Categories

ഷൊര്‍ണ്ണൂരിലെ പെണ്‍കുട്ടിയും നമ്മളും


എഡിറ്റോ-റിയല്‍/ബാബു ഭരദ്വാജ്

കേന്ദ്ര സര്‍ക്കാറും കേരള സര്‍ക്കാറും സംസ്ഥാനത്തിലെ പൗരസമൂഹം മുഴുവനും കുറ്റവാളികളായി തലതാഴ്ത്തി നില്‍ക്കുന്ന നിമിഷമാണിത്. ഈ കുറ്റത്തിന്റെ പാപഭാരത്തില്‍ നിന്ന് ഒരു ജനത എന്ന നിലയില്‍ നമുക്കാര്‍ക്കും ഒഴിഞ്ഞ് മാറാന്‍ കഴിയില്ല. കഴിഞ്ഞ കുറെ ദശാബ്ദങ്ങളായി നമ്മള്‍ അരാഷ്ട്രീയവത്കരണത്തിന് അടിപ്പെട്ടതിന്റെയും സാമൂഹ്യ ബാധ്യതകളില്‍ നിന്നും ബോധപൂര്‍വ്വം ഒഴിഞ്ഞ് മാറിയതിന്റെയും രക്തസാക്ഷിയാണ് ഷൊര്‍ണ്ണൂരിലെ പെണ്‍കുട്ടി.

അവളുടെപേര് ഇതെഴുതുന്ന നിമിഷത്തില്‍ ഞങ്ങള്‍ക്കാര്‍ക്കും അറിയില്ല. ഒരു പക്ഷെ അവളുടെ ബന്ധുജനങ്ങള്‍ക്കും നാട്ടുകാര്‍ക്കും മാത്രമേ അതറിയാവൂ. ‘ പേരറിയാത്തൊരു പെണ്‍കിടാവേ നിന്റെ നേരറിയുന്ന ഞാന്‍ പാടുന്നു’ എന്ന ശോകസങ്കീര്‍ത്തനം അവള്‍ക്കൊരു മരണറീത്ത് ആവുകയുമില്ല. വ്യഭിചാരകഥകളും പീഡനകഥകളും അമ്മാനമാടി മലയാളി ഒരു സാങ്കല്‍പിക സുരതസുഖത്തില്‍ അഭിരമിക്കുമ്പോഴാണ്, അതിന്റെ പേരില്‍ കേരള രാഷ്ട്രീയം മാത്സര്യബുദ്ധിയോടെ പകിട കളിക്കുമ്പോഴാണ് ട്രെയിന്‍ യാത്രയില്‍ ഒരു കംപാര്‍ട്ട്‌മെന്റില്‍ ഒറ്റപ്പെട്ട് പോയ ഒരു പെണ്‍കുട്ടി ഹീനമായും നീചമായും ക്രൂരമായും വധിക്കപ്പെട്ടത്.

ഒരു റെയില്‍വെപ്ലാറ്റ്‌ഫോമിന്റെ തൊട്ടടുത്തുള്ള കൂരിരുട്ടിലാണ് അവളെ ഗോവിന്ദചാമിയെന്ന നീചന്‍ ഇരുമ്പു പാളയത്തില്‍ തലയടിച്ച് കൊലചെയ്ത് പീഡിപ്പിച്ചത്. ട്രെയിനിലെ യാത്രക്കാര്‍ അത് കണ്ടിരുന്നു, ഗാര്‍ഡ് റൂമിന്റെ തൊട്ടടുത്ത കംപാര്‍ട്ടമെന്റിലായിരുന്നു ആ പെണ്‍കുട്ടി. പേടിച്ചരണ്ട പെണ്‍കുട്ടി കംപാര്‍ട്ടമെന്റില്‍ നിന്ന് പുറത്ത് ചാടി. പുറത്ത് ചാടുന്നവത് കണ്ടവരുണ്ട്. അവള്‍ക്ക് പിന്നാലെ വ്യഭിചാരിയും പുറത്ത് ചാടി. ഇതൊക്കെ ഗാര്‍ഡും കംപാര്‍ട്ടമെന്റിലെ യാത്രക്കാരും കണ്ടിരുന്നു. ഗാര്‍ഡ് വണ്ടി നിറുത്താന്‍ താല്‍പര്യം കാണിച്ചില്ല.

