വെസ്റ്റ് ഇന്‍ഡീസിനെതിരായ ടി-20 പരമ്പരയിലെ നാലാം മത്സരത്തില്‍ ഇന്ത്യ പരാജയപ്പെട്ടിരുന്നു. 24 റണ്‍സിനാണ് വെസ്റ്റ് ഇന്‍ഡീസ് ഇന്ത്യയെ പരാജയപ്പെടുത്തിയത്. ഹൈദരാബാദിലെ രാജീവ് ഗാന്ധി സ്റ്റേഡിയത്തില്‍ നടന്ന മത്സരത്തില്‍ ടോസ് നേടിയ ഇന്ത്യ ബൗളിങ് തെരഞ്ഞെടുക്കുകയായിരുന്നു.

തുടര്‍ന്ന് ആദ്യം ബാറ്റ് ചെയ്ത വിന്‍ഡീസ് മൂന്ന് വിക്കറ്റ് നഷ്ടത്തില്‍ 247 റണ്‍സിന്റെ കൂറ്റന്‍ ടോട്ടലാണ് ഇന്ത്യക്കെതിരെ ഉയര്‍ത്തിയത്. വലിയ വിജയലക്ഷ്യത്തിലേക്ക് ബാറ്റെടുത്ത ഇന്ത്യയുടെ ഇന്നിങ്‌സ് 19.3 ഓവറില്‍ 223 റണ്‍സില്‍ അവസാനിക്കുകയായിരുന്നു. അവസാന വിക്കറ്റും കയ്യില്‍ പിടിച്ച് ബാറ്റ് ചെയ്ത ഇന്ത്യ, അര്‍ഷ്ദീപ് സിങ്ങിന്റെ റിട്ടയേഡ് ഹേര്‍ട്ടോടെ തോല്‍വി സമ്മതിക്കുകയായിരുന്നു.

എന്നിരുന്നാലും മത്സരത്തില്‍ ഒരു വമ്പന്‍ റെക്കോഡ് സ്വന്തമാക്കിയിരിക്കുകയാണ് ഇന്ത്യ. അന്താരാഷ്ട്ര ടി-20 ക്രിക്കറ്റില്‍ 2000 സിക്‌സറുകള്‍ പൂര്‍ത്തിയാക്കാനാണ് ഇന്ത്യയ്ക്ക് സാധിച്ചത്. മാത്രമല്ല അന്താരാഷ്ട്ര ടി-20യില്‍ ഏറ്റവും കൂടുതല്‍ സിക്‌സര്‍ നേടുന്ന രണ്ടാമത്തെ ടീമായി മാറാനും ഇന്ത്യയ്ക്ക് കഴിഞ്ഞു. 297ാം മത്സരത്തില്‍ നിന്ന് 2010 സിക്‌സറുകളാണ് ഇന്ത്യ നേടിയത്.

മലയാളി സൂപ്പര്‍ താരം സഞ്ജു സാംസണിലൂടെയായിരുന്നു ഇന്ത്യ ഈ നാഴികക്കല്ലിലെത്തിയത്. ഇന്നിങ്‌സിലെ മൂന്നാം ഓവറില്‍ റോസ്റ്റണ്‍ ചേസിനെ സിക്‌സര്‍ പറത്തിയായിരുന്നു സഞ്ജു ഇന്ത്യയെ 2000 സിക്‌സര്‍ എന്ന മാന്ത്രിക സംഖ്യയില്‍ എത്തിച്ചത്.

ഏറ്റവും കൂടുതല്‍ സിക്‌സറുകള്‍ നേടിയ ടീമുകളുടെ പട്ടികയില്‍ വെസ്റ്റ് ഇന്‍ഡീസാണ് ഒന്നാം സ്ഥാനത്ത്. നിലവിലെ കണക്കുകള്‍ പ്രകാരം 259 മത്സരങ്ങളില്‍ നിന്ന് 2026 സിക്‌സറുകളാണ് വിന്‍ഡീസ് നേടിയത്. ന്യൂസിലാന്‍ഡ് (1585), പാകിസ്ഥാന്‍ (1507), സൗത്ത് ആഫ്രിക്ക (1407) എന്നിവരാണ് ഇന്ത്യയ്ക്ക് പിന്നിലുള്ളത്.

മത്സരത്തില്‍ ഇന്ത്യ പരാജയപ്പെട്ടെങ്കിലും സഞ്ജു സാംസണിന്റെ തിരിച്ചുവരവിനാണ് ഹൈദരാബാദ് സാക്ഷ്യം വഹിച്ചത്. മത്സരത്തില്‍ 23 പന്തില്‍ നിന്ന് നാല് സിക്‌സും ആറ് ഫോറും ഉള്‍പ്പെടെ 56 റണ്‍സ് നേടിയാണ് സഞ്ജു തിളങ്ങിയത്. 243.48 എന്ന മികച്ച സ്‌ട്രൈക്ക് റേറ്റിലായിരുന്നു സഞ്ജുവിന്റെ ആക്രമണ ബാറ്റിങ്.

വിന്‍ഡീസ് ബൗളിങ് നിരയില്‍ കീമോ പോള്‍ അഞ്ച് വിക്കറ്റുകള്‍ നേടി തകര്‍പ്പന്‍ പ്രകടനമാണ് നടത്തിയത്. ഗുഡകേഷ് മോട്ടി രണ്ട് വിക്കറ്റും ഷാമര്‍ സ്പ്രിംഗര്‍, റൊമാരിയോ ഷെപ്പേര്‍ഡ് എന്നിവര്‍ ഓരോ വീതം വിക്കറ്റും സ്വന്തമാക്കി ടീമിന്റെ വിജയത്തില്‍ നിര്‍ണായകമായി.

ക്യാപ്റ്റന്‍ ഷായ് ഹോപ്പിന്റെ സെഞ്ച്വറി കരുത്തിലാണ് വിന്‍ഡീസ് വമ്പന്‍ സ്‌കോറിലെത്തിയത്. ബാക് ടു ബാക് സിക്‌സര്‍ പറത്തി നേരിട്ട 50ാം പന്തില്‍ പുറത്താകാതെ 102* റണ്‍സാണ് ഹോപ്പ് അടിച്ചെടുത്തത്. 204.00 എന്ന പ്രഹര ശേഷിയില്‍ ഒമ്പത് സിക്‌സും നാല് ഫോറും ഉള്‍പ്പെടെയാണ് ഹോപ്പ് സെഞ്ച്വറി പൂര്‍ത്തിയാക്കിയത്. അന്താരാഷ്ട്ര ടി-20യില്‍ താരത്തിന്റെ മൂന്നാം സെഞ്ച്വറിയാണിത്.

ഈ വിജയത്തോടെ അഞ്ച് മത്സരങ്ങള്‍ അടങ്ങുന്ന പരമ്പരയില്‍ 2-2ന് സമനില പിടിക്കാന്‍ വിന്‍ഡീസിന് സാധിച്ചിരിക്കുകയാണ്. പരമ്പരയിലെ അഞ്ചാമത്തെയും അവസാനത്തെയും നിര്‍ണായക മത്സരം ഒക്ടോബര്‍ 17ന് ബെംഗളൂരുവിലെ ചിന്നസ്വാമി സ്റ്റേഡിയത്തിലാണ്.

Content Highlight: India Complete 2000 Sixes In International T-20

Related Topics

India VS West Indies