രണ്ട് ചരിത്രത്തിന്റെയും അമരത്ത് ഒരേയൊരു നായകൻ 'ശ്രേയസ് സന്തോഷ് അയ്യർ'

ന്യൂസിലാൻഡിനെതിരെയുള്ള അഞ്ച് ടി-20 മത്സരങ്ങളുടെ പരമ്പരയിലെ ആദ്യ മത്സരത്തിൽ ഇന്ത്യ നാല് വിക്കറ്റിന്റെ തകർപ്പൻ വിജയം സ്വന്തമാക്കിയിരിക്കുകയാണ്. ക്രൈസ്റ്റ് ചർച്ചിൽ നടന്ന മത്സരത്തിൽ ന്യൂസിലാൻഡ് ഉയർത്തിയ 226 റൺസിന്റെ കൂറ്റൻ വിജയലക്ഷ്യം പിന്തുടർന്നിറങ്ങിയ ഇന്ത്യ 19.4 ഓവറിൽ അനായാസമായി മറികടക്കുകയായിരുന്നു.

ഗ്ലെൻ ഫിലിപ്‌സിന്റെ 82 റൺസിന്റെ തകർപ്പൻ ഇന്നിങ്‌സ് കരുത്തിൽ മികച്ച ടോട്ടൽ നേടിയ ന്യൂസിലാൻഡിനെതിരെ സഞ്ജു സാംസണിന്റെയും (67), നമൻ ധിറിന്റെയും(42*), ക്യാപ്റ്റൻ ശ്രേയസ് അയ്യരുടെയും (42) തകർപ്പൻ ഇന്നിങ്‌സിലൂടെ ഇന്ത്യ തിരിച്ചടിക്കുകയായിരുന്നു.

A powerful batting display helps India chase down a target of 226 in the T20I series opener against New Zealand 💪 📝: https://t.co/IVpAEwsDMs https://t.co/mB6dCwDoqk

— ICC (@ICC) October 22, 2026

ഇന്റർനാഷണൽ ടി-20യിലെ ഇന്ത്യയുടെ റെക്കോഡ് റൺ ചെയ്‌സിനാണ് ആരാധകർ സാക്ഷ്യം വഹിച്ചത്. 2023ൽ വിശാഖപട്ടണത്ത് ഓസ്‌ട്രേലിയക്കെതിരെ നടത്തിയ 209 റൺസിന്റെ ചെയ്‌സിങ് റെക്കോഡാണ് അയ്യരും സംഘവും പഴങ്കഥയാക്കിയത്.

ഇതാദ്യമായല്ല, അയ്യരുടെ ക്യാപ്റ്റൻസിക്ക് കീഴിൽ കുട്ടി ക്രിക്കറ്റിൽ റെക്കോഡ് ചെയ്‌സിങ്ങുകൾ പിറവിയെടുക്കുന്നത്. ഐ.പി.എല്ലിലെ ഏറ്റവും ഉയർന്ന സ്കോർ ചെയ്‌സ് ചെയ്ത് വിജയിച്ച ക്യാപ്റ്റനെന്ന നേട്ടവും ശ്രേയസ് അയ്യരുടെ പേരിലാണ്. ഇപ്പോൾ ഇന്ത്യൻ ക്യാപ്റ്റനെന്ന നിലയിലും ഈ നേട്ടം അയ്യരുടെ കൈകളിൽ എത്തിയിരിക്കുകയാണ്.

2026 ഐ.പി.എല്ലിലായിരുന്നു അയ്യരുടെ കീഴിൽ പഞ്ചാബ് കിങ്‌സ് ചരിത്ര വിജയം സ്വന്തമാക്കിയിരുന്നത്. ദൽഹി ക്യാപിറ്റൽസിനെതിരെയായിരുന്നു അയ്യരുടെയും സംഘത്തിന്റെയും റെക്കോഡ് ചെയ്‌സിങ്. ദൽഹി ഉയർത്തിയ 264 റൺസ് പിന്തുടർന്ന കിങ്സ് ഏഴ് പന്തുകൾ ബാക്കി നിൽക്കെ ലക്ഷ്യം മറികടക്കുകയായിരുന്നു.