അപകടം അറിഞ്ഞ ടോമിയെന്ന യുവാവ് ചങ്ങലവലിച്ച് വണ്ടി നിര്‍ത്താന്‍ ആഗ്രഹിച്ചു. സഹയാത്രികര്‍ അയാളെ തടഞ്ഞു. ‘ ഞങ്ങളെ ഉപദ്രവിക്കരുതെന്ന്’ അവര്‍ പറഞ്ഞതായി ടോമി സാക്ഷ്യപ്പെടുത്തുന്നു. സഹയാത്രികരുടെ സഹകരണമില്ലായ്മകൊണ്ട് ടോമിക്ക് ചങ്ങല വലിക്കാനുള്ള ധൈര്യം ഉണ്ടായില്ലെന്നാണ് ആ ചെറുപ്പക്കാരന്‍ പറയുന്നത്. ടോമിയെ തടഞ്ഞ യാത്രക്കാരും ടോമി തന്നെയും നമ്മുടെ ജനതയുടെ നിഷ്‌ക്രിയതയുടെയും നിരാശാജനകമായ അലംഭാവത്തിന്റെയും പ്രതിരൂപങ്ങളാണ്. ഒരു സമൂഹത്തിന്റെ ഹൃദയശൂന്യതയുടെ മുദ്രയും കൊടിയടയാളവും. അതുകൊണ്ട് തന്നെ ഈ പെണ്‍കുട്ടിയുടെ രക്തസാക്ഷിത്വത്തില്‍ അവര്‍ക്കെല്ലാം പങ്കുണ്ട്.

അവര്‍ക്കുള്ളത്ര പങ്ക് നമുക്കെല്ലാവര്‍ക്കുമുണ്ട്. കാരണം നമ്മളെല്ലാം ഇന്ന് ജീവിക്കുന്നത് നമുക്ക് വേണ്ടി മാത്രമാണ്. അവനവന് വേണ്ടി. ലോകത്തിനെന്ത് സംഭവിച്ചാലും നമ്മുടെ തടി കേടാവരുതെന്ന് കരുതുന്ന ഒരു സമൂഹത്തെ സൃഷ്ടിച്ചത് നമ്മളെല്ലാം ചേര്‍ന്നാണ്.

വെറുതെ വാചകമടിക്കാനും സംവാദം നടത്താനും മാത്രമേ നമുക്കിന്നാവൂ. പൊള്ളയായ വാക്കുകള്‍ക്കപ്പുറം നമ്മള്‍ കര്‍മ്മശൂന്യരാണ്, സ്‌നേഹശൂന്യരാണ്, അല്‍പന്മമാരാണ്, അസാന്‍മാര്‍ഗ്ഗികളാണ്.

ട്രെയിന്‍ നിര്‍ത്തിയാല്‍ ട്രെയിന്‍ ഷൊര്‍ണ്ണൂരിലെത്താന്‍ വൈകും. ട്രെയിന്‍ വൈകിയാല്‍ മരുന്നുഷാപ്പുകളൊക്കെ അടക്കും. എല്ലാത്തരം മരുന്നുഷാപ്പുകളും. കടയടക്കുന്നതിന് മുമ്പ് ‘മുസ്‌ലി പവര്‍ എക്‌സ്ട്ര’യും കിടപ്പുമുറിയില്‍ പെണ്ണിന്റെ പോരാളിയാവാന്‍ വേണ്ട ‘യോദ്ധ’യും കിട്ടാതെവരും. അതോര്‍ത്ത് വ്യാകുലപ്പെട്ടിട്ടായിരിക്കുമല്ലോ ട്രെയിന്‍ യാത്രക്കാര്‍ ടോമിയെ തടഞ്ഞത്.

