ഹൈദരാബാദിലെ കാഞ്ച ഗച്ചിബൗളി വനഭൂമി തെലങ്കാന സർക്കാർ വെട്ടി നശിപ്പിക്കുകയാണ്. സംഭവത്തിനെതിരെ കേന്ദ്ര സർക്കാർ മുമ്പെങ്ങുമില്ലാത്ത വേഗത്തിലാണ് പ്രതികരിച്ചിരിക്കുന്നത്. ബി.ജെ.പി ഭരിക്കുന്ന പ്രദേശങ്ങളിൽ നടക്കുന്ന വൻ തോതിലുള്ള വന നശീകരങ്ങൾക്ക് നേരെ കണ്ണടക്കുകയും അതെ സമയം തെലങ്കാനയിൽ പ്രതികരിക്കുകയും ചെയ്യുന്നത് കേന്ദ്ര സർക്കാരിന്റെ ഇരട്ടത്താപ്പ് വെളിവാക്കുന്നു.

ഹൈദരാബാദിലെ അവശേഷിക്കുന്ന അവസാനത്തെ നഗര വനങ്ങളിൽ ഒന്നാണ് കാഞ്ച ഗച്ചിബൗളി. ജൈവവൈവിധ്യത്താൽ സമ്പന്നമായ ഇവിടം നിരവധി പക്ഷികൾ, സസ്തനികൾ, ഉരഗങ്ങൾ എന്നിവയുടെ ആവാസ കേന്ദ്രമാണ്, മനോഹരമായ പാറക്കെട്ടുകളും ഇവിടെയുണ്ട്.

എന്നാൽ ഫെബ്രുവരിയിൽ തെലങ്കാന സർക്കാർ ഹൈദരാബാദ് സർവകലാശാലയോട് (യു.ഒ.എച്ച്) ചേർന്നുള്ള ഏകദേശം 400 ഏക്കർ വരുന്ന ഈ വനഭൂമി ഐ.ടി പാർക്കുകൾ നിർമ്മിക്കുന്നതിനായി ലേലം ചെയ്യാൻ പദ്ധതിയിടുന്നതായി പ്രഖ്യാപിച്ചു. പിന്നാലെ സംഭവത്തിനെതിരെ വൻ വിദ്യാർത്ഥി പ്രതിഷേധങ്ങൾ പൊട്ടിപ്പുറപ്പെട്ടു.

കാഞ്ച ഗച്ചിബൗളി പോലുള്ള നഗര വനങ്ങൾ തണൽ നൽകുന്നതിലൂടെയും, താപനില കുറയ്ക്കുന്നതിലൂടെയും, ഈർപ്പം വർധിപ്പിക്കുന്നതിലൂടെയും പ്രാദേശിക കാലാവസ്ഥയെ നിയന്ത്രിക്കാൻ സഹായിക്കുന്നു. തുടർന്ന് വിദ്യാർത്ഥികൾക്കൊപ്പം നിരവധി പരിസ്ഥിതി പ്രവർത്തകരും സമരത്തിന്റെ ഭാഗമായി. വളരെ വേഗം തന്നെ സമരം രാജ്യ ശ്രദ്ധ പിടിച്ചുപറ്റി.

തെലങ്കാന സർക്കാരിനെ സംബന്ധിച്ചിടത്തോളം, ഹൈദരാബാദിലെ ഫിനാൻഷ്യൽ ഡിസ്ട്രിക്റ്റിന്റെ മധ്യത്തിലാണ് ഈ വനം സ്ഥിതി ചെയ്യുന്നത്. ഭൂമി ലേലം ചെയ്യുന്നത് സർക്കാർ ഖജനാവ് നിറയ്ക്കുക മാത്രമല്ല, 50,000 കോടി രൂപയുടെ നിക്ഷേപ സാധ്യതകൾ ആകർഷിക്കുകയും അഞ്ച് ലക്ഷം തൊഴിലവസരങ്ങൾ സൃഷ്ടിക്കുകയും ചെയ്യുമെന്ന് സർക്കാർ പറയുന്നു. പക്ഷേ അതുണ്ടാക്കുന്ന പാരിസ്ഥിതിക ആഘാതം വളരെ വലുതാണ്. ഇതിനെതിരെ നടക്കുന്ന സമരം അടിച്ചമർത്തുകയാണ് തെലങ്കാന സർക്കാർ ചെയ്തത്.