തങ്ങളുടെ തന്നെ റെക്കോഡ് തിരുത്തിയെഴുതിയാണ് പഞ്ചാബ് ഈ നേട്ടം സ്വന്തമാക്കിയിരുന്നത്. കൊൽക്കത്ത നൈറ്റ് റൈഡേഴ്‌സിനെതിരെ പഞ്ചാബ് 2024ൽ 262 റൺസ് പിന്തുടർന്ന് ജയിച്ചിരുന്നു.

മത്സരത്തിൽ പ്രഭ്സിമ്രാൻ സിങ്ങും ശ്രേയസ് അയ്യരും അർധ സെഞ്ച്വറി നേടിയാണ് പഞ്ചാബിന് ചരിത്ര വിജയം സമ്മാനിച്ചത്. പ്രഭ്സിമ്രാൻ 26 പന്തിൽ 76 റൺസും ശ്രേയസ് 36 പന്തിൽ പുറത്താവാതെ 71 റൺസും സ്കോർ ചെയ്തു. പ്രിയാൻഷ് ആര്യ 17 പന്തിൽ 43 റൺസ് നേടി മികവ് പുലർത്തി.

ശ്രേയസ് അയ്യർ. Photo: Shreyas Iyer/x.com

മത്സരത്തിൽ ദൽഹിക്കായി കെ.എൽ. രാഹുൽ 67 പന്തിൽ 152 റൺസ് നേടിയിട്ടും ക്യാപിറ്റൽസ് പരാജയത്തിലേക്ക് വീഴുകയായിരുന്നു. നിതീഷ് റാണ 44 പന്തിൽ 91 റൺസും നേടിയിരുന്നു.

എന്നാൽ അടുത്തിടെ മറ്റൊരു ടീം പഞ്ചാബിന്റെ ലോക റെക്കോഡ് ചെയ്‌സിങ് മറികടന്നിരുന്നു. മേജർ ലീഗ് ക്രിക്കറ്റിൽ വാഷിങ്ങ്ടൺ ഫ്രീഡമായിരുന്നു ടി-20യിലെ റെക്കോഡ് ചെയ്‌സിങ് നടത്തി പഞ്ചാബിന്റെ റെക്കോഡ് തകർത്തിരുന്നത്.

എം.ഐ ന്യൂയോർക്ക് സിറ്റിക്കെതിരെയായിരുന്നു വാഷിങ്ടൺ വിജയിച്ചുകയറിയത്. മത്സരത്തിൽ ആദ്യം ബാറ്റ് ചെയ്ത ന്യൂയോർക്ക് 20 ഓവറിൽ ഒമ്പത് വിക്കറ്റ് നഷ്ടത്തിൽ 266 റൺസാണ് നേടിയത്. വിജയലക്ഷ്യം പിന്തുടർന്ന വാഷിങ്ടൺ 18.4 ഓവറിൽ നാല് വിക്കറ്റ് നഷ്ടത്തിൽ ലക്ഷ്യം അനായാസമായി മറികടക്കുകയായിരുന്നു.

അതേസമയം ന്യൂസിലാൻഡിനെതിരെയുള്ള ചരിത്ര വിജയത്തോടെ അഞ്ച് മത്സരങ്ങളുടെ പരമ്പരയിൽ 1-0ന് മുന്നിലെത്താനും ഇന്ത്യക്ക് സാധിച്ചു. ഒക്ടോബർ 24നാണ് പരമ്പരയിലെ രണ്ടാം മത്സരം നടക്കുന്നത്.

Content Highlight: Shreyas Iyer historical run chases in International T20 and IPL