[] നമ്മുടെ ശരീരത്തിലെ ഏറ്റവും പ്രധാനപ്പെട്ട അവയവമാണ് കണ്ണ്.

കണ്ണുള്ളപ്പോഴേ കണ്ണിന്റെ വിലയറിയൂ എന്ന് നാം പറയാറില്ലേ. അതുപോലെതന്നെ കണ്ണില്ലാത്തവരോട് ചോദിക്കണം കാഴ്ച്ചയുടെ വില എന്നും. ഇതില്‍ നിന്നെല്ലാം കണ്ണ് എത്ര മാത്രം പ്രാധാന്യമര്‍ഹിക്കുന്നതാണെന്ന് ഊഹിക്കാം.

കണ്ണിനെ നമ്മള്‍ കുഞ്ഞിനെയെന്ന പോലെ സംരക്ഷിക്കേണ്ടതുണ്ട്. പ്രത്യേകിച്ച് നിങ്ങള്‍ ഏറെ നേരം കമ്പ്യൂട്ടറിനും ടി.വിക്കും മുന്നില്‍ ഇരിക്കുന്ന വ്യക്തികളാണെങ്കില്‍ ഏറെ പരിപാലിക്കേണ്ടതുണ്ട്.

ഏറെനേരം കണ്ണ് ഒരേ സ്ഥാനത്ത് നോക്കിയിരിക്കുന്നതിലൂടെ നിങ്ങളുടെ കണ്ണ്  മാത്രമല്ല ശരീരമൊട്ടാകെ വരളുകയും ക്ഷീണിതമാകുകയും ചെയ്യും.

അതിനാല്‍ തന്നെ മറ്റേത് ശരീരഭാഗത്തെ വ്യായാമത്തിന് വിധേയമാക്കുന്നതിനേക്കാള്‍ പ്രാധാന്യമാണ് കണ്ണിന് വ്യായാമം നല്‍കുന്നത്.

കണ്ണ് ആയാസപ്പെടുന്നതിന്റെ കാരണങ്ങള്‍

മങ്ങിയ വെളിച്ചത്തില്‍ വായിക്കുന്നതും കമ്പ്യൂട്ടര്‍, സ്മാര്‍ട്‌ഫോണ്‍, വീഡിയോതുടങ്ങിയ ഡിജിറ്റല്‍ ഡിവൈസുകളില്‍ ഏറെ നേരം നോക്കിയിരിക്കുന്നതും ഇമ ചിമ്മാതെ എന്തെങ്കിലും വസ്തുവില്‍ ഏറെ നേരം നോക്കിയിരിക്കുന്നതുമെല്ലാം കണ്ണിന് ഏറെ ആയാസം നല്‍കും.

വ്യായാമം പ്രാധാന്യം

കണ്ണിന് വ്യായാമം നല്‍കുന്നതിലൂടെ കണ്ണിലെ മസിലുകള്‍ ഏകോപിക്കുകയും ശക്തിപ്പെടുകയും ചെയ്യും.

ഇത് ഒരു വസ്തുവില്‍ ഫോക്കസ് ചെയ്യാനുള്ള കഴിവിനെ വര്‍ധിക്കുകയും രണ്ട് കണ്ണുകള്‍ക്കുമിടയിലുള്ള ഒപ്റ്റിക്കല്‍ ഇമേജ് കോഓര്‍ഡിനേഷനെ മെച്ചപ്പെടുത്തുകയും ചെയ്യും.

വ്യായാമത്തിലൂടെ കണ്ണട  ഒഴിവാക്കാം എന്ന നേട്ടം മാത്രമല്ല ആരോഗ്യകരമായ കണ്ണുകള്‍ ലഭിക്കും എന്നൊരു നേട്ടം കൂടിയുണ്ട്.

കണ്ണ് വട്ടത്തില്‍ കറക്കുക

കണ്ണ് ക്ലോക്കിലെ സൂചി പോലെ വട്ടത്തില്‍ കറക്കുന്നത് വളരെ നല്ല വ്യായാമമാണ്. ഓരോ മുപ്പത് മിനുട്ടിന് ശേഷവും ഇങ്ങനെ കണ്ണ് ഇരുവശത്തേക്കും വട്ടത്തില്‍ കറക്കണം.