സമരത്തിനിറങ്ങിയ വിദ്യാർത്ഥികളെ സർക്കാർ അടിച്ചമർത്തുകയും അറസ്റ്റ് ചെയ്യുകയും ചെയ്തു. സമാധാനപരമായി പ്രതിഷേധിച്ച വിദ്യാര്‍ത്ഥികളെ പൊലീസ് കൈയേറ്റം ചെയ്യുകയും മര്‍ദിക്കുകയും ചെയ്തു. പെണ്‍കുട്ടികളടക്കമുള്ള വിദ്യാര്‍ത്ഥികളെ വാനില്‍ സ്ഥലത്തെത്തിയ പൊലീസ് സംഘം ക്രൂരമായി മര്‍ദിക്കുകയും അറസ്റ്റ് ചെയ്യുകയുമായിരുന്നു. അറസ്റ്റ് ചെയ്ത് അഞ്ച് മണിക്കൂറുകള്‍ കഴിഞ്ഞിട്ടും പൊലീസ് വിദ്യാര്‍ത്ഥികളെ വിട്ടയച്ചിട്ടില്ലെന്ന് ഡൂള്‍ന്യൂസിനോട് സര്‍വകലാശാലയിലെ വിദ്യാര്‍ത്ഥി പറഞ്ഞിരുന്നു.

‘വളരെ ക്രൂരമായാണ് വാനിലെത്തിയ പൊലീസ് സംഘം വിദ്യാര്‍ത്ഥികളെ കൈകാര്യം ചെയ്തത്. കുതറി മാറിയ വിദ്യാര്‍ത്ഥിനിയെ പൊലീസ് നെഞ്ചില്‍ ചവിട്ടി. ആ വിദ്യാര്‍ത്ഥിനി അടുത്തുള്ള ആശുപത്രിയില്‍ ചികിത്സയിലാണ്. വിദ്യാര്‍ത്ഥികളെ വലിച്ചിഴച്ചതായും നിരവധി പേര്‍ക്കും പരിക്കേല്‍ക്കുകയും ധരിച്ച വസ്ത്രമടക്കം കീറിയ അവസ്ഥയുണ്ട്. അറസ്റ്റ് ചെയ്ത് അഞ്ച് മണിക്കൂറോളമായിട്ടും പൊലീസ് വിദ്യാര്‍ത്ഥികളെ വിട്ടയക്കാന്‍ തയ്യാറായിട്ടില്ല,’ സര്‍വകലാശാല വിദ്യാര്‍ത്ഥി പറഞ്ഞതായി ഡൂൾന്യൂസ് റിപ്പോർട്ടിൽ പറയുന്നു.

കാഞ്ച ഗച്ചിബൗളിയിലെ വനമേഖലയിൽ നിന്ന് തെലങ്കാന സർക്കാർ മരങ്ങൾ വെട്ടിമാറ്റാൻ തുടങ്ങിയപ്പോഴും വിദ്യാർത്ഥി പ്രക്ഷോഭങ്ങൾ അടിച്ചമർത്തിയപ്പോഴും, കേന്ദ്ര സർക്കാർ വളരെ പെട്ടെന്ന് തന്നെ പ്രതികരിച്ചു. സുപ്രീം കോടതിയും ഇടപെട്ടു.

കാഞ്ച ഗച്ചിബൗളിയിലെ വനനശീകരണത്തെക്കുറിച്ച് തെലങ്കാനയിലെ ബി.ജെ.പി എം.പി രാജ്യസഭയിലെ ചോദ്യോത്തര വേളയിൽ സംസാരിച്ചതിന് ശേഷം, ഏപ്രിൽ മൂന്നിന് രാജ്യസഭയിൽ കേന്ദ്ര പരിസ്ഥിതി മന്ത്രി ഭൂപേന്ദർ യാദവ് ഉത്തരവാദികളായവർക്കെതിരെ തങ്ങൾ നടപടിയെടുക്കുമെന്ന് പറഞ്ഞു.

