കൗണ്ടര്‍ എക്‌സ്ട്രീമിസം പ്രൊജ്ക്ടിന്റെ ഭാഗമായി മുതലാളിത്ത വിരുദ്ധ ആശയങ്ങള്‍ (തീവ്ര ആശയങ്ങള്‍ തടയുന്നതിനായി) സ്‌കൂളുകളിലെ പാഠഭാഗങ്ങളില്‍ നിന്ന് ഒഴിവാക്കാനുള്ള ബ്രിട്ടീഷ് സര്‍ക്കാരിന്റെ നീക്കം പൗര സ്വാതന്ത്ര്യത്തിനും, രാഷ്ട്രീയ അവകാശങ്ങള്‍ക്കും മേലുള്ള ഏറ്റവും പുതിയ ആക്രമണമാണ്.
ഇംഗ്ലണ്ടിലെ സ്‌കൂളുകള്‍ക്ക് വിദ്യാഭ്യാസ വകുപ്പ് നല്‍കിയ മാര്‍ഗനിര്‍ദേശത്തില്‍ മുതലാളിത്തത്തെ അട്ടിമറിക്കാനുള്ള നീക്കങ്ങള്‍ തീവ്ര രാഷ്ട്രീയ നിലപാടാണെന്നാണ് അവകാശപ്പെടുന്നത്. അതുകൊണ്ട് തന്നെ അധ്യാപകര്‍ക്ക് ക്ലാസില്‍ മുതലാളിത്തതിന് എതിരായ കാഴ്ച്ചപ്പാടുകള്‍ പ്രകടിപ്പിക്കാനോ അത്തരം ആശയങ്ങള്‍ ഉള്‍ക്കൊള്ളുന്ന സംഘടനകളില്‍ നിന്നുള്ള വിഭവങ്ങള്‍ പഠനാവശ്യത്തിനായി ഉപയോഗിക്കാനോ കഴിയില്ല.
അധ്യാപകര്‍ ഉപയോഗിക്കുന്ന മെറ്റീരിയലുകള്‍ തീവ്രമല്ലെങ്കില്‍ പോലും ഇവ ക്ലാസ്‌റൂമില്‍ ഉപയോഗിക്കുന്നത് അത്തരം സംഘടനകളെ പിന്താങ്ങുന്നതിന് തുല്യമാണെന്നാണ് ബ്രിട്ടീഷ് വിദ്യാഭ്യാസ വകുപ്പ് പറയുന്നത്.
ഈ ആശയം മനസിലാക്കാന്‍ അല്‍പം പ്രയാസമാണെങ്കിലും ഇത് പ്രതിഫലിപ്പിക്കുന്നതും അടിവരിയിടുന്നതും രാഷ്ട്രീയമായ എതിരഭിപ്രായങ്ങള്‍ ഒന്നാകെ ഇല്ലായ്മ ചെയ്യാനുള്ള ഭരണകൂടത്തിന്റെ ശ്രമങ്ങളെയാണ്.
സര്‍ക്കാരിന്റ കൗണ്ടര്‍ എക്‌സ്ട്രീം പ്രൊജക്റ്റിനെ വിമര്‍ശിക്കുന്ന ആളുകള്‍ വ്യാപകമായി ടാര്‍ഗറ്റ് ചെയ്യപ്പെടുകയാണ് ബ്രിട്ടനില്‍. പൊതുമേഖല സ്ഥാപനങ്ങളിലെ തൊഴിലാളികള്‍, വിവിധ വിഭാഗങ്ങളിലുള്ളവര്‍ തുടങ്ങി ബ്രിട്ടീഷ് സര്‍ക്കാരിന്റെ ആശയങ്ങളെ എതിര്‍ക്കുന്നവരെയെല്ലാം ലക്ഷ്യം വെക്കുന്ന പ്രവണതയാണ് ഇപ്പോഴുണ്ടാകുന്നത്.
നമ്മുടെ സര്‍ക്കാരുകള്‍ക്ക് സാമൂഹിക പ്രശ്‌നങ്ങള്‍ക്ക് പരിഹാരം കാണുന്നതില്‍ ഒരു വിധത്തിലുള്ള താത്പര്യവുമില്ല. ഇത്തരം നടപടികളെ വിവേകമില്ലാത്ത നയങ്ങളുടെ മാത്രം പ്രശ്‌നമായി കാണാനാകില്ല. ഭീകരതയ്‌ക്കെതിരായ യുദ്ധം എന്നു പ്രഖ്യാപിച്ചുകൊണ്ട് രാഷ്ട്രീയ സ്വാതന്ത്ര്യത്തിനും പൗരാവകാശങ്ങള്‍ക്കും നേരെയുള്ള ബ്രിട്ടീഷ് സര്‍ക്കാരിന്റെ കടന്നുകയറ്റത്തിന്റെ ഏറ്റവും പുതിയ മുഖമാണിത്.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
യു.കെ സര്‍ക്കാരിന്റെ കൗണ്ടര്‍ എക്‌സ്ട്രീമിസം പദ്ധതിയ്ക്ക് തീവ്രവാദ ആശയങ്ങള്‍ ചെറുത്ത് തോത്പിക്കുന്നതുമായി ഒരു ബന്ധവുമില്ല. അങ്ങനെയുണ്ടായിരുന്നെങ്കില്‍ അത് ‘അപകടകരമായ’ ആശയങ്ങളെ കുഴിച്ചുമൂടാന്‍ ശ്രമിക്കുകയില്ല.
