ടെലിവിഷന് ഷോകളിലൂടെയും സ്റ്റേജ് ഷോകളിലൂടെയും മലയാളികള്ക്ക് ഏറെ പരിചിതനായ കലാകാരനാണ് രാജാ സാഹിബ്. കോമഡി ഷോകളിലും സീരിയലുകളിലും സിനിമകളിലും തന്റെ കഴിവ് തെളിയിച്ച നടനാണ് അദ്ദേഹം.
മികച്ച മിമിക്രി ആര്ട്ടിസ്റ്റായ രാജാ സാഹിബ് നടന്മാരായ ഇന്നസെന്റ്, ജയന് തുടങ്ങിയവരെയൊക്കെ അനുകരിച്ചുകൊണ്ട് കൈയ്യടി നേടിയിരുന്നു. അപരന്മാര് നഗരത്തില് എന്ന സിനിമയില് നടന് ജയന്റെ അപരനായി അഭിനയിച്ചതും അദ്ദേഹമായിരുന്നു.
നടന് ജഗതിയോടൊപ്പം ഒരുപാട് സിനിമകളിലും സ്റ്റേജ് ഷോകളിലും അഭിനയിച്ചിട്ടുള്ള നടന് കൂടിയാണ് രാജാ സാഹിബ്. ഇപ്പോള് മാസ്റ്റര് ബിന് യൂട്യൂബ് ചാനലിന് നല്കിയ അഭിമുഖത്തില് ജഗതിയെ കുറിച്ച് പറയുകയാണ് അദ്ദേഹം.
‘നമ്മള് കൃത്യമായ ടൈമിങ്ങില് ഒരു സാധനം പറഞ്ഞില്ലെങ്കില് നമ്മളെ പച്ച തെറി പറയുന്ന ആര്ട്ടിസ്റ്റുകളില് ഒരാളാണ് ജഗതി ചേട്ടന്. സ്പീഡും ടൈമിങ്ങും കൃത്യമായി ശ്രദ്ധിക്കുന്ന ഒരാളാകണം ആര്ട്ടിസ്റ്റെന്നാണ് ചേട്ടന് പറയാറുള്ളത്.
ജഗതി ചേട്ടന്റെ കൂടെ ഒരുപാട് സിനിമകളില് ഞാന് അഭിനയിച്ചിട്ടുണ്ട്. ശരിക്കും ചേട്ടന്റെ കൂടെ വര്ക്ക് ചെയ്യുമ്പോള് നമുക്ക് നല്ല ടെന്ഷനാണ്. ഞാന് ആദ്യമായി ഒരു ഷോയുടെ ഭാഗമായി ഗള്ഫില് പോകുന്നത് അദ്ദേഹത്തിന്റെ കൂടെ ആയിരുന്നു.
അന്ന് എന്റെ ആദ്യ പ്രോഗ്രാമിന് ജഗതി ചേട്ടനും മധു സാറും വിന്ദുജ മേനോനും ഉള്പ്പെടെ കുറേ ആളുകള് ഉണ്ടായിരുന്നു. ഞങ്ങള് അവിടേക്ക് പോകുമ്പോള് ഫ്ളൈറ്റില് ഇരുന്ന് തന്നെ ഒരു സ്ക്രിപ്റ്റ് തയ്യാറാക്കിയിരുന്നു.
ഒരു ഉത്സവ പറമ്പിന്റെ കോമഡി ആയിരുന്നു അത്. അന്ന് അത് പെര്ഫോം ചെയ്യുന്ന സമയത്ത് ഞാന് കൃത്യമായി ഒരു സംഭവം ചെയ്തില്ല. അതിന് ജഗതി ചേട്ടന്റെ വായില് നിന്ന് തെറിവിളി കേട്ടു. എന്റെ ഹൃദയം പൊട്ടിയങ്ങ് പോയി.
അദ്ദേഹം അത്തരം സന്ദര്ഭങ്ങളില് വളരെ റൂഡായിട്ടാണ് സംസാരിക്കുക. കൃത്യമായി മീറ്ററ് കണക്കാക്കി പറഞ്ഞില്ലെങ്കിലോ ഒരു സെക്കന്റ് അങ്ങോട്ടോ ഇങ്ങോട്ടോ പോയാലോ ചേട്ടന് പബ്ലിക്കായി ചീത്ത വിളിക്കും,’ രാജാ സാഹിബ് പറയുന്നു.
Content Highlight: Raja Sahib Talks About Jagathy Sreekumar