‘തെലങ്കാന സർക്കാരിന് മരങ്ങളോട് എന്ത് ശത്രുതയാണുള്ളതെന്ന് എനിക്ക് മനസ്സിലാകുന്നില്ല, രാത്രിയിൽ ബുൾഡോസറുകളും ഹിറ്റാച്ചികളും ഉപയോഗിച്ച് അവർ മരങ്ങൾ മുറിച്ചുമാറ്റുന്നു. ഏകദേശം 400 മരങ്ങൾ വെട്ടിമാറ്റപ്പെട്ടു, ഇത് പ്രദേശത്തെ വന്യജീവികൾക്ക് അപകടമുണ്ടാക്കുന്നു,’ യാദവ് രാജ്യസഭയിൽ പറഞ്ഞു. കാഞ്ച ഗച്ചിബൗളിയിലെ മരംമുറിക്കലിനോട് കേന്ദ്രമന്ത്രി പെട്ടെന്ന് പ്രതികരിച്ചു. ഏപ്രിൽ 3 ന് അതേ ദിവസം തന്നെ മരംമുറിക്കൽ നിർത്താൻ സുപ്രീം കോടതിയും ഉത്തരവിട്ടു.

പക്ഷേ, ബി.ജെ.പി ഭരിക്കുന്ന സംസ്ഥാനങ്ങളിലും കേന്ദ്രഭരണ പ്രദേശങ്ങളിലും സമാനമായ വനനശീകരണങ്ങൾ നടന്നപ്പോൾ ഈ പ്രതികരണം ഉണ്ടായില്ലലോ എന്ന ചോദ്യം ഉയരുന്നു ഇപ്പോൾ. ബി.ജെ.പിയുടെ അധികാരപരിധിയിലുള്ള സ്ഥലങ്ങളിൽ നടന്ന വനനശീകരങ്ങൾക്കെതിരെ പെട്ടന്നുള്ള നടപടികൾ ഉണ്ടായിട്ടില്ലെന് ദി വയർ റിപ്പോർട്ട് ചെയ്‌തു. അത്തരം ചില വനശീകരങ്ങൾ ഏതൊക്കെയാണെന്ന് ഒന്ന് പരിശോധിച്ചാലോ

ആൻഡമാൻ നിക്കോബാർ ദ്വീപ് കൂട്ടങ്ങളിലെ തെക്കേ അറ്റത്തുള്ള ദ്വീപായ ഗ്രേറ്റ് നിക്കോബാർ ദ്വീപിൽ 70,000 കോടിയിലധികം രൂപയുടെ നിരവധി വികസന പദ്ധതികൾ നടക്കുകയാണ്. ഇതിൽ ഒരു അന്താരാഷ്ട്ര ട്രാൻസ്ഷിപ്പ്മെന്റ് ടെർമിനൽ, ഒരു ഗ്രീൻഫീൽഡ് വിമാനത്താവളം , ഒരു ടൗൺഷിപ്പ്, പവർ പ്ലാന്റ് എന്നിവ ഉൾപ്പെടുന്നു. ഈ പദ്ധതിക്കായി ദ്വീപിലെ മഴക്കാടുകളിൽ നിന്ന് ഒരു ദശലക്ഷം മരങ്ങൾ വെട്ടിമാറ്റാൻ പോകുന്നു.

ദ്വീപിലെ ജൈവവൈവിധ്യത്തെയും , പ്രത്യേകിച്ച് ദുർബല ഗോത്ര വിഭാഗങ്ങളിൽ പെടുന്ന ഷോംപെൻ, നിക്കോബാറീസ് ഉൾപ്പെടെയുള്ള തദ്ദേശീയ സമൂഹങ്ങളെയും പദ്ധതികൾ സാരമായി ബാധിക്കുമെന്ന് പരിസ്ഥിതി ശാസ്ത്രജ്ഞരും സാമൂഹിക ശാസ്ത്രജ്ഞരും ആവർത്തിച്ച് മുന്നറിയിപ്പ് നൽകിയിട്ടുണ്ട്.

