ജി.ആര്. ഇന്ദുഗോപന്റെ ‘നാലഞ്ച് ചെറുപ്പക്കാര്’ എന്ന നോവലിനെ ആസ്പദമാക്കി എത്തിയ ഏറ്റവും പുതിയ ചിത്രമാണ് പൊന്മാന്. ബേസില് ജോസഫിനെ നായകനാക്കി ജ്യോതിഷ് ശങ്കറാണ് പൊന്മാന് സംവിധാനം ചെയ്തിരിക്കുന്നത്. ബേസില് ജോസഫ് നായകനായെത്തുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് ഇന്ദുഗോപനും ജസ്റ്റിന് മാത്യുവും ചേര്ന്നാണ്.
പൊന്മാനില് ബേസിലിനെ കൂടാതെ, സജിന് ഗോപു, ലിജോമോള് ജോസ്, ആനന്ദ് മന്മദന്, ദീപക് പറമ്പോള്, രാജേഷ് ശര്മ തുടങ്ങിയ മികച്ച താരനിരയാണ് ഒന്നിച്ചത്. ജനുവരി 30 ന് തിയേറ്ററിലെത്തിയ ചിത്രം മികച്ച പ്രതികരണങ്ങളോടെ പ്രദര്ശനം തുടരുകയാണ്. സിനിമാ മേഖലയില് നിന്ന് അടക്കം നിരവധി ആളുകളാണ് ചിത്രത്തെയും ബേസിലിന്റെ പ്രകടനത്തെയും പ്രശംസിച്ച് രംഗത്തെത്തിയിരിക്കുന്നത്.
ഇപ്പോള് പൊന്മാനെ പ്രശംസിച്ച് രംഗത്തെത്തിയിരിക്കുകയാണ് ബോളിവുഡ് സംവിധായകനും നിര്മാതാവും നടനുമായ അനുരാഗ് കശ്യപ്.
പൊന്മാന് വളരെ യഥാര്ത്ഥവും കണ്ടിരിക്കാന് രസകരുമാണെന്ന് അനുരാഗ് കശ്യപ് പറയുന്നു. ഇന്ന് നമുക്കുള്ളതില് വെച്ച് വളരെ മികച്ച കൂളായിട്ടുള്ള ‘എവരിമാന്’ ആക്ടര് ആണ് ബേസിലെന്നും അദ്ദേഹം പറഞ്ഞു. പൊന്മാന് എന്ന ചിത്രം ഇഷ്ടപെട്ടെന്നും അനുരാഗ് കശ്യപ് കൂട്ടിച്ചേര്ത്തു.
പൊന്മാനിലെ പ്രധാന കഥാപാത്രമായ അജേഷിനെയാണ് ബേസില് ജോസഫ് അവതരിപ്പിച്ചിരിക്കുന്നത്. കല്യാണ സമയത്ത് ആവശ്യമുള്ളവര്ക്ക് പൊന്ന് എത്തിച്ചുകൊടുക്കുന്ന വ്യക്തിയാണ് അജേഷ്. നല്കിയ പൊന്ന് തിരിച്ചെടുക്കാന് നടത്തുന്ന അജേഷിന്റെ പോരാട്ടമാണ് സിനിമക്ക് ഇതിവൃത്തം.
അഭിനയത്തില് നിന്ന് ബ്രേക്ക് എടുത്ത് ഡയറക്ഷനിലേക്ക് പോകാമെന്ന് തീരുമാനിച്ച സമയത്താണ് പൊന്മാന് എന്ന സിനിമ വന്നതെന്നും പൊന്മാന് എന്ന സിനിമയിലേക്ക് കൊണ്ടുവന്ന ഫാക്ടര് ‘നാലഞ്ച് ചെറുപ്പക്കാര്’ എന്ന പുസ്തകമാണെന്നും നേരത്തെ ബേസില് പറഞ്ഞിരുന്നു.
Content highlight: Anurag Kashyap talks about Basil Joseph’s Performance in Ponman movie