കരിയറിലെ 500ാം അന്താരാഷ്ട്ര മത്സരം കളിക്കാനുള്ള തയ്യാറെടുപ്പിലാണ് മുന് ഇന്ത്യന് നായകന് രോഹിത് ശര്മ. ഇന്ത്യയുടെ ഓസ്ട്രേലിയന് പര്യടനത്തിലെ ആദ്യ ഏകദിനമാണ് രോഹിത്തിന്റെ 500ാം അന്താരാഷ്ട്ര മത്സരമായി അടയാളപ്പെടുത്തുക. ഒക്ടോബര് 19ന് പെര്ത്തിലെ ഒപ്റ്റസ് സ്റ്റേഡിയത്തിലാണ് മത്സരം അരങ്ങേറുന്നത്.
ക്രിക്കറ്റ് ചരിത്രത്തില് ഇതുവരെ ഒമ്പത് താരങ്ങള് മാത്രമാണ് 500 അന്താരാഷ്ട്ര മത്സരങ്ങള് കളിച്ചിട്ടുള്ളത്. ഇതില് നാല് പേരും ഇന്ത്യന് താരങ്ങളുമാണ്. ഈ റെക്കോഡ് നേട്ടത്തില് പത്താമനും അഞ്ചാമനുമായി ഇടം നേടാനാണ് രോഹിത് ഒരുങ്ങുന്നത്.
കരിയറിലെ ഐതിഹാസിക മത്സരത്തില് രോഹിത് എത്ര റണ്സടിക്കും എന്ന് മാത്രമാണ് ആരാധകര് ഉറ്റുനോക്കുന്നത്. ഐ.സി.സി ചാമ്പ്യന്സ് ട്രോഫി വിജയത്തിന് ശേഷം രോഹിത് ശര്മ കളിക്കുന്ന ആദ്യ ഏകദിനവും ആദ്യ അന്താരാഷ്ട്ര മത്സരവുമാണ് പെര്ത്തില് അരങ്ങേറുന്നത്.
തങ്ങളുടെ 500ാം അന്താരാഷ്ട്ര മത്സരത്തില് മിക്ക താരങ്ങള്ക്കും തിളങ്ങാന് സാധിച്ചിട്ടില്ല. ദ്രാവിഡും കാല്ലിസും ജയസൂര്യയുമെല്ലാം ഒറ്റയക്കത്തിന് പുറത്തായപ്പോള് രണ്ട് താരങ്ങള് അര്ധ സെഞ്ച്വറിക്കരികെ കാലിടറി വീണു.
മുന് ഇന്ത്യന് നായകന് വിരാട് കോഹ്ലിയാണ് ഇക്കൂട്ടത്തില് വ്യത്യസ്തന്. തന്റെ 500ാം മത്സരത്തില് സെഞ്ച്വറിയടിച്ചാണ് കിങ് കോഹ്ലി തിളങ്ങിയത്.
(താരം – ടീം – 500ാം മത്സരത്തിലെ സ്കോര് – ആകെ മത്സരം എന്നീ ക്രമത്തില്)
സച്ചിന് ടെന്ഡുല്ക്കര് – ഇന്ത്യ – 35 – 664
മഹേല ജയവര്ധനെ – ശ്രീലങ്ക – 11 – 652
കുമാര് സംഗക്കാര – ശ്രീലങ്ക – 48 – 594
സനത് ജയസൂര്യ – ശ്രീലങ്ക – 1 – 586
റിക്കി പോണ്ടിങ് – ഓസ്ട്രേലിയ – 44 – 560
എം.എസ്. ധോണി – ഇന്ത്യ – 32* – 538
വിരാട് കോഹ്ലി – ഇന്ത്യ – 121 – 536*
ഷാഹിദ് അഫ്രിദി – പാകിസ്ഥാന് – 22 – 524
ജാക് കാല്ലിസ് – സൗത്ത് ആഫ്രിക്ക – 6 – 519
രാഹുല് ദ്രാവിഡ് – ഇന്ത്യ – 2 – 509
ഏകദിനത്തിലാണ് രോഹിത് ശര്മ ഏറ്റവുമധികം തവണ മത്സരം കളിച്ചത്. 273 മത്സരങ്ങളില്. 159 അന്താരാഷ്ട്ര ടി-20കളിലും 67 റെഡ് ബോള് മാച്ചിലും രോഹിത് ശര്മ ഇന്ത്യന് ജേഴ്സിയിലെത്തി.
മൂന്ന് ഏകദിനങ്ങളുടെ പരമ്പരയാണ് ഇന്ത്യ ഓസ്ട്രേലിയയിലെത്തി കളിക്കുക. ഈ മൂന്ന് മത്സരത്തിലും രോഹിത് ടീമിനൊപ്പമുണ്ടാകുമെന്നാണ് ആരാധകര് കരുതുന്നത്.
ഇന്ത്യയുടെ ഓസ്ട്രേലിയന് പര്യടനം – ഏകദിന പരമ്പര
ആദ്യ ഏകദിനം – ഒക്ടോബര് 19, ഞായര് – ഒപ്റ്റസ് സ്റ്റേഡിയം പെര്ത്
രണ്ടാം ഏകദിനം – ഒക്ടോബര് 23, വ്യാഴം – അഡ്ലെയ്ഡ് ഓവല്
അവസാന ഏകദിനം – ഒക്ടോബര് 25, ശനി – സിഡ്നി ക്രിക്കറ്റ് സ്റ്റേഡിയം
ഇന്ത്യ സ്ക്വാഡ്
ശുഭ്മന് ഗില് (ക്യാപ്റ്റന്), രോഹിത് ശര്മ, വിരാട് കോഹ്ലി, ശ്രേയസ് അയ്യര് (വൈസ് ക്യാപ്റ്റന്), അക്സര് പട്ടേല്, കെ.എല്. രാഹുല് (വിക്കറ്റ് കീപ്പര്), നിതീഷ് കുമാര് റെഡ്ഡി, വാഷിങ്ടണ് സുന്ദര്, കുല്ദീപ് യാദവ്, ഹര്ഷിത് റാണ, മുഹമ്മദ് സിറാജ്, അര്ഷ്ദീപ് സിങ്, പ്രസിദ്ധ് കൃഷ്ണ, ധ്രുവ് ജുറെല് (വിക്കറ്റ് കീപ്പര്), യശസ്വി ജെയ്സ്വാള്
Content Highlight: Rohit Sharma to play 500th international match of his career