ഗാര്‍ഡും എഞ്ചിന്‍ ഡ്രൈവറും ഒക്കെ ഇത്തരം വാജീകരണ ഔഷധമില്ലെങ്കില്‍ ബലഹീനരാവുന്നവരായിരിക്കണം. ലൈംഗികോത്തേജനത്തിന് ആര്‍ത്തിപിടിയ്ക്കുന്ന ഒരു ജനതയാണ് നമ്മളെന്ന് പരസ്യങ്ങളിലൂടെ രാവും പകലും പ്രഖ്യാപിക്കുന്ന ഒരു ജനതക്ക് ഒരു മനുഷ്യജീവിയുടെ രോദനം കേള്‍ക്കാനുള്ള മനസ്സുണ്ടാവില്ല. ഇത്രയും കാലംകൊണ്ട് നമ്മുടെ രാഷ്ട്രീയവും സംസ്‌കാരവും സമൂഹ്യ പ്രതിബദ്ധത എന്ന് പറയപ്പെടുന്ന അരൂപിയായ മനസാക്ഷിയും സൃഷ്ടിച്ചെടുത്തത് പ്രതികരിക്കാനും പ്രതിരോധിക്കാനും കഴിയാത്ത നമ്മളെപ്പോലെയുള്ള നികൃഷ്ടജീവികളെയാണ്. ഷൊര്‍ണ്ണൂരിലെ പെണ്‍കുട്ടി അത്തരമൊരു സത്യവാങ്മൂലത്തിന് നമ്മെ നിര്‍ബന്ധിതരാക്കുന്നു.

ചിത്രങ്ങള്‍: മജ്‌നി തിരുവങ്ങൂര്‍

Tagged with: |

18 Responses to “ഷൊര്‍ണ്ണൂരിലെ പെണ്‍കുട്ടിയും നമ്മളും”

  1. ashok

    പുരുഷന്മാരോട് മാത്രമല്ല പുരുഷത്വത്തിന്റെ ചിഹ്നത്തോടു പോലും അകല്‍ച്ചയും പകയും കാണിക്കാന്‍ പെണ്‍കുട്ടികള്‍ക്ക് ഉപദേശം കൊടുത്ത ഫെമിനിസ്റ്റുകള്‍, വയലന്‍സിനും സെക്‌സിനും ഉദാത്തത കൊടുത്ത മാദ്ധ്യമങ്ങള്‍, സമൂഹം അഴുകാന്‍ തുടങ്ങുന്നത് കണ്ടിട്ടും നടപടിയെടുക്കാന്‍ കൂട്ടാക്കാത്ത രാഷ്ട്രീയ ഉദ്യോഗസ്ഥ വര്‍ഗ്ഗം. ഇവരില്‍ നിന്ന് ട്രാക്കിലേക്ക് വലിച്ചെറിയപ്പെട്ട ആ ജീവിതത്തിന്റെ വില ഈടാക്കണം

  2. unni

    ഹേ സമൂഹമേ……….ഇനിയെങ്കിലും ചവറ്റു കോട്ടയില്‍ എരിയൂ ഈ കപട ആരാഷ്ട്രീയതാ….ഏയ്‌ യുവജനങ്ങളെ ഒന്ന് കണ്ണ് തുറക്കൂ…അന്ന്യന്റെ വേദനയില്‍ പങ്കു ചേരാന്‍ ഒന്ന് ശീലിക്കു……..ആര്‍ക്കു വേണ്ടി നിങ്ങള്‍ ജീവിക്കുന്നു????സ്വന്തം കാര്യങ്ങള്‍ക്ക് വേണ്ടി മാത്രമോ???ചിന്തിക്കൂ.

  3. kabeer

    പ്രിയ സഹോദരി നിനക്കയി പിറക്കാന്‍ പോകുന്ന പൂക്കളെയും പുലരിയെയും കാത്തു നില്‍ക്കാതെ നീ വിട പറഞ്ഞു ….നിന്‍റെ സ്വപ്‌നങ്ങള്‍ നിന്‍റെ മോഹങ്ങള്‍ നിന്‍റെ ദു ഖങ്ങള്‍ എല്ലാം ഒരു തീവണ്ടി പാളത്തില്‍ തല്ലി തകര്‍ത്തു ആ നാരധാമന്‍…പ്രാണന് വേണ്ടി നീ നില…വിളിച്ചപ്പോള്‍ കേട്ടിട്ടും കേള്‍ക്കാതെ നടിച്ച സമൂഹം …ഏതാണ് ഞങ്ങള്‍ പലപ്പോഴും ഒര്മിപ്പിക്കാറുള്ള അരാഷ്ട്രീയ സമൂഹം …ജനങ്ങളെ അരാഷ്ട്രീയ വല്കരിച്ചു പ്രതികരണ ശേഷിനഷ്ട പെടുതുനതിനു എതിരെ ഞങ്ങള്‍ ശക്തമായി വാദിച്ചപ്പോള്‍ ഒക്കെ വെറും രാഷ്രീയ വാദികള്‍ എന്നു പറഞ്ഞു അവര്‍ ഞങ്ങളെ അവഹേളിച്ചു പുറത്താക്കി …ഇതാണ് ഞങ്ങള്‍ പേടിച്ച അരാഷ്ട്രീയ സമൂഹം …പ്രിയ സഹോദരി ഇവിടെ ഞങ്ങളോട് നീ മാപ് തരു …മാപ്പ് ഞങ്ങള്‍ അര്‍ഹിക്കുന്നിലെങ്കിലും