പകരം പ്രൊഫഷണലുകള്‍ക്ക് ആവശ്യമായ മെറ്റീരിയല്‍സ് നല്‍കികൊണ്ട് വിദ്യാഭ്യാസ മേഖലയിലും പൗരസമൂഹത്തിലും സ്വതന്ത്രമായി ഇത്തരം വിഷയങ്ങള്‍ ചര്‍ച്ച ചെയ്യപ്പെടാനും സംവാദം നടത്താനുമുള്ള തുറന്ന വേദികള്‍ സൃഷ്ടിക്കുകയാണ് ചെയ്യുക.
അതാകുമ്പോള്‍ എന്തുകൊണ്ടാണ് വിദ്വേഷപരമായ ആശയങ്ങള്‍ ഉണ്ടാകുന്നതെന്ന് മനസിലാക്കാന്‍ സാധിക്കും, ഇതില്‍ തന്നെ പലതും ആഴമേറിയ ഒറ്റപ്പെടലിന്റെയും പ്രത്യാശയില്ലായ്മയുടെയും ഭാഗമായി ഉരുത്തിരിഞ്ഞു വന്നതാണ്.
സ്റ്റേറ്റ് ഇവിടെ റേസിസം, സെക്‌സിസം, ഹോമോഫോബിയ തുടങ്ങിയവയ്‌ക്കെതിരെ നടക്കുന്ന അപകടകരമായ അക്രമത്തെക്കുറിച്ച് പ്രതിപാദിക്കുകയോ അവയെ ചെറുക്കുന്നതിനുള്ള മാര്‍ഗങ്ങള്‍ തേടുകയോ ചെയ്യുന്നില്ല.
പകരം ദാരിദ്ര്യം, പൊലീസ് ക്രൂരത, തൊഴിലില്ലായ്മ, കുറയുന്ന ക്ഷേമ സേവനങ്ങള്‍ തുടങ്ങി, നമ്മുടെ സമൂഹത്തെ ബാധിക്കുന്ന സാമൂഹിക പ്രതിസന്ധികളോടുള്ള രാഷ്ട്രീയ പ്രതികരണങ്ങളെ പരിമിതപ്പെടുത്താനുള്ള നടപടികള്‍ സ്വീകരിക്കുകയാണ്.
രാഷ്ട്രീയ വിഷയങ്ങള്‍ ചര്‍ച്ചചെയ്യുന്ന ഇടങ്ങളെയെല്ലാം ദുര്‍ബലപ്പെടുത്തുകയാണ് സര്‍ക്കാര്‍ ചെയ്യുന്നത്.
സമ്പന്നരെ മാത്രം പരിഗണിക്കുകയും ദരിദ്രരെ അവഗണിക്കുകയും ചെയ്യുന്ന മുതലാളിത്ത അനുകൂല നയങ്ങള്‍ മൂലം ദശലക്ഷക്കണക്കിന് ജനങ്ങള്‍ ദുരിതം അനുഭവിക്കുന്നുണ്ട്. ജനങ്ങളെ ബലിയാടാക്കി വന്‍കിട ബിസിനസുകാരെ അഭിവൃദ്ധി പ്രാപിക്കാന്‍ അനുവദിക്കുകയാണ് മുതലാളിത്ത അനുകൂല സര്‍ക്കാര്‍.
സാമൂഹിക ക്ഷേമത്തിനായുള്ള അടിസ്ഥാന ആശയങ്ങളായ ആരോഗ്യം, വിദ്യാഭ്യാസം, സാമൂഹിക പരിപാലനം തുടങ്ങിയവ ഏറ്റവും കൂടുതല്‍ തുക ലേലം വിളിച്ചവര്‍ക്ക് വില്‍പ്പനയ്ക്ക് വെക്കുകയാണ്.
ടോറികള്‍(കണ്‍സേര്‍വേറ്റീവ് പാര്‍ട്ടിയിലെ ആളുകളെ വിളിക്കുന്നത്) വിഭാവനം ചെയ്യുന്ന സാമ്പത്തിക തത്വചിന്ത സ്വകാര്യ ലാഭത്തിനായി ഭൂരിപക്ഷത്തിന്റെ ജീവിതത്തെ ഹിതകരമായി ബാധിക്കുന്നതാണ്. ഇത് കൊവിഡ് 19 സമയത്ത് ഒഴിവാക്കാന്‍ സാധിക്കുമായിരുന്ന എണ്ണമറ്റ മരണങ്ങള്‍ക്ക് കാരണമാവുകയും ചെയ്തു.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
