ശ്രീലങ്കയില് നടക്കുന്ന ത്രി രാഷ്ട്ര പരമ്പരയ്ക്കുള്ള ഇന്ത്യ എ സ്ക്വാഡ് പ്രഖ്യാപിച്ചു. 15 അംഗങ്ങളടങ്ങുന്ന സ്ക്വാഡാണ് ബി.സി.സി.ഐ പ്രഖ്യാപിച്ചത്. ശ്രീലങ്കയും അഫ്ഗാനിസ്ഥാനുമാണ് പരമ്പരയില് ഇന്ത്യയുടെ എതിരാളി.
വിക്കറ്റ് കീപ്പര് ബാറ്റര് ധ്രുവ് ജുറെലിനെ ക്യാപ്റ്റന്സി ഏല്പ്പിച്ചാണ് ഇന്ത്യ കളത്തിലിറങ്ങുന്നത്. വൈസ് ക്യാപ്റ്റനായി ദേവ്ദത്ത് പടിക്കലാണ് സ്ഥാനമേറ്റത്. സീനിയര് താരമായ ഋതുരാജ് ഗെയ്ക്വാദും ടീമില് ഇടം നേടിയിട്ടുണ്ട്.
2026ലെ ഐ.പി.എല്ലില് തിളങ്ങിയതോടെയാണ് പല താരങ്ങളും സ്ക്വാഡില് ഇടം നേടിയത്. ഐ.പി.എല് പ്രകടനത്തിലൂടെ സായ് സുദര്ശന് സ്ക്വാഡില് ഇടം നേടിയിട്ടുണ്ട്. ഇത്തവണത്തെ ഐ.പി.എല് സീസണില് 17 ഇന്നിങ്സില് നിന്ന് 45.13 ശരാശരിയില് 722 റണ്സാണ് താരം നേടിയത്. റണ്വേട്ടക്കാരില് മൂന്നാമനായാണ് സായ് ഫിനിഷ് ചെയ്തത്.
ഒന്നാം സ്ഥാനത്ത് ഉണ്ടായിരുന്ന 15 വയസുകാരന് വെടിക്കെട്ട് വീരന് വൈഭവ് സൂര്യവംശി എ ടീം സ്ക്വാഡില് ഇടം നേടിയിട്ടില്ല. 16 മത്സരങ്ങളില് നിന്ന് 48.50 ശരാശരിയില് 776 റണ്സാണ് താരം നേടിയത്. അതേസമയം ഇന്ത്യയുടെ ടി-20 ടീമിലാണ് താരം ഇടം നേടിയത്.
ചെന്നൈ സൂപ്പര് കിങ്സിന് വേണ്ടി മികച്ച തുടക്കത്തില് മിന്നും ബൗളിങ് പ്രകടനം നടത്തിയ അന്ഷുല് കാംബോജും സ്ക്വാഡില് ഇടം നേടി. രഞ്ജി ട്രോഫിയില് മിന്നും പ്രകടനം നടത്തിയ ശേഷം ദല്ഹി സ്വന്തമാക്കിയ പേസര് ആഖിബ് നബിയും സ്ക്വാഡിലെ അംഗമാണ്.