  4. baiju

    ഇത് സൌമ്യ , കേരളം ഒരിക്കലും ഇനി ഈ നാമം
    മറന്നു പോകരുത്………..
    ക്രൂരമായ പീടനങ്ങള്‍ക്കൊടുവില്‍ ,മൃഗീയമായ ബലാത്സംഗതിനും
    ഇരയായി ഈ ലോകത്തോട് വിട പറഞ്ഞിരിക്കുന്നു
    ഈ പെണ്‍കുട്ടി ,,,,,
    …ഇവളുടെ സ്വപ്നങ്ങള്‍ക്കും, പ്രതീക്ഷകള്‍ക്കും
    മോഹങ്ങള്‍ക്കും ഒക്കെ വില പറഞ്ഞുകൊണ്ട്
    ഗോവിണ്ടാചാമിയെന്ന കാമവെറി പൂണ്ട നരാധമന്‍
    തന്റെ ആഗ്രഹ പൂര്‍ത്തീകരണം നടത്തിയിരിക്കുന്നു
    ഓര്‍ക്കുക….

    ഇനിയും നമ്മുടെ സൌമ്യമാര്‍ ഇതുപോലെ ആക്രമിക്കപ്പെടുകയും
    കൊല്ലപ്പെടുകയും ചെയ്യും
    കാരണം നൂറുകണക്കിനായ ഗോവിണ്ടാചാമിമാര്‍
    നമ്മുടെ യാത്ര മദ്ധ്യയും,റോഡരികിലും , നാട്ടിടവഴികളിലും
    കാത്തുകെട്ടി കിടക്കുന്നുണ്ട്
    അവരുടെ കാമാര്‍തമായ കണ്ണ്കളുമായിട്ടു …
    അവരെ നമുക്ക് നേരിടെണ്ടേ ?????
    ഇപ്പോള്‍ പിടിക്ക പെട്ട ഗോവിണ്ടാചാമി
    നിയമത്തിന്റെ നൂലാമാലകളില്‍ നിന്നും രക്ഷ നേടി പുറത്തേക്കിറങ്ങിയേക്കാം
    അപ്പോഴും നമ്മള്‍ നിസ്സങ്കരായി നോക്കി നില്‍ക്കുകയും ചെയ്യും
    പിന്നെയും പിന്നെയും ഷോര്‍ണൂരുകള്‍ ആവര്‍ത്തിക്കപ്പെടുകയും ചെയ്യും
    ഇപ്പോള്‍ വേണ്ടത് ഇനി ഇത്തരം ഹീന കൃത്യങ്ങള്‍ ചെയ്യാന്‍
    വേറൊരാള്‍ക്കും തോന്നാത്ത വിധമുള്ള ഒരു ശിക്ഷ
    ജനകീയ കോടതി ഇയാള്‍ക്ക് വിധിക്കുകയല്ലേ വേണ്ടത്
    അതല്ലേ അതിന്റെ ശരിമ??
    അല്ലെങ്കില്‍ നാളത്തെ തലമുറ പറയില്ലേ നിങ്ങള്‍ ആ പെണ്‍കുട്ടിയെ കൊന്നു കളഞ്ഞെന്ന് ??????

    …………………………………………………
    സൌമ്യക്ക് ആധാരാജ്ഞലികള്‍………..

