ബറെയ്ലി: മഹാറാണ പ്രതാപ് ജയന്തിയോടനുബന്ധിച്ചുള്ള ശോഭായാത്ര ദലിത് സമുദായാംഗങ്ങള് എതിര്ത്തതിനെത്തുടര്ന്ന് യു.പിയിലെ ബറേയ്ലിക്ക് സമീപം മഹേഷ്പുര ഗ്രാമത്തില് സംഘര്ഷാവസ്ഥ. പ്രധാനമായും ദളിത് വനിതകളടങ്ങിയ സംഘമാണ് ശോഭായാത്ര നടത്തുന്നതില് എതിര്പ്പ് പ്രകടിപ്പിച്ചത്. ഇവര് യാത്ര തടഞ്ഞതായും ആരോപണമുണ്ട്.
സംഘര്ഷാവസ്ഥ നിലനിന്ന പ്രദേശത്തെ സ്ഥിതിഗതികള് നിലവില് നിയന്ത്രണവിധേയമാണെന്ന് പൊലീസ് അറിയിച്ചു. ഇരുവിഭാഗവുമായി നിരന്തരം ചര്ച്ച നടത്തിയ ശേഷമാണ് സംഘര്ഷാവസ്ഥ പരിഹരിച്ചതെന്നും പൊലീസ് ഉദ്യോഗസ്ഥര് പറഞ്ഞു.
പ്രദേശത്ത് ശോഭായാത്രയുടെ റൂട്ടുമായി ബന്ധപ്പെട്ട് രണ്ട് വിഭാഗങ്ങള് തമ്മില് അഭിപ്രായ ഭിന്നത നിലനിന്നിരുന്നതായി പൊലീസ് സൂപ്രണ്ട് മാനുഷ് പരീക് പറഞ്ഞു. എന്നാല് പ്രദേശത്ത് സംഘര്ഷമുണ്ടായെന്ന തരത്തില് പ്രചരിക്കുന്ന വാര്ത്തകള് തെറ്റിധാരണാജനകമാണെന്നും അദ്ദേഹം പറഞ്ഞു.
ഇരുവിഭാഗങ്ങള് തമ്മിലുള്ള തര്ക്കത്തെ കുറിച്ച് വിവരം ലഭിച്ചപ്പോള് തന്നെ സ്റ്റേഷന് ഹൗസ് ഓഫീസറുടെ നേതൃത്വത്തിലുള്ള സംഘം സ്ഥലത്തെത്തിയതായി പൊലീസ് ഉദ്യോഗസ്ഥര് പറഞ്ഞു. സംഘര്ഷാവസ്ഥ രൂക്ഷമായതിന് ശേഷം പൊലീസ് സ്ഥലത്തെത്തി ഇരു വിഭാഗത്തെയും അനുനയിപ്പിക്കുന്നതിനുള്ള ശ്രമങ്ങള് നടത്തി. എന്നാല് ഈ ശ്രമങ്ങള് പരാജയപ്പെടുകയാരുന്നു.
പിന്നീട് ഇരു പക്ഷത്തു നിന്നുമുള്ള പ്രതിനിധികളെ പൊലീസ് സ്റ്റേഷനിലേക്ക് വിളിപ്പിച്ച് ചര്ച്ച നടത്തുകയും ചെയ്തു. ദീര്ഘ നേരം നീണ്ട ചര്ച്ചകള്ക്കൊടുവിലാണ് സംഘര്ഷാവസ്ഥയ്ക്ക് അയവുണ്ടായതെന്നും പൊലീസ് ഉദ്യോഗസ്ഥര് പറഞ്ഞു.
Content Highlight: Tension in UP village after Dalit community objects to Maharana Pratap Jayanti procession