ഐ.പി.എല്ലില് നൂറ് വിക്കറ്റ് എന്ന നേട്ടം സ്വന്തമാക്കി കുതിക്കുകയാണ് പഞ്ചാബ് കിങ്സിന്റെ സ്റ്റാര് പേസര് അര്ഷ്ദീപ് സിങ്. മുംബൈ വാംഖഡെ സ്റ്റേഡിയത്തില് ഹോം സ്റ്റേഡിയത്തില് നടന്ന മത്സരത്തില് ഹോം ടീമിനെതിരെ ഒരു വിക്കറ്റ് നേടിയതോടെയാണ് അര്ഷ്ദീപ് ഈ നേട്ടത്തിലെത്തിയത്.
മുംബൈ ഇന്നിങ്സിന്റെ മൂന്നാം ഓവറിലാണ് അര്ഷ്ദീപ് മത്സരത്തിലെ ആദ്യ വിക്കറ്റും തന്റെ ഐ.പി.എല് കരിയറിലെ നൂറാം വിക്കറ്റും സ്വന്തമാക്കിയത്. ഓപ്പണര് റിയാന് റിക്കല്ടണിനെ ശശാങ്ക് സിങ്ങിന്റെ കൈകളിലെത്തിച്ചായിരുന്നു അര്ഷ്ദീപിന്റെ നൂറാം വിക്കറ്റ് നേട്ടം. എട്ട് പന്ത് നേരിട്ട റിക്കല്ടണ് വെറും രണ്ട് റണ്സുമായി തിരിച്ചുനടന്നു.
ഇതോടെ ഐ.പി.എല്ലില് നൂറ് വിക്കറ്റ് വീഴ്ത്തുന്ന താരങ്ങളുടെ പട്ടികയില് ഇടം നേടിയതിന് പുറമെ മറ്റൊരു എലീറ്റ് ലിസ്റ്റിലും അര്ഷ്ദീപ് തന്റെ പേരെഴുതിച്ചേര്ത്തിരിക്കുകയാണ്. ഐ.പി.എല്ലില് ഒരു ടീമിനായി നൂറ് വിക്കറ്റ് നേടുന്ന താരമെന്ന നേട്ടമാണിത്. ഇതിന് മുമ്പ് വെറും എട്ട് താരങ്ങള് മാത്രം സ്വന്തമാക്കിയ നേട്ടമാണിത്.
അതേസമയം, മത്സരത്തില് പഞ്ചാബ് കിങ്സ് അനായാസ ജയം സ്വന്തമാക്കിയിരുന്നു. മുംബൈ ഉയര്ത്തിയ 196 റണ്സിന്റെ വിജയലക്ഷ്യം 21 പന്ത് ശേഷിക്കവെയാണ് പഞ്ചാബ് മറികടന്നത്.
ഈ വിജയത്തോടെ രാജസ്ഥാന് റോയല്സിനെയും റോയല് ചലഞ്ചേഴ്സിനെയും മറികടന്ന് പഞ്ചാബ് പോയിന്റ് പട്ടികയില് ഒന്നാമതെത്തി. അഞ്ച് മത്സരത്തില് നിന്നും ഒമ്പത് പോയിന്റാണ് ടീമിനുള്ളത്.
ഞായറാഴ്ചയാണ് പഞ്ചാബിന്റെ അടുത്ത മത്സരം. സ്വന്തം മണ്ണില് ലഖ്നൗ സൂപ്പര് ജയന്റ്സാണ് എതിരാളികള്.
Content Highlight: Arshdeep Singh becomes 9th bowler to complete 100 wickets for a single team in IPL
