മലയാളത്തിൽ നിരവധി വിജയ ചിത്രങ്ങൾ സമ്മാനിച്ച സംവിധായകനാണ് രാജസേനൻ. രാജസേനൻ – ജയറാം കൂട്ടുകെട്ടിൽ പിറന്ന ചിത്രങ്ങളിൽ ഭൂരിഭാഗവും വലിയ വിജയം നേടിയിരുന്നു. എന്നാൽ തൊണ്ണൂറുകളിൽ തിളങ്ങി നിന്നിരുന്ന രാജസേനൻ രണ്ടായിരത്തിന് ശേഷം തുടർ പരാജയങ്ങളും നേരിട്ടിരുന്നു.
ഇത്ര വർഷത്തെ കരിയറിൽ മമ്മൂട്ടിയോടൊപ്പം ഒരു സിനിമപോലും രാജസേനൻ ചെയ്തിട്ടില്ല. എന്നാൽ 1984 ൽ താൻ സംവിധാനം ചെയ്ത ആഗ്രഹം എന്ന സിനിമയിലേക്ക് മമ്മൂട്ടിയെ വിളിച്ചിരുന്നുവെന്നും എന്നാൽ അന്ന് അദ്ദേഹത്തിന് ഡേറ്റ് ഇല്ലാത്തത് കൊണ്ട് താൻ എം.ജി സോമനെ വിളിച്ചെന്നും രാജസേനൻ പറയുന്നു.
ഷൂട്ട് തുടങ്ങുന്ന ദിവസം മമ്മൂട്ടി വിളിച്ച് ഡേറ്റ് ഓക്കെയാണെന്ന് പറഞ്ഞെന്നും പക്ഷെ അന്നത്തെ സീനിയർ നടനായ സോമനെ സിനിമയിൽ നിന്ന് ഒഴിവാക്കുന്നത് ശരിയല്ലെന്ന് തോന്നിയതിനാൽ മമ്മൂട്ടിയെ പിന്നെ വിളിച്ചില്ലെന്നും അദ്ദേഹം പറഞ്ഞു. അന്ന് മമ്മൂട്ടിയോടൊപ്പം ആ സിനിമ സംഭവിച്ചിരുന്നുവെങ്കിൽ ഒരുപക്ഷെ ഒന്നിച്ചുള്ള ഒരുപാട് ചിത്രങ്ങൾ സംഭവിച്ചേനെയെന്നും രാജസേനൻ കൂട്ടിച്ചേർത്തു.
‘ഞാൻ ചെയ്ത ആഗ്രഹം എന്ന സിനിമയിൽ സോമേട്ടൻ അവതരിപ്പിച്ച കഥാപാത്രത്തിലേക്ക് ആദ്യം തീരുമാനിച്ചത് മമ്മൂട്ടിയെയായിരുന്നു. അതിന് ഞാൻ മമ്മൂക്കയുടെ ഡേറ്റ് ചോദിച്ചിരുന്നു. പുള്ളിയുടെ തിരക്ക് തുടങ്ങിയ ഒരു കാലഘട്ടമായിരുന്നു അത്. പക്ഷെ ഞാൻ ആദ്യം ചോദിച്ച ഡേറ്റ് മമ്മൂട്ടിക്ക് പറ്റില്ലായിരുന്നു. അന്ന് മറ്റൊരു സിനിമയുടെ തിരക്കിലായിരുന്നു പുള്ളി.
പക്ഷെ ഞങ്ങൾ സിനിമയുടെ ഷൂട്ട് തുടങ്ങി തിരുവനന്തപുരത്തെത്തിയ അന്ന് മമ്മൂക്കയുടെ ഫോൺകോൾ വന്നു. അദ്ദേഹത്തിന്റെ ഡേറ്റ് ഓക്കെയാണ് വേണമെങ്കിൽ ചെയ്യാമെന്ന് പറഞ്ഞു. അത് ഞെട്ടിച്ച ഒരു കോളായിരുന്നു. പക്ഷെ എം.ജി സോമനെ പോലൊരു സീനിയർ നടനെ കാസ്റ്റ് ചെയ്തിട്ട് പിന്നെ അതിൽ നിന്ന് അദ്ദേഹത്തെ മാറ്റുന്നത് ഫെയർ അല്ലല്ലോ.
ആ തീരുമാനം വലിയൊരു നഷ്ടമായിരുന്നു എന്നെനിക്കറിയാം. കാരണം എം.ജി സോമനെ സംബന്ധിച്ചടത്തോളം അദ്ദേഹം ആ സമയം മുന്നൂറ് സിനിമയെങ്ങാനും കഴിഞ്ഞിട്ടുണ്ട്. ആ ലെവലിലാണ് നിൽക്കുന്നത്. അതുകൊണ്ട് അദ്ദേഹത്തിന് ഒരു സിനിമയിൽ നിന്ന് മാറിയെന്ന് കരുതി ഒരു പ്രശ്നമൊന്നുമില്ല. പക്ഷെ അന്നെനിക്ക് മമ്മൂക്കയെ കിട്ടിയിരുന്നെങ്കിൽ ഞാനിപ്പോൾ ഒരു പത്ത് പതിനഞ്ചു സിനിമ അദ്ദേഹത്തെ വെച്ച് ചെയ്തിട്ടുണ്ടാവും,’രാജസേനൻ പറയുന്നു.
Content Highlight: Rajasenan About Mammooty And Agraham Movie