ഈ മുന്നറിയിപ്പുകൾ ഉണ്ടായിരുന്നിട്ടും, കേന്ദ്ര സർക്കാർ പദ്ധതികളുമായി മുന്നോട്ട് പോകുക മാത്രമല്ല, പദ്ധതികൾ പാരിസ്ഥിതിക ആഘാതങ്ങൾ ഉണ്ടാക്കുകയോ തദ്ദേശീയ ജനതയെ ഒരു തരത്തിലും ബാധിക്കുകയോ ചെയ്യില്ലെന്ന് അവകാശപ്പെടും ചെയ്യുന്നു. ഇന്ത്യയുടെ പരമോന്നത ഹരിത കോടതിയായ നാഷണൽ ഗ്രീൻ ട്രൈബ്യൂണലും പദ്ധതിക്ക് അനുവദിച്ച പരിസ്ഥിതി, വന അനുമതികളിൽ ഇടപെടില്ല എന്ന് പറഞ്ഞ് കൈയൊഴിഞ്ഞിരിക്കുകയാണ്.

ദ്വീപിലെ ആദിവാസി വിഭാഗമായ ഷോംപെൻ ജനതയുടെ വംശഹത്യയ്ക്ക് ഈ പദ്ധതി കാരണമാകുമെന്നും ഏറ്റവും വലിയ ജൈവവൈവിധ്യമുള്ള ആവാസവ്യവസ്ഥയായ ഗ്രേറ്റ് നിക്കോബാർ ദ്വീപിലെ വനങ്ങൾ മുഴുവനും പദ്ധതിയിലൂടെ ഇല്ലാതായേക്കുമെന്നും കോൺഗ്രസ് നേതാവ് ജയറാം രമേശ് വിമർശിച്ചിരുന്നു.

ഛത്തീസ്ഗഡിലെ ഹസ്ദിയോ അരന്ദിൽ നടന്ന വൻതോതിലുള്ള വനനശീകരണം നടക്കുകയാണ്. 2012 മുതൽ, വടക്കൻ ഛത്തീസ്ഗഡിലെ ഹസ്ദിയോ അരന്ദ് വനങ്ങളിൽ ഖനനം വ്യാപകമായിട്ടുണ്ട്. 1,500 ചതുരശ്ര കിലോമീറ്ററിലധികം വിസ്തൃതിയുള്ള ഇന്ത്യയിലെ അവസാനത്തെ തുടർച്ചയായ വനഭൂമികളിൽ ഒന്നാണിത്. രാജസ്ഥാനിലെ സംസ്ഥാന വൈദ്യുതി കമ്പനിക്കായി ഒരു ദശാബ്ദത്തിലേറെയായി അദാനി ഗ്രൂപ്പ് ഈ വനഭൂമികളിൽ നിന്ന് കൽക്കരി വേർതിരിച്ചെടുക്കുന്നു.

2006 ലെ വനാവകാശ നിയമം അനുസരിച്ച്, ഏതൊരു പദ്ധതിക്കും വനാനുമതി നൽകുന്നതിന് മുമ്പ് വനാവകാശ ക്ലെയിം പ്രക്രിയ പൂർത്തിയാക്കുകയും ബന്ധപ്പെട്ട ഗ്രാമസഭകളിൽ നിന്ന് രേഖാമൂലമുള്ള സമ്മതം നേടുകയും ചെയ്യുന്നത് നിർബന്ധമാണ്. ഹസ്ദിയോ അരന്ദ് പ്രദേശത്തെ ഗ്രാമസഭകളിൽ നിന്ന് വ്യാജ സമ്മതം നേടുകയായിരുന്നെന്ന് ഛത്തീസ്ഗഢ് ബച്ചാവോ ആന്ദോളന്റെ കൺവീനർ അലോക് ശുക്ല ദി വയറിനോട് പറഞ്ഞു.

ഹസ്ദിയോ അരന്ദിൽ നടന്നുകൊണ്ടിരിക്കുന്ന ഈ വനനശീകരണം പ്രദേശത്തെ തദ്ദേശീയ സമൂഹങ്ങളിൽ നിന്ന് കടുത്ത പ്രതിഷേധത്തിന് ഇടയാക്കിയിട്ടുണ്ട്. ഇവിടുത്തെ ആളുകൾ ഈ വനങ്ങളെ ആരാധിക്കുക മാത്രമല്ല , ഉപജീവനത്തിനും ഉപജീവനത്തിനും അവയെ വളരെയധികം ആശ്രയിക്കുകയും ചെയ്യുന്നു.