ഏറെ നേരം കമ്പ്യൂട്ടറിന് മുന്നില്‍ ഇരിക്കുന്നവരും പുസ്തകം വായിക്കുന്നവരും തീര്‍ച്ചയായും ചെയ്തിരിക്കേണ്ട ഒന്നാണിത്.

ഉള്ളംകൈകൊണ്ട് കണ്ണിനെ മൂടുക

കണ്ണടച്ചതിന് ശേഷം ഉള്ളംകൈ കൊണ്ട് പതുക്കെ നിങ്ങളുടെ കണ്ണുകള്‍ മൂടണം.

മൂടുന്നത് ബലം പ്രയോഗിച്ചായിരിക്കരുത്. കണ്ണിന് യാതൊരു വിധത്തിലും സമ്മര്‍ദ്ദം നല്‍കരുത്. ഇങ്ങനെ ചെയ്യുന്നതിലൂടെ കണ്ണിന്റെ ക്ഷീണം അകലുകയും ആശ്വാസം നല്‍കുകയും ചെയ്യും.

പ്രതിദിനം 8-10 മണിക്കൂര്‍ കമ്പ്യൂട്ടറിന് മുന്നില്‍ സമയം ചിലവഴിക്കുന്നവര്‍ ഓരോ മണിക്കൂറിലും ഒന്നുരണ്ട് മിനിട്ട് ഇടവേളയെടുത്ത് ഇത്തരത്തില്‍ വിശ്രമം നല്‍കേണ്ടതാണ്. ഇല്ലെങ്കില്‍ ഇത് ഡ്രൈ ഐ എന്ന രോഗത്തിന് കാരണമാകും.

ഒരു വസ്തുവില്‍ കേന്ദ്രീകരിക്കുക:

നിങ്ങളില്‍ നിന്ന് ഏറെ അകലെയുള്ള ഒരു വസ്തുവിലേക്ക് ഒരു മിനുട്ടിന്റെ പകുതിയോളം നോക്കുക.

അതിന് ശേഷം ഏറെ തവണ കണ്ണ് ചിമ്മുക, അതിന്‌ശേഷം കണ്ണിനോട് അടുത്തുള്ള ഒരു വസ്തുവിലേക്ക് 15 സെക്കന്‍ഡ് നോക്കുക, അതിന് ശേഷം വീണ്ടും കണ്ണുകള്‍ കുറച്ച് തവണ ചിമ്മുക. ഇത് പത്ത് പ്രാവശ്യമെങ്കിലും ചെയ്യുന്നത് കണ്ണിന് വളരെ നല്ലതാണ്.

കണ്ണിന്റെ ആരോഗ്യത്തിന് വേണ്ട ഭക്ഷണരീതി

നമ്മുടെ ആഹാരരീതി കണ്ണിന്റെ ആരോഗ്യത്തെയും വളരെയധികം ബാധിക്കുന്ന ഒന്നാണ്. ആരോഗ്യകരമായ ഭക്ഷണരീതിയിലൂടെ കാഴ്ച്ച ശക്തിയെ വര്‍ധിപ്പിക്കാനാവും.

ചീര, മുരിങ്ങ മുതയാല ഇലക്കറികളും കാരറ്റ്, ബീറ്റ്‌റൂട്ട്, പപ്പായ മുതലായ പച്ചക്കറികളും കണ്ണിന്റെ ആരോഗ്യത്തിന് അഭികാമ്യമാണ്.

ഇവയിലടങ്ങിയ അയേണ്‍,  കാത്സ്യം, ഫോളിക് ആസിഡ്, വൈറ്റമിന്‍ എ എന്നിവ കാഴ്ച്ചശക്തി വര്‍ധിപ്പിക്കും.

പാല്‍, ചെറിയ മത്സ്യങ്ങള്‍ മുതലായവയും കണ്ണിന്റെ ആരോഗ്യത്തിന് ഉത്തമമായ ഭക്ഷണങ്ങളാണ്.