കൊല്ലം: കൊല്ലം കൊട്ടാരക്കരയില്‍ ടിപ്പര്‍ ലോറി ബസ് സ്‌റ്റോപ്പിലേക്ക് ഇടിച്ച് കയറി വന്‍ അപകടം. ബസ് കാത്ത്‌നിന്ന വിദ്യാര്‍ത്ഥികള്‍ ഉള്‍പ്പെടെയുള്ളവര്‍ക്കിടയിലേക്കാണ് നിയന്ത്രണം വിട്ട ടിപ്പര്‍ ലോറി പാഞ്ഞുകയറിയത്.

അപകടത്തില്‍ കുട്ടികള്‍ ഉള്‍പ്പെടെ മൂന്ന് പേര്‍ മരിച്ചതായി ജില്ലാ പൊലീസ് മേധാവി അറിയിച്ചു. കുടവട്ടൂര്‍ സ്വദേശിയായ ഹരിലാല്‍ (54), കാര്‍മല്‍ സ്‌കൂളിലെ പത്താം ക്ലാസ് വിദ്യാര്‍ത്ഥി പാര്‍ത്ഥിപ്, നീലേശ്വരം മുക്കോണിമുക്ക് സ്വദേശിയായ അജയകുമാര്‍ (45) എന്നിവരാണ് മരിച്ചത്.

പുറത്തെടുത്തവരില്‍ അഞ്ച് പേര്‍ പരിക്കേറ്റ് ചികിത്സയിലാണ്. ബസ് സ്റ്റോപ്പിലുണ്ടായിരുന്ന വിദ്യാര്‍ത്ഥികളായ കുശാല്‍ (15), ഋഷഭ് ബോബന്‍ (15), നവനീത് (13), ജിബി മോള്‍ (15) എന്നിവര്‍ക്കും ടിപ്പറിന്റെ ഡ്രൈവര്‍ ചവറ സ്വദേശിയായ നിസാം എന്നയാള്‍ക്കുമാണ് പരിക്കേറ്റത്. ഇവരില്‍ 2 പേര്‍ കൊട്ടാരക്കര താലൂക്ക് ആശുപത്രിയിലും ഒരാള്‍ ഗോകുലം മെഡിക്കല്‍ കോളജ് ആശുപത്രിയിലും രണ്ടു പേര്‍ മെഡിസിറ്റിയിലും ചികിത്സയിലാണ്. പരിക്ക് ഗുരുതരമാണെന്നാണ് സൂചന. ഋഷഭ്, കൗശല്‍ എന്നിവരാണ് മെഡിസിറ്റിയില്‍ ചികിത്സയിലുള്ളത്. ഇതില്‍ ഒരാള്‍ വെന്റിലേറ്ററിലാണ്.

മുക്കോളി മുക്കില്‍ രാവിലെ 7.15 ഓടെയാണ് അപകടം ഉണ്ടായത്. മണ്ണ് കയറ്റി വന്ന ലോറിയാണ് കുട്ടികള്‍ക്ക് മേല്‍ മറിഞ്ഞത്. ലോറിയില്‍ ഉണ്ടായിരുന്ന മണ്ണ് വീണ് അപകടത്തില്‍പെട്ടവര്‍ അടിയില്‍ കുടുങ്ങുകയായിരുന്നു. ബസ് സ്റ്റോപ്പില്‍ വിദ്യാര്‍ത്ഥികള്‍ അടക്കം 12 ഓളം പേരുണ്ടായിരുന്നതായാണ് റിപ്പോര്‍ട്ടുകള്‍.

മണ്ണിനടിയില്‍ ആളുകള്‍ ഉണ്ടോയെന്നറിയാനായി തിരച്ചില്‍ തുടരകയാണ്. കെ.എസ്.ഇ.ബി അധികൃതരെത്തി പ്രദേശത്തെ വൈദ്യൂതി ബന്ധം വിഛേദിച്ചിട്ടുണ്ട്.

Content Highlight: Tipper lorry crashes into bus stop in Kottarakkara; Three lives lost, including a student