  5. joshi

    ട്രെയിനില്‍ വെച്ച് അപമാനിക്കപെട്ട സഹോദരി സൌമ്യ മരിച്ചു…ഇപ്പോള്‍ എത്ര പേരാ കണ്ണീര്‍ വാര്‍ക്കുന്നത്…എത്ര പേരാ നിലവിളിക്കുന്നത്….കോളേജുകളില്‍ രാഷ്ട്രീയം ഒഴിവാക്കിയും, സ്വന്തം ജീവിതം മാത്രമാണ് വലുതെന്നു മക്കളെ ഉപദേശിച്ചും കഴിയുന്ന നിങ്ങള്‍ എത്ര ദിവസം ഈ കണ്ണീര്‍ നിങ്ങളുടെ കണ്ണുകളില്‍ സൂക്ഷിക്കും ….? ധൈര്യമുണ്ടോ നിങ്ങള്‍ക്ക് നിങ്ങളുടെ ജീവിതത്തെ രാഷ്ട്രീയ വല്‍ ക്കരിക്കാന്‍ എന്നിട്ട് സ്വന്തം പെണ്‍മക്കളെയെങ്കിലും കാത്തു സൂക്ഷിക്കാന്‍….?

  6. vijay

    നമ്മളെല്ലാവരും ട്രെയിനില്‍ യാത്ര ചെയ്തിട്ടുള്ളതല്ലേ.. ഒരു പെണ്‍കുട്ടി വീണു എന്ന് പറഞ്ഞ് ചങ്ങല വലിക്കാന്‍ വരുന്ന ഒരാളോട് “ആ കുട്ടി ചത്തു പോവത്തോന്നുമില്ല” എന്ന് പറഞ്ഞ് ആരെങ്കിലും തടയുമോ ? സംശയിച്ചു പോവുന്നു ‌. ഇതിലും ചെറിയ സന്ദര്‍ഭങ്ങളില്‍ … വളരെ ആര്‍ജ്ജവത്തോടെ ഇടപെടുന്ന മലയാളികളെ കണ്ടിട്ടുണ്ട്. പക്ഷെ ഈ പ്രതികരണം പ്രത്യേകിച്ചും ട്രെയിനുകളില്‍ യാത്ര ചെയ്യുന്ന സാധാരണക്കാരായ ആളുകളില്‍ നിന്നും പ്രതീക്ഷിക്കുവാന്‍ പ്രയാസം. ഇനി അങ്ങനെ നിരുല്സാഹപെടുതുംബോഴേക്കും ഉടന്‍ തന്നെ വേണ്ട എന്ന് വെക്കുവാന്‍ അതെന്താ അത്ര നിസ്സാരമായിരുന്നോ ഒരു ജീവന്‍… എന്നിട്ട് ഒരുളിപ്പുമില്ലാതെ വന്നു സാക്ഷി പറയുന്നു, “ഞാന്‍ കണ്ടു പക്ഷെ ചങ്ങല വലിക്കാന്‍ കൂടെ ഉള്ളവര്‍ സമ്മതിച്ചില്ല” .

    പൊതു സ്ഥലങ്ങളില്‍ ജാകരൂകരായിരിക്കുക, അക്രമങ്ങള്‍ക്കെതിരെ മറ്റാരെയും കാത്തു നില്‍കാതെ ഉടനടി പ്രതികരിക്കുക. അത് സ്ത്രീക്കെതിരെ ആയാലും പുരുഷനെതിരെ ആയാലും. ചിലപ്പോള്‍ നമ്മള്‍ രക്ഷിക്കുന്നത് ഇത് പോലെ നഷ്ടപെട്ടെകാവുന്ന ഒരു ജീവനാവും.

  7. kalabhairavan

    ജോഷി, കബീര്‍..
    പ്രസക്തമാണ്‌ നിങ്ങളുടെ പ്രതികരണങ്ങള്‍. വിദ്യാര്‍ഥി രാഷ്ട്രീയവും പൊതു സ്ഥലത്തെ യോഗവും ഒക്കെ നിരോധിച്ച് നമുക്കിനിയും സമൂഹത്തെ ആരാഷ്ട്ര്ര്യവല്‍ക്കരിക്കാം. നമ്മുടെ അമ്മമാരേ/ സഹോദരിമാരെ/ഭാര്യമാരെ/ പ്രണയിനിയെ എല്ലാം തന്നെ ഇനിയും ‘നീ എന്റെ സംരക്ഷണയില്‍ മാത്രം കഴിയെണ്ടാവളാണ് ‘
    എന്ന ബോധത്തിലേക്ക്‌ തിരിച്ചയക്കാം. അവരുടെ എല്ലാ രീതിയിലുള്ള സാമൂഹ്യ ബോധത്തെയും ഇല്ലാതാക്കാം….
    എത്രയോ ചാമിമാര്‍ ഇനിയും നമ്മുടെ തീവണ്ടികളിലും പൊതു സ്ഥലങ്ങളിലും ബാക്കിയുണ്ട്. ഇവര്‍ക്കെതിരെ പ്രതികരിക്കാനുള്ള ഒരു പൊതു ബോധം ആണ് നമുക്ക് ആവശ്യം.

