ഇന്ത്യന്‍ സൂപ്പര്‍ താരങ്ങളായ രോഹിത് ശര്‍മയുടെയും വിരാട് കോഹ്ലിയുടെയും ഏകദിന ക്രിക്കറ്റിലെ ഭാവിയെ കുറിച്ചുള്ള ചോദ്യങ്ങളില്‍ പ്രതികരിക്കുകയാണ് ഇന്ത്യന്‍ ക്യാപ്റ്റന്‍ ശുഭ്മന്‍ ഗില്‍. ഓസീസിനെതിരായ ഏകദിന പരമ്പരയ്ക്ക് ശേഷം ഇരുവരും വിരമിച്ചേക്കുമെന്ന് പല മുന്‍ താരങ്ങളും അഭിപ്രായപ്പെട്ടിരുന്നു.

എന്നാല്‍ ഇരുവരുടെയും ക്രിക്കറ്റ് ഭാവിയെ കുറിച്ച് ഒരു ചര്‍ച്ചയും നടന്നിട്ടില്ലെന്നാണ് ഗില്‍ മാധ്യമങ്ങളോട് പ്രതികരിച്ചത്. മാത്രമല്ല ഡിസംബര്‍ ആറിന് സൗത്ത് ആഫ്രിക്കയ്‌ക്കെതിരായ ഏകദിന പരമ്പര അവസാനിച്ചുകഴിഞ്ഞാല്‍ അന്താരാഷ്ട്ര ക്രിക്കറ്റില്‍ ഇന്ത്യയ്ക്ക് ഇടവേളയുണ്ടാകുമെന്നും രോഹിത്തിനും വിരാടിനും തങ്ങളുടെ ഭാവിയെ കുറിച്ച് അപ്പോള്‍ ഒരു തീരുമാനം എടുക്കുമെന്നും ഗില്‍ പറഞ്ഞു.

‘ഞങ്ങള്‍ ഇതുവരെ അതിനെക്കുറിച്ച് സംസാരിച്ചിട്ടില്ല. എന്നാല്‍ ഡിസംബര്‍ ആറിന് സൗത്ത് ആഫ്രിക്കയ്‌ക്കെതിരായ ഏകദിന പരമ്പര അവസാനിക്കും. അതിന് ശേഷം അടുത്തവര്‍ഷം ജനുവരി 11നാണ് ന്യൂസിലാന്‍ഡിനെതിരായ ഏകദിന പരമ്പര ആരംഭിക്കുക.

അതിനിടയില്‍ അന്താരാഷ്ട്ര ക്രിക്കറ്റില്‍ ചെറിയൊരു ഇടവേളയുണ്ടാകുമെന്ന് ഞാന്‍ കരുതുന്നു. രോഹിത്തും വിരാടും തങ്ങളുടെ ഭാവിയെ കുറിച്ച് അപ്പോള്‍ ഒരു തീരുമാനം എടുക്കുമെന്നാണ് ഞാന്‍ കരുതുന്നത്,’ വാര്‍ത്താസമ്മേളനത്തില്‍ ഗില്‍ പറഞ്ഞു.

രോഹിത് ശര്‍മയുടേയും വിരാട് കോഹ്ലിയുടേയും തകര്‍പ്പന്‍ പ്രകടനത്തിന്റെ മികവിലാണ് ഇന്ത്യ പരമ്പരയിലെ ആശ്വാസ വിജയം സ്വന്തമാക്കിയത്. ഒമ്പത് വിക്കറ്റിനായിരുന്നു ഇന്ത്യ വിജയം സ്വന്തമാക്കിയത്. മത്സരത്തില്‍ രോഹിത് ശര്‍മ 125 പന്തില്‍ 13 ഫോറും മൂന്ന് സിക്സും ഉള്‍പ്പെടെ 121 റണ്‍സാണ് പുറത്താകാതെ നേടിയത്. തന്റെ 33ാം ഏകദിന സെഞ്ച്വറിയാണ് രോഹിത് സിഡ്നിയില്‍ സ്വന്തമാക്കിയത്. കഴിഞ്ഞ രണ്ട് മത്സരങ്ങളിലും പൂജ്യത്തിന് പുറത്തായ വിരാട് കോഹ്ലി 81 പന്തില്‍ നിന്ന് ഏഴ് ഫോര്‍ ഉള്‍പ്പെടെ 74* റണ്‍സും നേടിയും തിളങ്ങി.

ഇനി ഇന്ത്യ കളത്തിലിറങ്ങുന്നത് ഓസ്‌ട്രേലിയക്കെതിരായ ടി-20 പരമ്പരയ്ക്കാണ്. അഞ്ച് മത്സരങ്ങള്‍ അടങ്ങുന്ന പരമ്പരയിലെ ആദ്യ മത്സരം ഒക്ടോബര്‍ 29നാണ് ആരംഭിക്കുക. ക്യാപ്റ്റന്‍ ശുഭ്മന്‍ ഗില്ലിന്റെ ക്യാപ്റ്റന്‍സിയില്‍ ഇന്ത്യ കളത്തിലിറങ്ങുമ്പോള്‍ ഫസ്റ്റ് ചോയിസ് വിക്കറ്റ് കീപ്പറായി മലയാള സൂപ്പര്‍ താരം സഞ്ജു സാസംണും ടീമിലുണ്ടാകുമെന്നാണ് ഏവരും പ്രതീക്ഷിക്കുന്നത്.

Content Highlight: Shubhman Gill Talking About Rohit Sharma And Virat Kohli