സൗത്ത് ആഫ്രിക്കയ്‌ക്കെതിരായ രണ്ടാം ഏകദിന മത്സരത്തില്‍ സെഞ്ച്വറി നേടി റിതുരാജ് ഗെയ്ക്വാദും വിരാട് കോഹ്‌ലിയും. മത്സരത്തില്‍ നാലാമനായി 83 പന്തില്‍ നിന്ന് 105 റണ്‍സ് നേടിയാണ് ഗെയ്ക്വാദ് തകര്‍പ്പന്‍ പ്രകടനം പുറത്തെടുത്തത്. 12 ഫോറും രണ്ട് സിക്‌സുമാണ് താരത്തിന്റെ ഇന്നിങ്‌സില്‍ ഉണ്ടായിരുന്നത്. മാത്രമല്ല അന്താരാഷ്ട്ര ഏകദിനത്തില്‍ ഗെയ്ക്വാദിന്റെ കന്നി സെഞ്ച്വറി കൂടിയാണിത്.

ഗെയ്ക്വാദിന്റെ സെഞ്ച്വറിക്ക് ശേഷം അധികം വൈകാതെ വിരാടും ട്രിപ്പിള്‍ ഡിജിറ്റിലെത്തി. 90ാം പന്തിലാണ് വിരാട് സെഞ്ച്വറി പൂര്‍ത്തിയാക്കിയത്. രണ്ട് സിക്‌സും ഏഴ് ഫോറുമാണ് താരത്തിന്റെ ഇന്നിങ്‌സില്‍ നിന്ന് പിറന്നത്. ഇതോടെ അന്താരാഷ്ട്ര ഏകദിനത്തില്‍ 53ാം സെഞ്ച്വറിയാണ് വിരാട് കുറിച്ചത്.

ഏകദിന ചരിത്രത്തില്‍ ഏറ്റവും കൂടുതല്‍ സെഞ്ച്വറി നേടുന്ന താരമെന്ന നേട്ടത്തില്‍ തന്റെ ഡോമിനേഷന്‍ തുടരാനും വിരാടിന് സാധിച്ചു. പ്രോട്ടിയാസിനെതിരായ കഴിഞ്ഞ മത്സരത്തിലും വിരാട് സെഞ്ച്വറി നേടി ഏവരേയും അമ്പരപ്പിച്ചിരുന്നു.

ഏകദിന ചരിത്രത്തിലെ ഏറ്റവും കൂടുതല്‍ സെഞ്ച്വറികള്‍

53* – വിരാട് കോഹ്‌ലി (295 ഇന്നിങ്‌സ്)

49 – സച്ചിന്‍ ടെണ്ടുല്‍ക്കര്‍ (452 ഇന്നിങ്‌സ്)

33 – രോഹിത് ശര്‍മ (270 ഇന്നിങ്‌സ്)

30 – റിക്കി പോണ്ടിങ് (365 ഇന്നിങ്‌സ്)

28 – സനത് ജയസൂര്യ (433 ഇന്നിങ്‌സ്)

റായ്പൂരില്‍ നടക്കുന്ന മത്സരത്തില്‍ 38 ഓവര്‍ പൂര്‍ത്തിയായപ്പോള്‍ മൂന്ന് വിക്കറ്റ് നഷ്ട്ത്തില്‍ 276 റണ്‍സാണ് ഇന്ത്യ നേടിയത്. 14 റണ്‍സ് നേടിയ രോഹിത്തിനെയും 22 റണ്‍സ് നേടിയ യശസ്വി ജെയ്‌സ്വാളിനെയുമാണ് ഇന്ത്യയ്ക്ക് നഷ്ടമായത്.

ഇന്ത്യന്‍ പ്ലെയിങ് ഇലവന്‍

രോഹിത് ശര്‍മ, യശസ്വി ജെയ്‌സ്വാള്‍, വിരാട് കോഹ്‌ലി, റുതുരാജ് ഗെയ്ക്ക്വാദ്, വാഷിങ്ടണ്‍ സുന്ദര്‍, കെ.എല്‍. രാഹുല്‍ (ക്യാപ്റ്റന്‍, വിക്കറ്റ് കീപ്പര്‍), രവീന്ദ്ര ജഡേജ, ഹര്‍ഷിത് റാണ, അര്‍ഷ്ദീപ് സിങ്, കുല്‍ദീപ് യാദവ്, പ്രസിദ്ധ് കൃഷ്ണ

സൗത്ത് ആഫ്രിക്കന്‍ പ്ലെയിങ് ഇലവന്‍

എയ്ഡന്‍ മാര്‍ക്രം, ക്വിന്റണ്‍ ഡി കോക്ക് (വിക്കറ്റ് കീപ്പര്‍), തെംബ ബാവുമ (ക്യാപ്റ്റന്‍), മാത്യൂ ബ്രീറ്റ്‌സ്‌കി, ടോണി ഡി സോര്‍സി, ഡെവാള്‍ഡ് ബ്രെവിസ്, മാര്‍ക്കോ യാന്‍സന്‍, കോര്‍ബിന്‍ ബോഷ്, കേശവ് മഹാരാജ്, നന്ദ്രേ ബര്‍ഗര്‍, ലുങ്കി എന്‍ഗിഡി

Content Highlight: Virat Kohli And Ruturaj Gaikuad Made Century Against South Africa

Related Topics

Ruturaj Gaikwad South Africa VS India Sports News Virat Kohli