ഫലസ്തീന് അനുകൂല പ്രതിഷേധങ്ങളുടെ ഭാഗമായി ജര്മന് വിസ നിഷേധിച്ച ഗ്രീസിലെ മുന് ധന മന്ത്രി യാനിസ് വരൂഫാകിസ് കഴിഞ്ഞ വര്ഷം എഴുതിയ ലേഖനം|
ഗസയില് കുന്നുകൂടുന്ന മൃതദേഹങ്ങള് കാണുന്ന യുവ ജര്മന് തലമുറയ്ക്ക് ഇത്തരം തത്വങ്ങളെ ചോദ്യം ചെയ്യാന് ഭയമില്ല എന്നതാണ്. ജര്മനിയുടെ ജനാധിപത്യത്തെയും നിയമവാഴ്ചയെയും സാമാന്യബോധത്തെയും അപകടത്തിലാക്കുന്ന ഈ നിലപാടുകളെ അവര് എതിര്ക്കുന്നു ഏക ആശ്വാസം. അതുകൊണ്ടാണ്, വിലക്കുണ്ടായിട്ടും ജര്മനിയുടെ കാര്യത്തില് ഞാന് ഇപ്പോഴും പ്രത്യാശ കൈവിടാത്തത് | മൊഴിമാറ്റം എ.കെ. രമേഷ്
മൂന്നാഴ്ച മുമ്പ്, ജര്മനിയില് പ്രവേശിക്കുന്നതില് നിന്ന് എന്നെ വിലക്കി. ആരാണ് ഈ തീരുമാനമെടുത്തത്, എപ്പോള്, എന്തടിസ്ഥാനത്തില് എന്ന് ഞാന് ജര്മന് അധികൃതരോട് ചോദിച്ചപ്പോള് ലഭിച്ച ഔദ്യോഗിക മറുപടി ഇതായിരുന്നു, രാജ്യസുരക്ഷാ കാരണങ്ങളാല് എന്റെ ചോദ്യങ്ങള്ക്ക് ഔദ്യോഗികമായ മറുപടി നല്കാനാവില്ല.
പെട്ടെന്ന് എന്റെ മനസ്സ് മറ്റൊരു കാലഘട്ടത്തിലേക്ക് ഓടിപ്പോയി. പത്താം വയസില് ജര്മനിയെ ഏകാധിപത്യത്തില് നിന്നുള്ള ഒരു അഭയസ്ഥാനമായി ഞാന് കണ്ടിരുന്ന കാലത്തേക്ക്.
യാനിസ് വരൂഫാകിസ് . Photo: Wikipedia
ഗ്രീസിലെ ഫാസിസ്റ്റ് ഭരണകാലത്ത് വിദേശ റേഡിയോ പ്രക്ഷേപണങ്ങള് കേള്ക്കുന്നത് നിരോധിച്ചിരുന്നു. അതിനാല് എല്ലാ വൈകുന്നേരവും ഒമ്പത് മണിയോടെ എന്റെ മാതാപിതാക്കള് ഒരു ചുവന്ന പുതപ്പിനുള്ളില് ഒളിച്ചിരുന്ന്, ഒരു ഷോര്ട്ട് വേവ് വയര്ലെസ് സെറ്റിലൂടെ ‘ഡ്യൂഷ് വെല്ലെ’യുടെ (Deutsche Welle) ഗ്രീക്ക് പ്രക്ഷേപണം കേള്ക്കാന് ശ്രമിക്കുമായിരുന്നു.
ജര്മനി എന്ന ആ സാങ്കല്പ്പിക രാജ്യം ‘ജനാധിപത്യവാദികളുടെ സുഹൃത്താണെന്ന്’ എന്റെ മാതാപിതാക്കള് എന്നോട് പറഞ്ഞിരുന്നു.
വര്ഷങ്ങള്ക്ക് ശേഷം, 2015ല് ജര്മന് മാധ്യമങ്ങള് എന്നെ ജര്മനിയുടെ ശത്രുവായി ചിത്രീകരിച്ചു. ഞാന് സ്തംഭിച്ചുപോയി; സത്യം അതില് നിന്ന് ഏറെ അകലെയായിരുന്നു.
ഗ്രീസിന്റെ ധനമന്ത്രി എന്ന നിലയില്, ജര്മന് സര്ക്കാര് അടിച്ചേല്പ്പിച്ച കടുത്ത സാമ്പത്തിക നിയന്ത്രണങ്ങളെ (austerity) ഞാന് എതിര്ത്തത് അത് ഗ്രീക്കുകാര്ക്ക് ദുരന്തമാകുമെന്നതുകൊണ്ട് മാത്രമല്ല, മറിച്ച് ജര്മന്കാരുടെ ദീര്ഘകാല താത്പര്യങ്ങള്ക്ക് അത് ദോഷകരമാകുമെന്ന് ഞാന് കരുതിയതുകൊണ്ടു കൂടിയാണ്.