കണക്കുകൾ പ്രകാരം, പ്രദേശത്ത് ഏകദേശം ഒരു ലക്ഷത്തോളം മരങ്ങൾ മുറിച്ചുമാറ്റി. വനനശീകരണത്തിനെതിരെ ആദിവാസികളും പരിസ്ഥിതി പ്രവർത്തകരും വലിയ സമരങ്ങൾ നടത്തി. സ്ഥലത്ത് അവസാനമായി സമരത്തോടനുബന്ധിച്ച് ഏറ്റുമുട്ടൽ ഉണ്ടായത് 2023 ഡിസംബറിലാണ്. അതിന് പിന്നാലെ കർശന പൊലീസ് സംരക്ഷണത്തിൽ 15,000 മരങ്ങൾ മുറിച്ചുമാറ്റി.

പക്ഷെ ഇതുവരെയും ഹസ്ദിയോയിൽ മുറിച്ച് മാറ്റപ്പെട്ട മരങ്ങളുടെ മൊത്തം എണ്ണം അധികൃതർ കുറച്ച് കാണിക്കുന്നെന്ന് പ്രവർത്തകർ പറയുന്നു. വൻതോതിലുള്ള വനനശീകരണം വന്യ മൃഗങ്ങളുടെ ആക്രമണങ്ങൾ വർധിക്കുന്നതിന് കാരണമായിട്ടുണ്ടെന്നും പ്രദേശവാസികൾ പറയുന്നു. എന്നാൽ കേന്ദ്ര ഗവൺമെന്റ് ഈ ലംഘനങ്ങൾക്ക് നേരെ കണ്ണടച്ചിരിക്കുകയാണ്.

മറ്റൊരു വനനശീകരണം നടന്നത് ഉത്തരപ്രദേശിലാണ്. കൻവാർ യാത്രാ റൂട്ടിനായി യുപിയിൽ 17,000 മരങ്ങൾ മുറിച്ചുമാറ്റിയാതായി ദി ഹിന്ദു റിപ്പോർട്ട് ചെയ്തിരുന്നു. ഉത്തർപ്രദേശിൽ, ഗാസിയാബാദ്, മീററ്റ്, മുസാഫർനഗർ ജില്ലകളിലായി 17,607 മരങ്ങൾ ഇതിനകം മുറിച്ചുമാറ്റിയിട്ടുണ്ട്. സംസ്ഥാന സർക്കാരിന്റെ പൊതുമരാമത്ത് വകുപ്പ് നൽകിയ ഡാറ്റ പ്രകാരം, പുതിയ 111 കിലോമീറ്റർ ദൈർഘ്യമുള്ള കൻവാർ യാത്രാ റൂട്ടിന് വഴിയൊരുക്കാനാണ് ഇത് ചെയ്തത്.

അനുമതികൾ ഇല്ലാതെയാണ് ഇത് ചെയ്തതെന്ന് ഫോറസ്റ്റ് സർവേ ഓഫ് ഇന്ത്യ, ദേശീയ ഹരിത ട്രൈബ്യൂണലിന് സമർപ്പിച്ച സത്യവാങ്മൂലത്തിൽ ചൂണ്ടിക്കാട്ടി. മരംമുറിക്കൽ ഇപ്പോൾ താൽക്കാലികമായി നിർത്തിവച്ചിട്ടുണ്ടെങ്കിലും, 111 കിലോമീറ്റർ ദൈർഘ്യമുള്ള റൂട്ടിന്റെ ഏകദേശം 60 കിലോമീറ്ററോളം മരങ്ങൾ ഇതിനകം മുറിച്ചുമാറ്റിയിട്ടുള്ളതിനാൽ ഉടൻ തന്നെ അത് പുനരാരംഭിക്കാൻ സാധ്യതയുണ്ട്.

