മലപ്പുറം: രാഹുല്‍ മാങ്കൂട്ടത്തില്‍ പി. വി. അന്‍വറിനെ സന്ദര്‍ശത്തില്‍ വിമര്‍ശനവുമായി പ്രതിപക്ഷ നേതാവ് വി.ഡി. സതീശന്‍. രാഹുല്‍ ചെയ്തത് തെറ്റാണെന്നും പാര്‍ട്ടിയുടെ അനുമതി ഇല്ലാതെയാണ് രാഹുല്‍ സന്ദര്‍ശനം നടത്തിയതെന്നും വി.ഡി. സതീശന്‍ മാധ്യമങ്ങളോട് പറഞ്ഞു.

യു.ഡി.എഫ് തീരുമാനിച്ചത് ഇനി അന്‍വറുമായി ഒരു കൂടിക്കാഴ്ച്ചയും ഇല്ലെന്നാണ്. തങ്ങള്‍ കൂട്ടായ ചര്‍ച്ചയിലൂടെ എടുത്ത തീരുമാനം യു.ഡി.എഫ് കണ്‍വീനര്‍ വഴി അന്‍വറിനെ അറിയിച്ച് കഴിഞ്ഞതാണെന്നും അതിനാല്‍ ഈ കൂടിക്കാഴ്ച്ചയ്ക്ക് ആരേയും ചുമതലപ്പെടുത്തിയിട്ടില്ലെന്നും പ്രതിപക്ഷ നേതാവ് പ്രതികരിച്ചു.

‘ ഇത്തരം കാര്യങ്ങളില്‍ ഞങ്ങള്‍ ആരേയും ചുമതലപ്പെടുത്തിയിട്ടില്ല. ജൂനിയര്‍ ആയിട്ടുള്ള ഒരു എം.എല്‍.എയെ ആണോ  ഇക്കാര്യങ്ങള്‍ക്ക് ചുമതലപ്പെടുത്തേണ്ടത്. അദ്ദേഹം തന്നെത്താനെയാണ് പോയത്.

അദ്ദേഹം പോയത് തെറ്റാണ് എന്നാണ് എന്റെ അഭിപ്രായം. വിശദീകരണം ചോദിക്കേണ്ടത് ഞാന്‍ അല്ല. പോകാന്‍ പാടില്ലായിരുന്നു. യു.ഡി.എഫ് നേതൃത്വം ഒരു തീരുമാനമെടുത്ത് ചര്‍ച്ചയുടെ വാതില്‍ അടച്ചപ്പോള്‍ അദ്ദേഹം പോയത് തെറ്റായിരുന്നു. ഞാന്‍ വിശദീകരണം ചോദിക്കില്ല,’ വി.ഡി. സതീശന്‍ പറഞ്ഞു.

എന്നാല്‍ മുതിര്‍ന്ന കോണ്‍ഗ്രസ് നേതാവായ കെ. മുരളീധരന്‍ രാഹുലിനെ പിന്തുണച്ച് രംഗത്ത് എത്തിയിട്ടുണ്ട്. അന്‍വറിനെ കാണാന്‍ പോയത് പാര്‍ട്ടി പറഞ്ഞിട്ട് അല്ലെന്ന് രാഹുല്‍ തന്നെ പറഞ്ഞിട്ടുണ്ടെന്നും അതിനാല്‍ ആ രീതിയില്‍ കണ്ടാല്‍ മതിയെന്നും വിവാദമാക്കേണ്ട ആവശ്യമില്ലെന്നും കെ. മുരളീധരന്‍ പറഞ്ഞു.

അതേമയം കെ.പി.സി.സി പ്രസിഡന്റ് സണ്ണി ജോസഫ് വി.ഡി. സതീശന്റെ പ്രതികരണത്തെ പിന്തുണച്ചിട്ടുണ്ട്. രാഹുലിനെ ആരും ചര്‍ച്ചയ്ക്ക് പറഞ്ഞയച്ചിട്ടില്ലെന്ന് അദ്ദേഹം മാധ്യമങ്ങളോട് പറഞ്ഞു. ഇന്നലെ രാത്രിയാണ് രാഹുല്‍ മാങ്കൂട്ടത്തില്‍ അന്‍വറിന്റെ വീട്ടില്‍ എത്തി ചര്‍ച്ച നടത്തിയത്. എന്നാല്‍ അന്‍വറിനെ കണ്ടത് പിണറായിസത്തിന്റെ വിമര്‍ശകന്‍ ആയതിനാലാണെന്നാണ് രാഹുല്‍ മാങ്കൂട്ടത്തില്‍ പറഞ്ഞത്.

Content Highlight: Anwar-Rahul meeting in controversy; V.D. Satheesan says Rahul did wrong; Party did not know he met Anwar