ഇന്ന് ജര്മനിയില് കാണുന്ന വ്യവസായ തകര്ച്ച അന്ന് ഞാന് നടത്തിയ പ്രവചനങ്ങളുമായി പൊരുത്തപ്പെടുന്നതാണ്.
2016ല്, ഞാന് സ്ഥാപിക്കാന് സഹായിച്ച ‘ഡീം25’ (DiEM25) എന്ന പാന്-യൂറോപ്യന് രാഷ്ട്രീയ പ്രസ്ഥാനത്തിന് തുടക്കം കുറിക്കാന് ഒരു യൂറോപ്യന് തലസ്ഥാനം തെരഞ്ഞെടുക്കുമ്പോള്, ഞാന് കണ്ടെത്തിയത് ബെര്ലിന് ആയിരുന്നു.
DiEM25
‘ബെര്ലിനില് നിന്ന് തുടങ്ങുന്നില്ലെങ്കില് യൂറോപ്പില് നല്ലതൊന്നും സംഭവിക്കില്ല’ എന്ന് അന്ന് ബെര്ലിനിലെ വോക്സ്ബൂണ് തിയേറ്ററില് ഞാന് വിശദീകരിച്ചു.
ആ ബന്ധം ഊട്ടിയുറപ്പിക്കാന്, 2019ലെ യൂറോപ്യന് പാര്ലമെന്റ് തെരഞ്ഞെടുപ്പില് എനിക്ക് എളുപ്പത്തില് ജയിക്കാവുന്ന ഗ്രീസിന് പകരം ജര്മനിയില് നിന്ന് മത്സരിക്കാനാണ് ഞാന് തീരുമാനിച്ചത്.
ഗോഥെയുടെയും ഹേഗലിന്റെയും ബ്രെഹ്തിന്റെയും മണ്ണുമായുള്ള എന്റെ ഈ ദീര്ഘകാല ബന്ധം കണക്കിലെടുക്കുമ്പോള്, ജര്മനിയിലെ മധ്യ-ഇടതുപക്ഷ സര്ക്കാരിന്റെ ഈ വിലക്ക് തികച്ചും അവിശ്വസനീയമാണ്.
വിലക്കിന് പിന്നിലെ കാരണം അറിയാനുള്ള അവകാശം നിഷേധിക്കപ്പെട്ടതിന്റെ നിയമവശത്തെപ്പറ്റി എന്റെ അഭിഭാഷകര് തീരുമാനിക്കട്ടെ.
യാനിസ് ഫാരുവാക്കിസ്
ഞാന് ജര്മനിയുടെ ദേശീയ സുരക്ഷയ്ക്ക് ഭീഷണിയാണെന്ന തെറ്റായ പ്രചാരണം ഉണ്ടാക്കുന്ന സുരക്ഷാ പ്രശ്നങ്ങളെയും ഞാന് തത്കാലം മാറ്റിവെക്കുന്നു. സ്വതന്ത്രമായ സഞ്ചാരവും ഒത്തുചേരലും മൗലിക മൂല്യങ്ങളായി കാണുന്ന ഒരു യൂറോപ്യന് യൂണിയനില് ഈ വിലക്കിന്റെ അര്ത്ഥമെന്താണ് എന്ന് ഞാന് ഇപ്പോള് വിശകലനം ചെയ്യുന്നില്ല.
പകരം, ഈ വിലക്കിന്റെ ആഴത്തിലുള്ള അര്ത്ഥത്തെക്കുറിച്ച് സംസാരിക്കാനാണ് ഞാന് ആഗ്രഹിക്കുന്നത്.
ഈ വിലക്കിന് കാരണമായത്, ഡീം25ന്റെ ജര്മന് പാര്ട്ടിയായ മെറ25 (MERA25), വിവിധ ഫലസ്തീന് അനുകൂല ഗ്രൂപ്പുകള്, ജര്മന് സംഘടനയായ ‘ജൂത ശബ്ദം’ (Jewish Voice for a Just Peace) എന്നിവ ചേര്ന്ന് സംഘടിപ്പിച്ച ഫലസ്തീന് കോണ്ഗ്രസ് ആണ്. എന്നാല് ഇതിനുള്ള സൂചനകള് നേരത്തെ തന്നെ ഉണ്ടായിരുന്നു.
MERA25. Photo: Wikimedia Commons
കഴിഞ്ഞ നവംബറില്, ‘ജൂത ശബ്ദം’ എന്ന സംഘടനയിലെ അംഗവും എന്റെ സുഹൃത്തുമായ ഐറിസ് ഹെഫെറ്റ്സ്, ബെര്ലിനില് ഒറ്റയ്ക്ക് ഒരു പ്രതിഷേധം നടത്തി.
