അന്താരാഷ്ട്ര ടി-20യില് 1000 റണ്സ് പൂര്ത്തിയാക്കി ഇന്ത്യന് ബാറ്റര് തിലക് വര്മ. സൗത്ത് ആഫ്രിക്കയ്ക്കെതിരായ ആദ്യ ടി-20യിലാണ് തിലക് ഈ സൂപ്പര് മൈല്സ്റ്റോണ് സ്വന്തമാക്കിയത്. നിലവില് ബാരാബതി സ്റ്റേഡിയത്തില് നടന്നുകൊണ്ടിരിക്കുന്ന മത്സരത്തില് 32 പന്തില് ഒരു സിക്സും രണ്ട് ഫോറും ഉള്പ്പെടെ 26 റണ്സ് നേടിയാണ് തിലക് പുറത്തായത്. ലുങ്കി എന്ഗിഡിക്കാണ് തിലകിന്റെ വിക്കറ്റ്.
1000 ടി-20 റണ്സ് എന്ന മൈല്സ്റ്റോണില് 13ാം താരമാകാനും തിലകിന് സാധിച്ചിരുന്നു. ഈ നേട്ടത്തില് മലയാളി സൂപ്പര് താരം സഞ്ജു സാംസണിന് മുന്നേയാണ് തിലക് എത്തിച്ചേര്ന്നത്. നേട്ടത്തിലെത്താന് സഞ്ജുവിന് അഞ്ച് റണ്സും തിലകിന് നാല് റണ്സുമായിരുന്നു വേണ്ടിയിരുന്നത്. എന്നാല് പ്രോട്ടിയാസിനെതിരായ പ്ലെയിങ് ഇലവനില് സഞ്ജുവിന് സ്ഥാനം ലഭിക്കാതെ വന്നതോടെ മൈല്സ്റ്റോണ് നേടാനുള്ള അവസരവും താരത്തിന് നഷ്ടമായി.
അതേസമയം സൗത്ത് ആഫ്രിക്കയ്ക്കെതിരെ നിലവില് 17 ഓവര് പൂര്ത്തിയായപ്പോള് അഞ്ച് വിക്കറ്റ് നഷ്ടത്തില് 137 റണ്സാണ് ഇന്ത്യ നേടിയത്.
മത്സരത്തിന്റെ തുടക്കത്തില് തന്നെ ഇന്ത്യന് വൈസ് ക്യാപ്റ്റന് ശുഭ്മന് ഗില്ലിനേയും ക്യാപ്റ്റന് സൂര്യകുമാര് യാദവിനേയും പുറത്താക്കിയാണ് പ്രോട്ടിയാസ് ഇന്നിങ്സ് തുടങ്ങിയത്. ലുങ്കി എന്ഗിഡി എറിഞ്ഞ ആദ്യ പന്ത് ഫോര് അടിച്ച് തുടങ്ങിയ ഗില് രണ്ടാം പന്തില് മാര്ക്കോ യാന്സന്റെ കയ്യില് കരുങ്ങുകയായിരുന്നു.
എന്നാല് മൂന്നാമനായി ഇറങ്ങിയ ക്യാപ്റ്റന് സൂര്യകുമാര് യാദവിനേയും എന്ഗിഡി അധികം വൈകാതെ മടക്കി. 11 പന്തില് ഒരു സിക്സും ഒരു ഫോറും ഉള്പ്പെടെ 12 റണ്സ് നേടിയ സൂര്യയുടെ ക്യാച്ച് എയ്ഡന് മാര്ക്രമാണ് നേടിയത്. പിറകെ 12 പന്തില് 17 റണ്സുമായി അഭിഷേകും മടങ്ങി. അക്സര് പട്ടേല് 21 പന്തില് 23 റണ്സ് നേടിയാണ് പുറത്തായത്. നിലവില് ഹര്ദിക്ക് പാണ്ഡ്യ 16 പന്തില് 32 റണ്സ് നേടി ക്രീസിലുണ്ട്.
