സിംബാബ്വേക്കെതിരെയുള്ള മൂന്ന് ടി-20 മത്സരങ്ങളുടെ പരമ്പരക്കുള്ള ഇന്ത്യന് ടീമിനെ പ്രഖ്യാപിച്ചു. ടീമില് മലയാളി താരം സഞ്ജു സാംസണ് ഇടം നേടാന് സാധിച്ചില്ല. ഓപ്പണറായി വൈഭവ് സൂര്യവംശി ടീമില് ഇടം നേടി. 2026 ടി-20 ലോകകപ്പില് മികച്ച പ്രകടനം നടത്തിയിട്ടും സഞ്ജുവിനെ ഇന്ത്യ ഈ പരമ്പരയില് ഉള്പ്പെടുത്താതെ പോവുകയായിരുന്നു.
നിലവില് നടന്നുകൊണ്ടിരിക്കുന്ന ഇംഗ്ലണ്ടിനെതിരെയുള്ള രണ്ടാം ടി-20യില് സഞ്ജുവിന് പ്ലെയിങ് ഇലവനില് സ്ഥാനമുണ്ടായിരുന്നില്ല. സഞ്ജുവിന് പകരം വൈഭവ് ആയിരുന്നു ടീമില് ഓപ്പണറായി കളത്തിലിറങ്ങിയത്.
2026 ഐ.സി.സി ടി-20 വേള്ഡ് കപ്പില് മിന്നും പ്രകടനമായിരുന്നു സഞ്ജു നടത്തിയിരുന്നത്. ലോകകപ്പിലെ ആദ്യ മത്സരങ്ങളില് പുറത്തിരുന്ന സഞ്ജു, നിര്ണായക ഘട്ടത്തില് ടീമിലെത്തിയപ്പോള് തന്റെ കഴിവ് തെളിയിക്കുകയായിരുന്നു. സൂപ്പര് 8ല് വെസ്റ്റ് ഇന്ഡീസിനെതിരായ നിര്ണായക മത്സരത്തില് പുറത്താകാതെ നേടിയ 97* റണ്സ് ഇന്ത്യയുടെ വിജയത്തില് നിര്ണായകമായി.
പിന്നീട് സെമി ഫൈനലില് ഇംഗ്ലണ്ടിനെതിരെയും ഫൈനലില് ന്യൂസിലാന്ഡിനെതിരെ 89* റണ്സ് വീതം നേടി പുറത്താകാതെ വെടിക്കെട്ട് ബാറ്റിങ് പ്രകടനമാണ് താരം കാഴ്ചവെച്ചത്. ടൂര്ണമെന്റിലെ മികച്ച താരത്തിനുള്ള പുരസ്കാരവും സഞ്ജുവായിരുന്നു ഏറ്റുവാങ്ങിയത്.
മാര്ച്ച് മാസത്തിലെ പ്ലെയര് ഓഫ് ദി മന്ത് അവാര്ഡ് നേടിയതും സഞ്ജുവായിരുന്നു. ടി-20 ലോകകപ്പിലെ താരമായിട്ടും ടീമില് നിന്നും സഞ്ജുവിനെ ഒഴിവാക്കിയത് ആരാധകരില് വലിയ അമ്പരപ്പാണ് ഉണ്ടാക്കിയിരിക്കുന്നത്.
ടീമില് പഞ്ചാബ് കിങ്സ് ഓപ്പണര് പ്രഭ്സിമ്രാന് സിങ് ഇടം നേടി. ആദ്യമായാണ് താരം ഇന്ത്യന് സീനിയര് ടീമില് ഇടം നേടുന്നത്. ഈ സീസണില് പഞ്ചാബിന് വേണ്ടി നടത്തിയ മിന്നും പ്രകടനമായിരുന്നു താരം നടത്തിയത്. പഞ്ചാബിനൊപ്പം 14 മത്സരങ്ങളില് നിന്നും 510 റണ്സായിരുന്നു താരം അടിച്ചെടുത്തത്. ആറ് അര്ധ സെഞ്ച്വറികളാണ് താരം ഈ സീസണില് സ്വന്തമാക്കിയത്.
റിങ്കു സിങ്, മയാങ്ക് യാദവ് എന്നിവര് ടീമില് തിരിച്ചെത്തിയപ്പോള് ഹര്ഷ് ദുബെ, യാഷ് താക്കൂര്, അശോക് ശര്മ എന്നിവരും പരമ്പരയ്ക്കുള്ള ടീമില് ഇടം നേടി.
ജൂലൈ 23നാണ് സിംബാബ്വേക്കെതിരെയുള്ള ടി-20 പരമ്പരക്ക് തുടക്കമാവുന്നത്. ഹരാരെ സ്പോര്ട്സ് ക്ലബ്ബിലാണ് ആദ്യ മത്സരം.