ബി.ജെ.പി ഭരിക്കുന്ന ഉത്തർപ്രദേശിലെ മിർസാപൂരിലെ വരണ്ട ഇലപൊഴിയും വനങ്ങളിൽ കൽക്കരി അധിഷ്ഠിത താപവൈദ്യുത നിലയമായാ അദാനിയുടെ മിർസാപൂർ തെർമൽ എനർജി (യു.പി) പ്രൈവറ്റ് ലിമിറ്റഡ് സ്ഥാപിക്കാനൊരുങ്ങുന്നു.

മിർസാപൂർ ജില്ലയിലെ ദാദ്രി ഖുർദ് ഗ്രാമത്തിന്റെ പരിധിയിലാണ് 365 ഹെക്ടർ വിസ്തൃതിയുള്ള ഈ ഭൂമി. 18,300 കോടി രൂപ ചെലവിൽ 1600 മെഗാവാട്ട് വൈദ്യുതി നിലയം ഇവിടെ നിർമിക്കാനാണ് അദാനി ഗ്രൂപ് ശ്രമിക്കുന്നത്.

സ്ലോത്ത് ബിയർ, വരയുള്ള കഴുതപ്പുലി എന്നിവയുൾപ്പെടെയുള്ള വംശനാശഭീഷണി നേരിടുന്ന ജീവിവർഗങ്ങളുടെ ആവാസ കേന്ദ്രമായ ഏകദേശം എട്ട് ഹെക്ടർ ഭൂമിയാണ് വെട്ടിത്തെളിക്കുന്നത്.

പാരിസ്ഥിതിക അനുമതി ഇല്ലാതിരുന്നിട്ടും, അദാനിയുടെ മിർസാപൂർ തെർമൽ എനർജി (യു.പി) പ്രൈവറ്റ് ലിമിറ്റഡ് ഏകദേശം 365 ഹെക്ടർ വനഭൂമിയിൽ കൽക്കരി അധിഷ്ഠിത താപവൈദ്യുത നിലയം സ്ഥാപിക്കുന്നതിന് മുമ്പുള്ള നിർമ്മാണ പ്രവർത്തനങ്ങൾ ആരംഭിച്ചിട്ടുണ്ട്.

2014 ഓഗസ്റ്റ് 21ന്, വെൽസ്പൺ എനർജി യു.പി പ്രൈവറ്റ് ലിമിറ്റഡ് 660 മെഗാവാട്ട് വീതം ശേഷിയുള്ള രണ്ട് യൂണിറ്റുകളുള്ള ഒരു ഗ്രീൻഫീൽഡ് തെർമൽ പവർ പ്ലാന്റ് സ്ഥാപിക്കുന്നതിന് ഇതേസ്ഥലത്ത് പരിസ്ഥിതി അനുമതി തേടിയിരുന്നു. ആദ്യം അന്നത്തെ മൻമോഹൻ സിങ് സർക്കാർ അനുമതി നൽകിയെങ്കിലും പിന്നീട് ദേശീയ ഹരിത ട്രൈബ്യുണൽ പ്രദേശത്തിന്റെ പാരിസ്ഥിതിക പ്രാധാന്യം പറഞ്ഞുകൊണ്ട് ഇത് റദ്ദാക്കിയിരുന്നു.

ഖനനത്തിനും നിർമ്മാണത്തിനുമായി ആരവല്ലിയിലെ വരണ്ട വനങ്ങൾ വെട്ടിത്തെളിച്ചു നശിപ്പിച്ചിരിക്കുകയാണ്. രാജ്യ തലസ്ഥാനത്തും കേന്ദ്ര സർക്കാർ ഓഫീസുകളുടെ മൂക്കിനു താഴെയും നടന്ന വനനശീകരണത്തിന്റെ മറ്റൊരു കഥയുണ്ട്. ഗുജറാത്ത്, രാജസ്ഥാൻ, ഹരിയാന എന്നിവിടങ്ങളിൽ വ്യാപിച്ചുകിടക്കുന്ന ആരവല്ലി പർവതനിരകളും അതിന്റെ ചില ഭാഗങ്ങളും ദേശീയ തലസ്ഥാന മേഖല (എൻ‌.സി‌.ആർ) വരെ വ്യാപിച്ച് കിടക്കുന്നുണ്ട്.

