2026 ടി-20 ലോകകപ്പില് കിരീടമണിഞ്ഞ് ഇന്ത്യ ടൂര്ണമെന്റിന്റെ ചരിത്രം തന്നെ തിരുത്തിയിരിക്കുകയാണ്. ലോകകപ്പില് സ്വന്തം മണ്ണില് കിരീടം നേടുന്ന ആദ്യ ടീം എന്ന നേട്ടവും കിരീടം നിലനിര്ത്തുന്ന ആദ്യ ടീം എന്ന നേട്ടവും ഇന്ത്യ സ്വന്തമാക്കി.
ഇതോടെ രോഹിത് ശര്മയ്ക്ക് ശേഷം ഇന്ത്യയ്ക്കായി രണ്ട് ടി-20 ലോകകപ്പ് നേടുന്ന താരങ്ങളുടെ പട്ടികയില് ക്യാപ്റ്റന് സൂര്യകുമാര് യാദവും സഞ്ജുവും ബുംറയും അടക്കം ഒമ്പത് താരങ്ങളും ഇടം പിടിച്ചു.
ഇക്കൂട്ടത്തില് തുടര്ച്ചയായി മൂന്ന് ഐ.സി.സി കിരീടം നേടുന്ന നാല് താരങ്ങളുമുണ്ട്. 2024 ടി-20 ലോകകപ്പിനും 2026 ടി-20 ലോകകപ്പിനും പുറമെ 2025 ചാമ്പ്യന്സ് ട്രോഫിയും നേടിയ താരങ്ങള്. ഹര്ദിക് പാണ്ഡ്യ, അക്സര് പട്ടേല്, കുല്ദീപ് യാദവ്, അര്ഷ്ദീപ് സിങ് എന്നിവരാണ് ഇന്ത്യയ്ക്കായി തുടര്ച്ചയായി മൂന്ന് കിരീടം നേടിയ താരങ്ങള്.
2024 ലോകകപ്പ് ഫൈനലില് സൗത്ത് ആഫ്രിക്കയെ പരാജയപ്പെടുത്തിയാണ് ഇന്ത്യ ഏറെ നാളത്തെ കിരീടവരള്ച്ചയ്ക്ക് അന്ത്യം കുറിച്ചത്. ബാര്ബഡോസിലെ കെന്സിങ്ടണ് ഓവലില് നടന്ന മത്സരത്തില് ഏഴ് റണ്സിനായിരുന്നു ഇന്ത്യയുടെ വിജയം. ഇന്ത്യ ഉയര്ത്തിയ 177 റണ്സിന്റെ വിജയലക്ഷ്യം പിന്തുടര്ന്നിറങ്ങിയ സൗത്ത് ആഫ്രിക്കയുടെ പോരാട്ടം എട്ട് വിക്കറ്റ് നഷ്ടത്തില് 169ല് അവസാനിച്ചു.
അപരാജിതരായി ടി-20 ലോകകപ്പ് നേടിയ അതേ മാസ്മരിക പ്രകടനം 2025 ചാമ്പ്യന്സ് ട്രോഫിയിലും ആവര്ത്തിച്ചാണ് ഇന്ത്യ ഒരിക്കല്ക്കൂടി ക്രിക്കറ്റ് ലോകത്തെ ഞെട്ടിച്ചത്. 2024ല് ഇന്ത്യയെ കുട്ടിക്രിക്കറ്റിന്റെ നെറുകയിലെത്തിച്ച രോഹിത്തിന് പുറമെ വിരാട് കോഹ്ലി, ഹര്ദിക് പാണ്ഡ്യ, രവീന്ദ്ര ജഡേജ, അക്സര് പട്ടേല്, കുല്ദീപ് യാദവ്, അര്ഷ്ദീപ് സിങ് എന്നിവരും തുടര്ച്ചയായ രണ്ടാം കിരീടം ചൂടി.
