സഞ്ജുവല്ല, കിവികളെ നേരിടാന്‍ പന്തിന്റെ പകരക്കാരനിവന്‍!

ന്യൂസിലാന്‍ഡിന് എതിരെയുള്ള ഏകദിന പരമ്പരയില്‍ നിന്ന് പുറത്തായ റിഷബ് പന്തിന് പകരക്കാരനെ പ്രഖ്യാപിച്ച് ബി.സി.സി.ഐ. രാജസ്ഥാന്‍ റോയല്‍സ് താരമായ ധ്രുവ് ജുറെലിനെയാണ് ടീമില്‍ ഉള്‍പ്പെടുത്തിയിരിക്കുന്നത്. താരം ഇന്ത്യന്‍ ക്യാമ്പിനൊപ്പം ചേര്‍ന്നിട്ടുണ്ടെന്ന് ബി.സി.സി.ഐ വാര്‍ത്താകുറിപ്പില്‍ അറിയിച്ചു.

ഒന്നാം ഏകദിനത്തിന് മുന്നോടിയായി നടന്ന പരിശീലന സെഷനിടെ പരിക്കേറ്റാണ് പന്ത് പരമ്പരയില്‍ നിന്ന് പുറത്തായത്. നെറ്റ് സെഷനിടെ ത്രോഡൗണ്‍ സ്‌പെഷ്യലിസ്റ്റ് എറിഞ്ഞ പന്ത് റിഷബിന്റെ ശരീത്തില്‍ കൊള്ളുകയായിരുന്നു. കടുത്ത വേദന അനുഭവപ്പെട്ടതോടെ താരത്തെ ഇന്ത്യന്‍ ടീമിന്റെ മെഡിക്കല്‍ സംഘം പരിശോധിക്കുകയും പിന്നാലെ താരം ഗ്രൗണ്ട് വിടുകയും ചെയ്തു.

റിഷബ് പന്ത്. Photo: x.com

പിന്നീട് പന്തിനെ എം.ആര്‍.ഐ സ്‌കാനിന് വിധേയനാക്കിയെന്നും ബി.സി.സി.ഐ പ്രസ്താവനയിലൂടെ അറിയിച്ചു. സ്‌കാനിങ്ങില്‍ താരത്തിന് സൈഡ് സ്‌ട്രെയിന്‍ (ഓബ്ലിക് മസില്‍ ടിയര്‍) ഉണ്ടെന്നും കണ്ടെത്തി. അതാണ് താരത്തിന് പരമ്പര പൂര്‍ണമായും നഷ്ടമാകാന്‍ കാരണം. ആരോഗ്യം വീണ്ടെടുക്കുന്നതിനായി പന്ത് ബെംഗളൂരുവിലുള്ള സെന്റര്‍ ഓഫ് എക്‌സലന്‍സിലേക്ക് തിരിക്കും.

അതേസമയം, ആഭ്യന്തര ക്രിക്കറ്റിലെ മികവാണ് ധ്രുവ് ജുറെലിന് പന്തിന്റെ പകരക്കാരനായി ഇന്ത്യന്‍ ടീമിലേക്ക് വഴിയൊരുക്കിയത്. വിജയ് ഹസാരെ ട്രോഫിയില്‍ താരം മികച്ച ഫോമിലാണ്. ടൂര്‍ണമെന്റില്‍ ഉത്തര്‍പ്രദേശിനായി ഏഴ് മത്സരങ്ങളില്‍ കളിച്ച് താരം 558 റണ്‍സാണ് നേടിയത്.

ധ്രുവ് ജുറെൽ. Photo: Manu/x.com

മികച്ച ഫോമിലാണെങ്കിലും ജുറെലിന് പ്ലെയിങ് ഇലവനില്‍ സ്ഥാനം കണ്ടെത്താന്‍ സാധിക്കുമോ എന്ന് കണ്ട് തന്നെ അറിയണം. കെ.എല്‍ രാഹുലിനെയാണ് പരമ്പരയില്‍ ഇന്ത്യയുടെ ഫസ്റ്റ് ചോയ്‌സ് വിക്കറ്റ് കീപ്പറായി പരിഗണിക്കുന്നത്. അതിനാല്‍ തന്നെ താരത്തിന് അവസരം ലഭിക്കുമോ എന്ന കാര്യം അനിശ്ചിതത്വത്തിലാണ്.

ന്യൂസിലാന്‍ഡിന് എതിരെയുള്ള ഏകദിന ടീം

ശുഭ്മന്‍ ഗില്‍ (ക്യാപ്റ്റന്‍), രോഹിത് ശര്‍മ, വിരാട് കോഹ്ലി, കെ.എല്‍ രാഹുല്‍ (വിക്കറ്റ് കീപ്പര്‍), ശ്രേയസ് അയ്യര്‍* (വൈസ് ക്യാപ്റ്റന്‍), വാഷിങ്ടണ്‍ സുന്ദര്‍, രവീന്ദ്ര ജഡേജ, മുഹമ്മദ് സിറാജ്, ഹര്‍ഷിത് റാണ, പ്രസിദ്ധ് കൃഷ്ണ, കുല്‍ദീപ് യാദവ്, നിതീഷ് കുമാര്‍ റെഡ്ഡി, അര്‍ഷ്ദീപ് സിങ്, യശസ്വി ജെയ്സ്വാള്‍, ധ്രുവ് ജുറെല്‍ (വിക്കറ്റ് കീപ്പര്‍)

*ഫിറ്റ്‌നസ് ക്ലിയറന്‍സിന് വിധേയം

Content Highlight: Ind vs NZ: Dhruv Jurel named as replacement of Rishabh Pant for New Zealand ODI series