Jewish Voice for a Just Peace
‘ഒരു ഇസ്രഈലി എന്ന നിലയിലും ഒരു ജൂത എന്ന നിലയിലും, ഗസയിലെ വംശഹത്യ നിര്ത്തുക’ എന്ന ബോര്ഡ് പിടിച്ചുകൊണ്ട് നിശബ്ദയായി നടക്കുകയായിരുന്ന അവരെ ‘സെമിറ്റിക് വിരുദ്ധത’ (Anti-Semitism) ആരോപിച്ച് അറസ്റ്റ് ചെയ്തു. താമസിയാതെ അവരുടെ സംഘടനയുടെ ബാങ്ക് അക്കൗണ്ട് മരവിപ്പിച്ചു.
ബെര്ലിനില് വെച്ച് ജൂതന്മാരുടെ സ്വത്ത് കണ്ടുകെട്ടുന്നതും സമാധാനവാദികളായ ജൂതന്മാരെ അറസ്റ്റ് ചെയ്യുന്നതും ജര്മന് അധികൃതര് ചെയ്യുന്നതിലെ വൈരുധ്യം ആര്ക്കും മനസിലാകുന്നില്ല.
ഞങ്ങളുടെ ഫലസ്തീന് കോണ്ഗ്രസിന് മുന്നോടിയായി, ജര്മനിയിലെ മിക്കവാറും എല്ലാ രാഷ്ട്രീയ പാര്ട്ടികളും ചേര്ന്ന് ഞങ്ങളെ അപലപിക്കാന് ഒരു വെബ്സൈറ്റ് തന്നെ നിര്മിച്ചു. അവരുടെ പ്രധാന ആരോപണങ്ങള് ഇവയായിരുന്നു,
ആദ്യമായി, ഒക്ടോബര് ഏഴിലെ ഹമാസ് ആക്രമണത്തെ ഞങ്ങള് നിസ്സാരവത്കരിക്കുന്നു എന്ന് അവര് ആരോപിച്ചു. സാധാരണക്കാര്ക്കെതിരായ എല്ലാ അക്രമങ്ങളെയും യുദ്ധക്കുറ്റങ്ങളായി ഞങ്ങള് അപലപിച്ചിട്ടുണ്ടെന്നത് അവര്ക്ക് മതിയായിരുന്നില്ല.
മുന് മൊസാദ് ഡയറക്ടര് തമിര് പാര്ഡോ പോലും ‘വര്ണവിവേചന സംവിധാനം’ (apartheid) എന്ന് വിശേഷിപ്പിച്ച വ്യവസ്ഥിതിക്കെതിരായ പോരാട്ടങ്ങളെ അപലപിക്കണമെന്നാണ് അവര് ആഗ്രഹിച്ചത്.
രണ്ടാമതായി, ഗസ യുദ്ധത്തിന്റെ പശ്ചാത്തലത്തില് സമാധാനപരമായ സഹവര്ത്തിത്വത്തെക്കുറിച്ച് സംസാരിക്കാന് ഞങ്ങള്ക്ക് താത്പര്യമില്ലെന്ന് അവര് അവകാശപ്പെട്ടു.
ശരിക്കും? ഞങ്ങളുടെ കോണ്ഗ്രസിലെ എല്ലാ അംഗങ്ങളും ജൂതന്മാര്ക്കും ഫലസ്തീനികള്ക്കും തുല്യമായ രാഷ്ട്രീയ അവകാശങ്ങള്ക്കായി നിലകൊള്ളുന്നവരാണ്. അന്തരിച്ച എഡ്വേര്ഡ് സെയ്ദിന്റെ കാഴ്ചപ്പാടുകള് പിന്തുടര്ന്ന് ഒരൊറ്റ ഫെഡറല് സ്റ്റേറ്റ് എന്ന പരിഹാരത്തെ പിന്തുണയ്ക്കുന്നവരാണ് ഞങ്ങളില് പലരും.
അടിസ്ഥാനരഹിതമായ ഈ ആരോപണങ്ങള് മാറ്റിവെച്ചാല്, പ്രധാനമായ ചോദ്യം ഇതാണ്: എങ്ങനെയാണ് ജര്മനിയിലെ രാഷ്ട്രീയ വര്ഗം മുഴുവന് ഈ നടപടികളെ പിന്തുണച്ചത്?
പൊലീസിനെക്കൊണ്ട് ഞങ്ങളുടെ സമ്മേളനത്തിന് തടയിടാനും, എന്റെ സുഹൃത്തായ ഉദി രാസിനെ (മറ്റൊരു ജൂത അംഗം) അറസ്റ്റ് ചെയ്യിപ്പിക്കാനും, എനിക്ക് വീഡിയോ വഴി പോലും ജര്മനിയിലെ പരിപാടികളില് സംസാരിക്കാന് പറ്റാത്ത വിധം വിലക്കേര്പ്പെടുത്താനും അവര്ക്ക് എങ്ങനെ സാധിച്ചു?