  8. Abdul Azeez

    Onnum Prathikarikkanillaa
    Kaykal virakkukayanu
    Tomi,, nee allkoottathil verittavananu

  9. Abdul Azeez

    നാണമില്ലാത്ത രാഷ്ട്രീയം ,നാണമില്ലാത്ത മനുഷ്യ്തം .എല്ലാം എന്റെ ശാപം .ടോമി എന്നാ യുവാവ്‌ അപകടം മണത്തു ട്രെയിന്‍ നിറുത്താന്‍ ചങ്ങല വലിക്കാന ശ്രമിച്ചു , എന്നിട്ടും കൂടെയുള്ള യാത്രക്കാര്‍ ഞങ്ങളെ ബുദ്ടിമുട്ടിക്കരുതെന്നു പരഞ്ഞു . ഞാന്‍ അടക്കമുള്ള സമൂഹമേ , അവളുടെ ആത്മാവ് എന്നും ningalude മുന്നില്‍ ഉണ്ടാകും ഒരു ചോദ്യ ചിന്നമായി . ജീവിതത്തിലേക്ക് കാലെടുത്തു

  10. ramshad

    ….നന്നായി
    She was our sister,
    she belongs to our family,
    ] she was the hope of tomorrow.
    pray for her soul.
    Who was fated for the shoranur train incident n dead?
    let’s hold our hands together and plse join in this chain and pass it

    .Stop violence against women.

    RAMSHAD

  11. rahul

    പ്രിയ
    സഹോദരി മാപ്പ്

  12. sanoop

    പ്രിയ
    സഹോദരി മാപ്പ്……ഞാനും ഈ സമൂഹത്തിലാണല്ലോ……….

  13. ഉണ്ണികൃഷ്ണന്‍ നമ്പ്യാര്‍ പെരിങ്ങോം. കണ്ണൂര്‍

    ഇനി നമുക്കുറങ്ങാം. ചാരിതാര്‍ത്ഥ്യ ജനകമായി, ധന്യമാണെന്റെ ജീവിതം. സുഖമായുറങ്ങാം. അത്രയും സ്വസ്ഥമായി. സന്തോഷത്തോടുകൂടി. കഴിയാനുള്ള കര്‍മ്മഗുണം നമുക്കില്ലാതെ പോയി. നമ്മളാരുമല്ലാതായി. ആ നൊമ്പരം പറഞ്ഞറിയിക്കാനാകില്ല. ആ നൊമ്പരമാണ് നാം അനുഭവിക്കുന്നത്. ആ രോദനം… ഒറ്റക്കയ്യന്‍ ഈ കുട്ടിയെ ബലാത്സംഗം ചെയ്തത്, നിലവിളി കേട്ടവര്‍ നമ്മള്‍ക്കെന്താണ് കാര്യമെന്ന രീതിയലല്ലെ നിന്നത്. ആരും ഒന്നും മിണ്ടിയില്ല. ഇവര്‍ നമ്മുടെ സഹോദരിമാരല്ലെ. ആ വണ്ടിയിലുള്ളവര്‍ക്കും സഹോദരിമാരില്ലെ…

    ഇത് കേരളീയ പൊതു സമൂഹത്തിന്റെ ജീര്‍ണ്ണതയുടെ ഭാഗമാണ്. ഇവിടെ ഗാന്ധിയില്ല, മഹാന്‍മാരാരുമില്ല. എവിടേക്കാണ് നമ്മള്‍ പോകുന്നത്…..