പതിറ്റാണ്ടുകളായി ഇവിടെ ഖനനത്തിനും നിർമ്മാണത്തിനുമായി വനങ്ങളും കുറ്റിക്കാടുകളും വെട്ടിത്തെളിച്ചുകൊണ്ടിരിക്കുകയാണ്. രാജസ്ഥാൻ സെൻട്രൽ യൂണിവേഴ്സിറ്റി നടത്തിയ പഠനത്തിൽ കഴിഞ്ഞ 44 വർഷത്തിനിടെ ആരവല്ലിയിലെ വനങ്ങൾ 7.6% കുറഞ്ഞുവെന്ന് കണ്ടെത്തി. മറ്റൊരു കണക്കനുസരിച്ച്, ഹരിയാനയിലെ നുഹ് ജില്ലയിൽ മാത്രം ഏകദേശം 858 ദശലക്ഷം മെട്രിക് ടൺ കല്ല് അനധികൃതമായി ഖനനം ചെയ്തിട്ടുണ്ട്, ഇത് ഏകദേശം 2,000 കോടി രൂപയുടെ നഷ്ടത്തിന് കാരണമാകും.

2018 ൽ, എൻ‌.സി‌.ആറിൽ പൊടിക്കാറ്റുകൾ ഉണ്ടായി. പൊടിക്കാറ്റുണ്ടായ പ്രദേശത്ത് വൻതോതിലുള്ള വനനശീകരണം നടത്തിയതിന് ദേശീയ മനുഷ്യാവകാശ കമ്മീഷൻ കേന്ദ്ര സർക്കാരിനും രാജസ്ഥാൻ, ഹരിയാന സംസ്ഥാന സർക്കാരുകൾക്കും നോട്ടീസ് നൽകിയിരുന്നു.
ഖനനവും വനനശീകരണവും ഭൂഗർഭജലവിതാനം കുറയാൻ കാരണമായി. ഇതിന്റെ ഫലമായി കുന്നിൻ പ്രദേശങ്ങളിലും പരിസര പ്രദേശങ്ങളിലും കുടിവെള്ളക്ഷാമം ഉണ്ടായിട്ടുണ്ട്. നഗരവൽക്കരണം ആരവല്ലികളിലേക്കുള്ള കൈയേറ്റത്തിനും കാരണമായി.

ഈ വർഷം ജനുവരിയിൽ ഇന്ത്യയിലെ ഏക കുരങ്ങ് സങ്കേതമായ ഹോളോംഗാപർ ഗിബ്ബൺ വന്യജീവി സങ്കേതത്തിലെ പരിസ്ഥിതി സെൻസിറ്റീവ് മേഖലയിൽ കേന്ദ്ര സർക്കാർ എണ്ണ ഖനനത്തിന് അംഗീകാരം നൽകി. എണ്ണ ഖനന പദ്ധതിയുടെ വിസ്തീർണ്ണം താരതമ്യേന കുറവാണ് ഏകദേശം 11 ഏക്കർ. വിസ്തൃതിയുടെ കാര്യത്തിൽ കാഞ്ച ഗച്ചിബൗളിയിലെ 400 ഏക്കറിനടുത്ത് വരുന്നില്ലെങ്കിലും, എണ്ണ പര്യവേക്ഷണ പ്രവർത്തനങ്ങൾ
കുരങ്ങ് സങ്കേതത്തിൽ ജീവിക്കുന്ന ഇന്ത്യയിലെ ഏക കുരങ്ങൻ ഇനമായ ഹൂലോക്ക് ഗിബ്ബണിന്റെ എന്നതിൽ കാര്യാമായ കുറവുണ്ടാകും.
ചുറ്റുമുള്ള ഗ്രാമങ്ങളിൽ, വന്യമൃഗങ്ങളുടെ ആക്രമണങ്ങൾ വർധിക്കുമെന്നും വിദഗ്ദ്ധർ ആശങ്കപ്പെടുന്നതായി ദി വയർ റിപ്പോർട്ട് ചെയ്തു.

Content Highlight: The central government, which comes to the rescue in Hyderabad’s deforestation, is burning forests across the country