ഇസ്രഈലിന്റെ സുരക്ഷയും ജൂതന്മാരുടെ സംരക്ഷണവും എന്ന ‘സ്റ്റാറ്റ്സ്രെസണ്’ (Staatsreson – State Reason) ആയിരിക്കും ഇതിന് അവര് നല്കുന്ന മറുപടി.
എന്നാല് ജര്മന് സര്ക്കാരിന്റെ ഇപ്പോഴത്തെ പെരുമാറ്റം ജൂതന്മാരെ സംരക്ഷിക്കാനല്ല. മറിച്ച്, ഇസ്രഈല് ചെയ്യുന്ന ഏത് യുദ്ധക്കുറ്റത്തെയും പ്രതിരോധിക്കാനാണ്.
രണ്ട് രാഷ്ട്രങ്ങള് എന്ന പരിഹാരത്തെ (two-state solution) അസാധ്യമാക്കുന്ന ഇസ്രഈലിന്റെ അജണ്ടയെ പിന്തുണയ്ക്കാനാണ് ഇത്.
എന്റെ നിഗമനം ശരിയാണെങ്കില്, ഇതിന് പിന്നില് മറ്റൊരു കാരണമുണ്ട്. ജര്മന് രാഷ്ട്രീയ വര്ഗത്തിന് ചില ‘ദേശീയ തത്വങ്ങളില്’ (national catechisms) വിശ്വസിക്കാന് വലിയ താത്പര്യമാണ്.
കയറ്റുമതി ജര്മനിയുടെ കരുത്താണെന്നും, ചൈന ജര്മന് വ്യവസായത്തിന്റെ കളിസ്ഥലമാണെന്നും, റഷ്യ കുറഞ്ഞ നിരക്കിലുള്ള ഊര്ജ്ജത്തിന്റെ ഉറവിടമാണെന്നും, സയണിസത്തെ പിന്തുണയ്ക്കുന്നത് തങ്ങള് ധാര്മികമായി മാറിയെന്നതിന്റെ തെളിവാണെന്നും അവര് വിശ്വസിക്കുന്നു.
ഒരിക്കല് ഇത്തരം തത്വങ്ങള് സ്ഥാപിതമായിക്കഴിഞ്ഞാല്, പിന്നീട് അതിനെ യുക്തിസഹമായി ചോദ്യം ചെയ്യുന്നത് അസാധ്യമാകും. ആരെങ്കിലും അത് ചോദ്യം ചെയ്താല് അവരെ ഒറ്റപ്പെടുത്താനും വേട്ടയാടാനും മറ്റുള്ളവര് മത്സരിക്കും.
ഇതിലെ ഏക ആശ്വാസം, ഗസയില് കുന്നുകൂടുന്ന മൃതദേഹങ്ങള് കാണുന്ന യുവ ജര്മന് തലമുറയ്ക്ക് ഇത്തരം തത്വങ്ങളെ ചോദ്യം ചെയ്യാന് ഭയമില്ല എന്നതാണ്. ജര്മനിയുടെ ജനാധിപത്യത്തെയും നിയമവാഴ്ചയെയും സാമാന്യബോധത്തെയും അപകടത്തിലാക്കുന്ന ഈ നിലപാടുകളെ അവര് എതിര്ക്കുന്നു. അതുകൊണ്ടാണ്, വിലക്കുണ്ടായിട്ടും ജര്മനിയുടെ കാര്യത്തില് ഞാന് ഇപ്പോഴും പ്രത്യാശ കൈവിടാത്തത്.
ഫലസ്തീന് അനുകൂല പ്രതിഷേധങ്ങളുടെ ഭാഗമായി ജര്മന് വിസ നിഷേധിച്ച ഗ്രീസിലെ മുന് ധന മന്ത്രി യാനിസ് വരൂഫാകിസ് കഴിഞ്ഞ വര്ഷം എഴുതിയ ലേഖനം
മൊഴിമാറ്റം: എ.കെ. രമേഷ്
Content Highlight: Article written by former Greek Finance Minister Yannis Varoufakis, who was denied a visa by Germany as part of pro-Palestinian protests
ഗ്രീക് സാമ്പത്തികശാസ്ത്ര വിദഗ്നനും അധ്യാപകനും രാഷ്ട്രീയ പ്രവര്ത്തകനുമാണ്. നിരവധി പുസ്തകങ്ങളുടെ രചയിതാവായ അദ്ദേഹം 2015ല് ഗ്രീസിന്റെ സാമ്പത്തികകാര്യ മന്ത്രിയായി പ്രവര്ത്തിച്ചിരുന്നു.
