ബജറ്റ് കുറവാണെന്ന് അറിഞ്ഞ് ശോഭന റൂം ചോദിച്ചില്ല; ഉച്ചയ്ക്ക് പാറപ്പുറത്ത് കിടന്നുറങ്ങി: ഛായാഗ്രാഹകന് അളഗപ്പന്
എന്റര്ടെയിന്മെന്റ് ഡെസ്ക്
Sunday, 1st June 2025, 7:43 am
1997ല് സമ്മാനം എന്ന ചിത്രത്തിലൂടെ തന്റെ കരിയര് ആരംഭിച്ച്, മലയാളത്തിലെ നിരവധി മികച്ച സിനിമകള്ക്ക് ക്യാമറ ചലിപ്പിച്ച ഛായാഗ്രാഹകനാണ് അളഗപ്പന് എന്. പിന്നീട് 1999ല് ശ്യാമപ്രസാദ് സംവിധാനം ചെയ്ത അഗ്നിസാക്ഷിയിലും അദ്ദേഹം പ്രവര്ത്തിച്ചു.
ഒരേ കടല്, വാസന്തിയും ലക്ഷ്മിയും പിന്നെ ഞാനും, സൂത്രധാരന്, നന്ദനം, തിളക്കം, മിഴി രണ്ടിലും, ഗൗരീശങ്കരം, മനസ്സിനക്കരെ, കാഴ്ച, അച്ചുവിന്റെ അമ്മ, ചന്ദ്രോത്സവം, പ്രജാപതി, ചാന്തുപൊട്ട്, ചോക്ലേറ്റ്, അരികെ, ഒഴിമുറി, വെല്ക്കം ടു സെന്ട്രല് ജയില് തുടങ്ങിയ നിരവധി സിനിമകളില് അളഗപ്പന് വര്ക്ക് ചെയ്തിരുന്നു.
‘അഗ്നിസാക്ഷി സിനിമയുടെ ക്ലൈമാക്സിന് ഹരിദ്വാറില് ഷൂട്ടിങ്ങുണ്ടായിരുന്നു. മൂന്ന് ദിവസത്തെ ഷൂട്ടിങ്ങെന്ന് പറഞ്ഞായിരുന്നു അന്ന് ഞങ്ങള് പോയത്. ആ ദിവസം ശോഭനയും അവിടെ എത്തി. എന്നാല് അവര് റൂമൊന്നും ചോദിച്ചില്ല.
രജിത് കപൂറിനും കാര്യം മനസിലായിരുന്നു. അവര് രണ്ടുപേരും സിനിമയുമായി അത്ര അടുത്ത് നിന്നിരുന്നു. ശോഭന ഉച്ചയ്ക്ക് കിടന്ന് ഉറങ്ങിയത് പോലും അവിടെ പാറപ്പുറത്ത് പേപ്പറ് വിരിച്ചിട്ടായിരുന്നു. ആരും കൂടുതല് കാര്യങ്ങള് ആവശ്യപ്പെട്ടിരുന്നില്ല,’ അളഗപ്പന് പറയുന്നു.