ഭുവനേശ്വറിനെ തിരിച്ചുവിളിച്ചത് മികച്ച തീരുമാനം; തുറന്ന് പറഞ്ഞ് മുന്‍ ഇന്ത്യന്‍ താരം അഭിനവ് മുകുന്ദ്

2028ലെ ടി-20 ലോകകപ്പ് മുന്നില്‍കണ്ട് ഇന്ത്യന്‍ നിരയെ കൂടുതല്‍ ശക്തിപ്പെടുത്തണമെന്ന് മുന്‍ ഇന്ത്യന്‍ ബാറ്റര്‍ അഭിനവ് മുകുന്ദ്. ഇന്ത്യക്ക് ബുംറയെ മാത്രം ആശ്രയിക്കാന്‍ സാധിക്കില്ലെന്നും ഭുവനേശ്വര്‍ കുമാറിനെ ഇന്ത്യന്‍ ടീമിലേക്ക് തിരിച്ചുവിളിച്ചത് മികച്ച തീരുമാനമാണെന്നും അഭിനവ് കൂട്ടിച്ചേര്‍ത്തു.

‘ബുംറയെ മാത്രം ആശ്രയിച്ച് മുന്നോട്ടുപോകാനാകില്ല. ടെസ്റ്റ്, ഏകദിനം, ടി-20 എന്നീ മൂന്ന് ഫോര്‍മാറ്റുകളിലും കളിക്കാന്‍ ബുംറ വളരെ മികച്ച താരമാണെന്ന് സെലക്ടര്‍മാര്‍ കരുതുന്നുണ്ടാകാം. എന്നാല്‍ അര്‍ഷ്ദീപ് സിങ്ങിനൊപ്പം പന്തെറിയാന്‍ മറ്റൊരു ബൗളറെയും കണ്ടെത്തേണ്ടതുണ്ട്.

ബുംറയ്ക്കൊപ്പം അര്‍ഷ്ദീപിന്റെ പ്രധാന ചുമതല ആദ്യ ഓവര്‍ എറിയുക എന്നതാണ്. ഇതുവരെ അര്‍ഷ്ദീപിന്റെ ഏറ്റവും വലിയ കരുത്തും അതുതന്നെയായിരുന്നു. ഇക്കാര്യത്തില്‍ താരത്തിന് മികച്ച അനുഭവസമ്പത്തുണ്ട്. ബുംറയ്‌ക്കൊപ്പം കളിപ്പിച്ചും പരിശീലിപ്പിച്ചുമാണ് ടീം അര്‍ഷ്ദീപിനെ വളര്‍ത്തിയെടുത്തത്.

ഭുവനേശ്വര്‍ കുമാര്‍ വീണ്ടും ടീമിന്റെ പരിഗണനയിലേക്ക് എത്തിയിട്ടുണ്ട്. 2028ലെ ലോകകപ്പ് വര്‍ഷത്തിന്റെ ആദ്യ പകുതിയിലാണ് നടക്കുന്നത്. അതിനാല്‍, ടീമിന്റെ സന്തുലിതാവസ്ഥ എങ്ങനെ നിലനിര്‍ത്തണം, മുന്നോട്ടുള്ള പദ്ധതികള്‍ എന്തായിരിക്കണം എന്നതിനെക്കുറിച്ച് ഇപ്പോള്‍ തന്നെ ചിന്തിക്കേണ്ടതുണ്ട്. ഭുവനേശ്വര്‍ കുമാറിനെ വീണ്ടും ടീമിലേക്ക് കൊണ്ടുവന്നത് ശരിയായ തീരുമാനമാണെന്നാണ് എന്റെ അഭിപ്രായം,’ അഭിനവ് മുകുന്ദ് ക്രിക്ക് ഇന്‍ഫോയിലെ ചര്‍ച്ചയില്‍ പറഞ്ഞു.

ഇന്ത്യയും വെസ്റ്റ് ഇന്‍ഡീസും തമ്മിലുള്ള അഞ്ച് മത്സരങ്ങള്‍ അടങ്ങുന്ന ടി-20 പരമ്പരയിലെ അവസാന മത്സരത്തില്‍ സര്‍പ്രൈസ് എന്‍ട്രി ആയിട്ടാണ് സൂപ്പര്‍ പേസര്‍ ഭുവനേശ്വര്‍ കുമാര്‍ ടീമില്‍ എത്തിയത്. ഭുവി ഇന്ത്യയ്‌ക്കൊപ്പം ചേര്‍ന്നെങ്കിലും മഴ കാരണം ഒരു പന്ത് പോലും എറിയാന്‍ സാധിക്കാതെ മത്സരം ഉപേക്ഷിക്കുകയായിരുന്നു. പരമ്പര 2-2ന് സമനിലയിലാകുകയും ചെയ്തു.

നേരത്തെ ന്യൂസിലാന്‍ഡിനെതിരായ ടി-20 പരമ്പരയ്ക്കുള്ള ഇന്ത്യന്‍ സ്‌ക്വാഡില്‍ ഭുവനേശ്വറിനെ ഉള്‍പ്പെടുത്തിയിരുന്നു. നാല് വര്‍ഷങ്ങള്‍ക്കുശേഷമാണ് ഭുവി ഇന്ത്യന്‍ ജേഴ്സിയിലേക്ക് തിരിച്ചെത്തുന്നത് എന്ന പ്രത്യേകതയും ഉണ്ട്.

ന്യൂസിലാന്‍ഡിനെതിരായ ഇന്ത്യ സ്‌ക്വാഡ്

ശ്രേയസ് അയ്യര്‍ (ക്യാപ്റ്റന്‍), അഭിഷേക് ശര്‍മ, സഞ്ജു സാംസണ്‍ (വിക്കറ്റ് കീപ്പര്‍), ഇഷാന്‍ കിഷന്‍ (വിക്കറ്റ് കീപ്പര്‍), വൈഭവ് സൂര്യവംശി, തിലക് വര്‍മ (വൈസ് ക്യാപ്റ്റന്‍), അക്‌സര്‍ പട്ടേല്‍, ശിവം ദുബെ, നിതീഷ് കുമാര്‍ റെഡ്ഡി, നമന്‍ ധിര്‍, മായങ്ക് യാദവ്, പ്രിന്‍സ് യാദവ്, അര്‍ഷ്ദീപ് സിങ്, ഭുവനേശ്വര്‍ കുമാര്‍, വരുണ്‍ ചക്രവര്‍ത്തി, കുല്‍ദീപ് യാദവ്.