍ന്നുവീണിരുന്നു. 2001ലാണ് തേജസ് ചരിത്രത്തിലാദ്യമായി പറന്നുയര്‍ന്ന് അതിനുശേഷമുണ്ടായ ആദ്യത്തെ അപകടമായിരുന്നു 2024ലേത്.
തേജസ് ജെറ്റിന്റെ പ്രധാന സവിശേഷത അതിന്റെ മാര്‍ട്ടിന്‍-ബേക്കര്‍ സീറോ-സീറോ എജക്ഷന്‍ സീറ്റെന്നാണ് പറയപ്പെടുന്നത്.
ഈ സാങ്കേതിക വിദ്യ പൈലറ്റുമാര്‍ക്ക് ടേക്ക് ഓഫ്, ലാന്‍ഡിങ് തുടങ്ങിയ സമയങ്ങളിലെ ദുര്‍ഘടമായ അവസ്ഥയിലും പൈലറ്റിനെ സുരക്ഷിതമായി ഇജക്ട് ചെയ്യാന്‍ സഹായിക്കുന്നതാണ്.
Content Highlight: India’s Tejas Fighter Jet Crashed At Dubai Air show
