ഏഷ്യാ കപ്പിനുള്ള ആരാധകരുടെ കാത്തിരിപ്പ് അവസാനിക്കാന് ഇനി നാല് ദിവസങ്ങള് മാത്രം. 2023ല് നേടിയ കിരീടം നിലനിര്ത്താനുറച്ച് കളത്തിലിറങ്ങുന്ന ഇന്ത്യയ്ക്ക് തന്നെയാണ് ഇത്തവണയും കിരീടസാധ്യത കല്പിക്കുന്നത്.
സൂര്യകുമാര് യാദവിന് കീഴില് ഒമ്പതാം ഏഷ്യാ കപ്പാണ് ഇന്ത്യ ലക്ഷ്യമിടുന്നത്. ഇതിന് പോന്ന താരങ്ങള് തന്നെയാണ് ഇന്ത്യന് സ്ക്വാഡിലുള്ളത്.
അന്താരാഷ്ട്ര ടി-20യില് ഇന്ത്യയ്ക്കായി 100 വിക്കറ്റ് പൂര്ത്തിയാക്കുന്ന ചരിത്രത്തിലെ ആദ്യ താരമെന്ന നേട്ടമാണ് അര്ഷ്ദീപിന് മുമ്പിലുള്ളത്.
കരിയറിലെ 63 ഇന്നിങ്സില് നിന്നും 99 വിക്കറ്റുകളാണ് നിലവില് അര്ഷ്ദീപിന്റെ പേരിലുള്ളത്. 18.30 ശരാശരിയിലും 13.23 സ്ട്രൈക്ക് റേറ്റിലുമാണ് താരം പന്തെറിയുന്നത്. രണ്ട് തവണ നാല് വിക്കറ്റ് നേട്ടം സ്വന്തമാക്കിയ താരത്തിന്റെ ഏറ്റവും മികച്ച ബൗളിങ് പ്രകടനം 2024 ലോകകപ്പില് യു.എസ്.എയ്ക്കെതിരെ നേടിയ 4/9 ആണ്.
അന്താരാഷ്ട്ര ടി-20യില് ഇന്ത്യയ്ക്കായി ഏറ്റവുമധികം വിക്കറ്റ് നേടിയ താരങ്ങള്
(താരം – ഇന്നിങ്സ് – വിക്കറ്റ് എന്നീ ക്രമത്തില്)
അര്ഷ്ദീപ് സിങ് – 63 – 99
യൂസ്വേന്ദ്ര ചഹല് – 79 – 96
ഹര്ദിക് പാണ്ഡ്യ – 102 – 94
ഭുവനേശ്വര് കുമാര് – 86 – 90
ജസ്പ്രീത് ബുംറ – 69 – 89
ഈ ഏഷ്യാ കപ്പില് തന്നെ ഹര്ദിക് പാണ്ഡ്യയ്ക്കും ജസ്പ്രീത് ബുംറയ്ക്കും നൂറ് വിക്കറ്റ് നേടാനുള്ള അവസരവും മുമ്പിലുണ്ട്.
ടൂര്ണമെന്റില് ഗ്രൂപ്പ് എ-യിലാണ് ഇന്ത്യ ഇടം പിടിച്ചിരിക്കുന്നത്. പതിവ് തെറ്റിക്കാതെ പാകിസ്ഥാനും ഗ്രൂപ്പ് എ-യില് ഇന്ത്യയ്ക്കൊപ്പമുണ്ട്. യു.എ.ഇയും ഒമാനുമാണ് ഗ്രൂപ്പിലെ മറ്റ് ടീമുകള്.
