മലയാളികള്‍ക്ക് ഇന്ന് ഏറെ പരിചിതനായ വ്യക്തിയാണ് ശ്രീകാന്ത് മുരളി. കെ.ജി. ജോര്‍ജ്, പ്രിയദര്‍ശന്‍ എന്നിവരുടെ സംവിധാന സഹായിയായിട്ടാണ് അദ്ദേഹം തന്റെ സിനിമാജീവിതം ആരംഭിച്ചത്. വിനീത് ശ്രീനിവാസനെ നായകനാക്കി 2017ല്‍ റിലീസായ എബിയിലൂടെയാണ് അദ്ദേഹം സ്വതന്ത്രസംവിധായകനായി മാറിയത്.
1997ല്‍ പുറത്തിറങ്ങിയ പ്രിയദര്‍ശന്‍ ചിത്രമായ ചന്ദ്രലേഖയില്‍ ശ്രീകാന്ത് മുരളി സംവിധാന സഹായിയായി പ്രവര്‍ത്തിച്ചിരുന്നു. മോഹന്‍ലാലിനെ നായകനാക്കി പ്രിയദര്‍ശന്‍ എഴുതിയ ഈ സിനിമ നിര്‍മിച്ചത് സംവിധായകന്‍ ഫാസിലായിരുന്നു.
ഇപ്പോള്‍ ഈ സിനിമയുടെ സമയത്ത് മോഹന്‍ലാലിനെ കണ്ട അനുഭവം പങ്കുവെക്കുകയാണ് ശ്രീകാന്ത് മുരളി. മോഹന്‍ലാലിന്റെ സംസാരം കേള്‍ക്കുമ്പോള്‍ അദ്ദേഹത്തിന്റെ ഏറ്റവും പ്രിയങ്കരനാണ് നമ്മളെന്ന് തോന്നിപോകുമെന്നാണ് ശ്രീകാന്ത് പറയുന്നത്. യെസ് 27 എന്ന യൂട്യൂബ് ചാനലിനോട് സംസാരിക്കുകയായിരുന്നു അദ്ദേഹം.
ഇന്നത്തെ പോലെ ടൈപ്പ് ചെയ്യാനോ പല പ്രിന്റുകള്‍ അടിക്കാനോയുള്ള സാഹചര്യം അന്ന് ഉണ്ടായിരുന്നില്ല. പകരം ഒരു എ.ഫോര്‍ സൈസ് പേപ്പര്‍ എടുത്ത് അതില്‍ എഴുതുകയെന്ന് മാത്രമായിരുന്നു മാര്‍ഗം. അതൊക്കെ എഴുതി കഴിഞ്ഞ സാഹചര്യത്തില്‍ ഒരു ദിവസം ആ സിനിമയുടെ പ്രൊഡ്യൂസറായ ഫാസില്‍ സാര്‍ വന്നു. അദ്ദേഹം പ്രിയന്‍ സാറിന്റെ ഗുരു കൂടെ ആയിരുന്നു.
അന്ന് തന്നെ ശ്രീനിയേട്ടനും വന്നു. അദ്ദേഹം വന്ന് കുറച്ചു കഴിഞ്ഞതും മോഹന്‍ലാല്‍ സാറും അവിടേക്ക് വന്നു. ലാല്‍ സാര്‍ അന്ന് അധിക നേരം അവിടെ നിന്നിരുന്നില്ല. എത്ര സമയം അദ്ദേഹം അവിടെ നിന്നുവെന്ന് എനിക്ക് ഓര്‍മയില്ല. ഒരു ബഹളമുണ്ടാക്കി, അദ്ദേഹം വന്ന് നമ്മളെ പരിചയപ്പെട്ടു. ഉച്ചക്ക് ഊണ് കഴിക്കാന്‍ നേരം കുറച്ച് കറിയൊക്കെ വിളമ്പി തന്നിട്ടാണ് അ്‌ദ്ദേഹം അന്ന് പോയത്.
അങ്ങനെയുള്ള ആളാണ് ലാല്‍ സാര്‍. അദ്ദേഹം ആരുമായും എളുപ്പം കമ്മ്യൂണിക്കേറ്റ് ചെയ്യും. ലാല്‍ സാറിന്റെ സംസാരത്തിന് ഒരു പ്രത്യേകതയുണ്ട്. അത് കേള്‍ക്കുമ്പോള്‍ ലാല്‍ സാറിന്റെ ഏറ്റവും പ്രിയങ്കരനാണ് നമ്മളെന്ന് നമുക്ക് തോന്നും. അങ്ങനെയുള്ള വ്യക്തിയാണ് അദ്ദേഹം. ലാല്‍ സാറിന്റെ ഏറ്റവും ഫേവറൈറ്റ് നമ്മളാണെന്ന് അദ്ദേഹം തോന്നിപ്പിക്കും. അത് സാറിന്റെ ഒരു മെക്കാനിസമാണ്,’ ശ്രീകാന്ത് മുരളി പറഞ്ഞു.
Content Highlight: Srikanth Murali Talks About Mohanlal