ഇന്ത്യക്കെതിരായ രണ്ടാം ടെസ്റ്റിലും വിജയിച്ച് രണ്ട് ടെസ്റ്റ് മത്സരങ്ങള് അടങ്ങുന്ന പരമ്പര സൗത്ത് ആഫ്രിക്ക തൂത്തുവാരിയിരുന്നു. ഗുവാഹത്തി ടെസ്റ്റില് പ്രോട്ടിയാസിനെതിരെ 408 റണ്സിന്റെ കൂറ്റന് പരാജയമായിരുന്നു ഇന്ത്യ ഏറ്റുവാങ്ങിയത്.
ഇനി ഇന്ത്യയുടെ മുന്നിലുള്ളത് സൗത്ത് ആഫ്രിക്കയ്ക്കെതിരെയുള്ള മൂന്ന് ഏകദിന മത്സരങ്ങളടങ്ങുന്ന പരമ്പരയാണ്. നവംബര് 30ന് റാഞ്ചിയിലാണ് മത്സരം. ഇതോടെ 15 അംഗ സ്ക്വാഡും ബി.സി.സി.ഐ പുറത്തുവിട്ടിട്ടുണ്ട്. സൂപ്പര് താരം വിരാട് കോഹ്ലിയും രോഹിത് ശര്മയും സ്ക്വാഡിലുള്ളത് ആരാധകരെ ഏറെ ആവേശം കൊള്ളിക്കുന്നതാണ്. ടെസ്റ്റില് അടപടലം പരാജയപ്പെട്ട ഇന്ത്യ ഏകദിനത്തില് വിജയിക്കുമെന്നാണ് ഏവരും കരുതുന്നത്.
മാത്രമല്ല മത്സരത്തില് ഇന്ത്യയ്ക്ക് വേണ്ടി കളത്തിലിറങ്ങുമ്പോള് രോഹിത്തിനെ കാത്തിരിക്കുന്നത് ഒരു തകര്പ്പന് നേട്ടമാണ്. പരമ്പരയില് നിന്ന് 98 റണ്സ് നേടിയാല് അന്താരാഷ്ട്ര ക്രിക്കറ്റ് കരിയറില് 20,000 റണ്സ് പൂര്ത്തിയാക്കാനാണ് രോഹിത്തിന് സാധിക്കുക. ഇതോടെ അന്താരാഷ്ട്ര ക്രിക്കറ്റില് ഏറ്റവും ഈ മൈല്സ്റ്റോണിലെത്തുന്ന 14ാം താരമാകാനും രോഹിത്തിന് സാധിക്കും.
വളരെ ചുരുക്കം താരങ്ങള്ക്ക് മാത്രമാണ് ഈ ലിസ്റ്റില് ഇടം നേടാന് സാധിച്ചത്. അന്താരാഷ്ട്ര ക്രിക്കറ്റില് ഏറ്റവും കൂടുതല് റണ്സ് നേടിയവരിലും രോഹിത് നിലവില് 14ാമനാണ്. ഇതിഹാസം സച്ചിന് ടെന്ഡുല്ക്കറാണ് റെക്കോഡിന്റെ തലപ്പത്തുള്ളത്.
അതേസമയം കെ.എല്. രാഹുലിന് ക്യാപ്റ്റന്സി നല്കിയാണ് ഇന്ത്യ കളത്തിലിറങ്ങുന്നത്. പ്രോട്ടിയാസിനെതിരായ ടെസ്റ്റ് മത്സരത്തില് പരിക്ക് പറ്റിയ ശുഭ്മന് ഗില്ലിനെ സ്ക്വാഡില് നിന്ന് ഒഴിവാക്കി. മാത്രമല്ല പരിക്കേറ്റ ശ്രേയസ് അയ്യര്ക്കും സ്ക്വാഡില് ഇടം നേടാന് സാധിച്ചില്ല.