  14. Ameer Kallumpuram

    സൌമ്യ ഓര്‍മ്മയായി – വിശദീകരിച്ചു പറഞ്ഞാല്‍ പ്രതികരണ ശേക്ഷി നഷ്ടപെട്ട, അനുദിനം കൂടുതല്‍ സ്വോര്താരായ മാറിക്കൊണ്ടിരിയ്ക്കുന്ന കേരള ജനതയുടെ വികല മനസിന്റെ ഒരിയ്ക്കലും മറക്കാത്ത രക്തസാക്ഷി …. ആ കുട്ടിയുടെ നിലവിളിയൊച്ച കേട്ടപ്പോള്‍ ഒന്ന് എത്തി ന…ോക്കുകയെങ്കിലും ചെയ്തിരുന്നെങ്കില്‍ ഇപ്പോള്‍ പറയുന്ന ഈ ആദരാഞ്ജലികള്‍ ഒഴിവാക്കാമായിരുന്നു ….എല്ലാം നഷ്ടപെട്ടിട്ടു വിലപിയ്ക്കുന്ന ഒരു ജനതയായി നാം അധപതിച്ചു പോയി … ഇവിടെ കോടതികളും ഭരണകര്താക്കളും സംശയത്തിന്റെ മുള്‍മുനയില്‍ , പക്വോത കൈവരാത്ത പെണ്‍കുട്ടികളുടെ മാനം കള്ള പണക്കാരുടെ അരമനയില്‍ ..അതിനെതിരെ പ്രതികരിക്കാന്‍ കുറേപേര്‍ മാത്രം ….ഇനി എല്ലാം നഷ്ടപെടും വരെ ഈ അഭാസന്മാര്‍ക്ക് വേണ്ടി കുഴലൂതും എതിര്‍ക്കുന്നവരെ കളിയാക്കി ചിരിയ്ക്കുകയും ചെയ്യും ..അവസാനം ഒരു കള്ള കണ്ണുനീരും

  15. jagan

    nammuke enniyengelium prathikarikkan thudagam… unnaru….divathente makkal…..

  16. പി. സലിൽ

    ആ പെൺകുട്ടിയുടെ പേര് ഇതെഴുതുന്ന നിമിഷത്തിൽ ഞങ്ങൾക്കാർക്കും അറിയില്ലെന്ന് എഴുതിയിരിക്കുന്നല്ലോ,
    അങ്ങ് മംഗളം പത്രം വായിക്കാറില്ല, അല്ലേ?
    അപകടം നടന്നതിന്റെ അടുത്ത ദിവസം തന്നെ ഒന്നാം പേജിൽ മുകളിൽ എട്ടുകോളമായി പരന്നു കിടപ്പുണ്ടായിരുന്നു പേരും വയസ്സും വീട്ടുപേരും അഡ്രസ്സും എല്ലാം!

  17. Lindu lal.k padanilam

    Keraleeya sammoohathe njetticha. Soumya enna yuvathiyude kruramaya kollayil ninnum oyinju maran keraleeya pouranmaraya nammukku kayiyilla.

  18. Anunad

    ലേഡീസ് കമ്പാര്‍ട്ട്മെന്‍റ്
    ——————————

    ഒറ്റ ബോഗിയുള്ള,
    ഓട്ടം നിലയ്ക്കാത്ത,
    ഒരു കണ്ണീരു വണ്ടി.
    നിറയെ ശവങ്ങള്‍.
    ജീവനുണ്ട്,
    സംസാരിക്കുന്നില്ല,
    ശവത്തില്‍ കുത്തിയിട്ടും
    പ്രതികരിക്കുന്നില്ല.
    ഇടയ്ക്കിടെ,
    ഒരു ഞരക്കം മാത്രം.
    ഫെമിനിസ്റ്റ് ശവങ്ങള്‍
    ഉറക്കെ, നിശബ്ദമൊരു
    വിമോചന കവിത ചൊല്ലുന്നു.

    കിളിരൂര്‍, സൂര്യനെല്ലി,
    അമ്പലപ്പുഴ, തൃശ്ശൂര്‍
    ഓരോ സ്റ്റെഷനില്‍നിന്നും
    ആളുകള്‍ കയറുന്നു.
    കൊന്നതാണ്,
    നാവു പിഴുത്,
    നടു തളര്‍ത്തി,
    കൂര്‍ത്തൊരായുധത്താല്‍
    മുറിപ്പെടുത്തി….

    പ്രതിയെക്കണ്ടാലറിയാം.
    തെളിവ് നല്‍കുവാന്‍,
    മാറും അടിവയറും.
    മൊഴി കൊടുക്കുവാന്‍,
    മുലകുടി മാറാത്തൊരു കുഞ്ഞും.

LEAVE YOUR COMMENTS

Press ctrl+g to toggle between English and Malayalam.