ബ്രസല്സ്: റഷ്യ-ഉക്രൈന് യുദ്ധം നാലാം വര്ഷത്തിലേക്ക് കടക്കുന്നതിനിടെ ഉക്രൈന് ഏറെ നിര്ണായകമായ ഫണ്ട് നല്കാതെ സമ്മര്ദതന്ത്രം പ്രയോഗിച്ച് ഹംഗറി. ഉക്രൈന് നിര്ണായകമായ വായ്പ നല്കുന്ന തീരുമാനത്തെ വീറ്റോ ചെയ്ത ഹംഗറിയുടെ തീരുമാനത്തെ യൂറോപ്യന് യൂണിയനും വിവിധ യൂറോപ്യന് രാജ്യങ്ങളും വിമര്ശിച്ചു.
ഉക്രൈനിലൂടെ ഹംഗറിയിലേക്കും സ്ലോവാക്യയിലേക്കും റഷ്യന് എണ്ണ കൊണ്ടുപോകുന്ന ദ്രുഷ്ബ പൈപ്പ് ലൈന് ഒരു മാസത്തിന് മുമ്പ് ഡ്രോണ് ആക്രമണത്തില് തകര്ന്നിരുന്നു.
ഇതോടെ റഷ്യയില് നിന്നുള്ള എണ്ണയുടെ ഒഴുക്ക് തടസപ്പെട്ടു. പിന്നാലെ പൈപ്പ്ലൈന് പ്രവര്ത്തനം പുനരാരംഭിക്കുന്നത് ഉക്രൈന് മനപൂര്വം വൈകിപ്പിക്കുകയാണെന്ന് ഹംഗറി ആരോപിച്ചിരുന്നു. എണ്ണയുടെ വിതരണം പുനരാരംഭിക്കുന്നത് വരെ ഉക്രൈനെ പ്രധാനപ്പെട്ട തീരുമാനങ്ങളെടുക്കാന് അനുവദിക്കില്ലെന്ന് ഹംഗറിയുടെ വിദേശകാര്യമന്ത്രി പീറ്റര് സിര്ജാട്ടോ പ്രതികരിച്ചിരുന്നു.
എന്നാല്, ഹംഗറിയുടെ ശാസന അന്തിമ മുന്നറിയിപ്പും ഭീഷണിപ്പെടുത്തലുമാണെന്നായിരുന്നു ഉക്രൈന് വിദേശകാര്യ മന്ത്രാലയത്തിന്റെ പ്രതികരണം.
ഹംഗറിയുടെ നടപടികളെ ‘രാഷ്ട്രീയ അട്ടിമറി’ എന്ന് പോളണ്ട് പ്രധാനമന്ത്രി ഡൊണാള്ഡ് ടസ്ക് വിമര്ശിച്ചു. ഉക്രൈന് പ്രസിഡന്റ് വോളോദിമര് സെലന്സ്കിയും യൂറോപ്യന് സഖ്യകക്ഷികളും തമ്മിലുള്ള ഐക്യദാര്ഢ്യത്തെ തകര്ക്കാന് ഹംഗറി മനപൂര്വം ശ്രമിക്കുകയാണെന്നും വിമര്ശനം ഉയര്ന്നു.
‘ഉക്രേനിയന്, യൂറോപ്യന് സ്വാതന്ത്ര്യം നിലനില്ക്കുമോ എന്ന ചോദ്യമാണ് ഇത് ഉയര്ത്തുന്നത്. റഷ്യ ഈ യുദ്ധം ജയിക്കുന്നില്ല. അവര് ഈ യുദ്ധം ജയിക്കില്ല.നീതിയും ശാശ്വതവുമായ ഒരു സമാധാനവും ഉണ്ടാകുന്നതുവരെ യു.കെ ഉക്രൈനൊപ്പം നില്ക്കും,’ യു.കെ പ്രധാനമന്ത്രി കെയര് സ്റ്റാര്മര് പറഞ്ഞു.
Content Highlight: Hungary vetoes Ukraine funds, opposes Russian sanctions; European Union sanctions Russian officials
